ەلوردادا وتىزعا جۋىق وتباسى دالادا قالايىن دەپ تۇر. ويتكەنى ساتىپ العان ۇيلەرى ەكىنشى رەت زاڭسىز ساۋدالانعان كورىنەدى. ەندى ءۇيدى ساتىپ العان ەكى تاراپ بىر-بىرىمەن سوتتاسىپ ءجۇر. ولاردى وسىلاي داۋلاستىرىپ قويعان قۇرىلىس كومپانياسىنىڭ باسشىلارى بولسا تۇرمەدە وتىر دەپ حابارلايدى Qamshy.kz اقپارات اگەنتتىگى kaz.tengrinews.kz سايتىنا سىلتەمە جاساپ. 

40 جىل ءمۇعالىم بولىپ، زەينەتكە شىققان روزا اپاي تارازداعى بۇكىل دۇنيە-مۇلكىن ساتىپ، ەلورداعا ۇلىنىڭ قولىنا كوشىپ كەلگەن. مىنا ءۇش بولمەلى پاتەردى 2016 جىلدىڭ باسىندا تولىق بىتپەگەن كۇيىندە ساتىپ الىپ، ءىشىن تۇگەل وزدەرى جاساتقان. جالپى شىعىنى 20 ميلليوننان استى دەيدى. ۇيدەگى 7 ادام ەندى راحاتىن كورە باستاعاندا ساۋ ەتىپ بىرەۋ سۋىت حابار اكەپتى.

"نوتاريۋس بۇل ءۇيدىڭ بۇعان دەيىن ساتىلعان ساتىلماعانىن، كەپىلدىكتە تۇرعان تۇرماعانىن تەكسەردىك. بۇكىل جەردەن انىقتاماسىن الدى. نوتاريۋس سودان كەيىن بىزبەن كەلىسىمشارت جاسادى. ءۇيدىڭ ءبىرىن رەتتەپ قاجەتتى دۇنيە-مۇلىكتى ورىن-ورنىنا قويىپ وتىرساق، ءبىر كۇنى "ءۇي مەنىكى" دەپ ءبىر ايەل كەلىپ تۇر"، - دەدىنۇر-سۇلتان قالاسىنىڭ تۇرعىنى روزا بايدۋانوۆا.

كەلىپ تۇرعان كىسىنىڭ قولىندا 2012 جىلدان بەرى سول پاتەردىڭ يەسى ەكەنىن راستايتىن قۇجاتى بار ەكەن. روزا اپاي سەكىلدى وپىق جەپ قالعان "انيسا" تۇرعىن ءۇي كەشەنى تۇرعىندارىنىڭ سانى وزدەرىنىڭ ايتۋىنشا، 29. ءبارى دە ءبىر-بىر قۇشاق قۇجات ۇستاپ الىپ، پاتەردىڭ شىن قوجايىنى ەكەنىن دالەلدەي الماي ءجۇر.

"ونىڭ كەلىسىمشارتىنىڭ ءبىرىنشى پاراعى جاڭارتىلعان. كەشىرىڭىزدەر، پاتەردىڭ قۇجاتىنىڭ ءبىرىنشى بەتىن جىرتىپ العان. ونىڭ ۇستىنە ولار 2012 جىلى ساتىپ العان پاتەرلەرىن. سوندا 2016 جىلعا دەيىن قايدا جۇرگەن"، - دەيدى نۇر-سۇلتان قالاسىنىڭ تۇرعىنى ىرىستى ەستيار.

ولاردى سوڭعى 3-4 جىل قاتارىنان ابىگەرگە سالىپ وتىرعان مىنا توپ. ولاردىڭ ايتۋىنشا، ءۇي جارنا رەتىندە وسى كىسىلەردىڭ اقشاسىنا سالىنعان. بۇلاردىڭ دا قولدارىندا راستايتىن قۇجاتتارى جەتكىلىكتى. ۇيىنە تولەگەن ميلليوندارى تۇبىرتەك كۇيىندە ءالى ساقتاۋلى. تەك ءۇي بىتۋگە شاق قالعاندا قۇرىلىس سالۋشى باسشىلار بىرنەشە پاتەردى باسقا بىرەۋلەرگە ساتىپ جىبەرگەن. سوندىقتان كىنانى بىزدەن ەمەس، قۇرىلىسشىلاردان ىزدەۋ كەرەك دەيدى.

"بىزبەن سوعىسقا شىققان سياقتى. پروكۋراتۋراعا بارىپ قايتا-قايتا مەنىڭ ۇستىمنەن ءىس قوزعاسىن دەگەن وتىنىشتەر جازىپ جاتىر. بۇنىڭ بارلىعى ادامدى قاجىتادى، شارشاتادى. ولاردىڭ جاۋى مەن ەمەس قوي. مەن ەمەس ولاردىڭ پاتەرىن ەكىنشى رەت ساتقان"، - دەيدى نۇر-سۇلتان قالاسىنىڭ تۇرعىنى اسەل الييەۆا.

ولار ون ادام بىرىگىپ الىپ، ءبىر ادۆوكات جالداعان. جالپى ءۇي ءبىرىنشى قوجايىنداردىڭ جارنا رەتىندە جيناعان اقشاسىنا سالىنعان، ونى راستايتىن قۇجاتتارى بار دەيدى ادۆوكاتى. قۇرىلىستىڭ مۇنداي ءتۇرى زاڭدا رۇقسات ەتىلگەن.

"مامىلەلەردى كەز كەلگەن ۋاقىتتا جاساۋعا بولادى. ول ءۇيدى سالۋعا رۇقسات وعان قاجەت ەمەس. جەر ءبولىنۋ قاجەت ەمەس. ويتكەنى، زاڭ بويىنشا مۇنداي مامىلەلەر جاسالىپ، اقشا جينالادى. جەردى ساتىپ الىپ ءۇيدى سالۋعا قاراجات جيناۋ ءۇشىن زاڭ بويىنشا رۇقسات ەتىلگەن"، - دەيدى زاڭگەر ايمان جۇمابەكوۆا. 

وسىعان دەيىن وتكەن 3-4 سوت شەشىمى ءۇيدى 2012-2013 جىلدارى ساتىپ العانداردىڭ پايداسىنا شەشىلگەن. ال پاتەرىنەن ايرىلعىسى كەلمەگەن ەكىنشى توپ ەندى جوعارعى سوتقا بارماق.

جالپى، "انيسا-1" - قالاداعى پروبلەمالىق تۇرعىن ءۇي كەشەندەرىنىڭ قاتارىنا جاتادى. سوتتاسىپ جاتقان ەكى جاقتىڭ ءبىرى قالاي بولعان كۇندە ميلليونداعان اقشاعا ساتىپ العان پاتەرىنەن ايرىلعالى تۇر. دالادا قالسا سالعان اقشاسى دا كوزدەن بۇلبۇل ۇشادى. ويتكەنى، ولاردى قىرقىستىرىپ قويعان قۇرىلىس كومپانياسى باسشىلارى 6-8 جىلعا سوتتالىپ كەتكەن.

ۇسىنعان: داۋرەن سىبانباي