اعىلشىندىق ۋوركشير گرافستۆولىعىندا تۇگەلدەي تەرىسى جوق ۇل بالا دۇنيەگە كەلدى. 2018 جىلدىڭ 24-قاراشا كۇنى 19 جاستاعى دجەسسيكا كيببلەر جۇكتىلىكتىن 7-ايىندا ءوزىنىڭ ءبىرىنشى بالاسى كايدەن دجەيك شاتتوكتى دۇنيەگە اكەلدى.

ءسابيدىڭ سالماعى – 1،1 كەلى. ونىڭ دەنەسىنىڭ تەك 2%-ى عانا تەرىمەن قاپتالعان. دارىگەرلەر بىردەن ءسابيدىڭ ۇزاق ءومىر سۇرمەيتىنى تۋرالى ايتتى.

“مەدبيكەلەر ماعان ەڭ ءبىرىنشى رەت كايدەندى اكەلگەندە، ول شيكى ەت سياقتى بولدى جانە ءبىز بالالاردى باعۋدان تۇك حابارى جوق 19 جاستاعى اتا-انانى، ءبىرىنشى رەت ءالسىز جانە اۋرۋ ءسابيدى كوردىك”، - دەدى كيببلەر.

ونىڭ ايتۋىنشا، دارىگەرلەر بالانىڭ ازابىن جەڭىلدەتۋ ءۇشىن ءبارىن جاسادى. ءبىر جارىم اي ىشىندە تەرى جايلاپ شىعا باستادى. بۇل كەزدەردە ءسابي كيىمسىز ءومىر ءسۇردى: دەنەگە كەز-كەلگەن زات ءتيىپ كەتسە، تۇرشىگىپ جانە توگىسسىز اۋرۋ اكەلەتىن.

دۇنيە ەسىگىن اشقاننان بەرى بالا كايدەن سەپسيس، ەنتەروكوليت، تۋا بىتكەن گەرپەس، برونحليوليت جانە ت.ب. اۋرۋلارىمەن اۋىردى.

دجەسسيكا كيببلەر جۇكتىلىك كەزىندە گيدرونەفروز جانە بۇيرەك شەمەنىمەن اۋىردى. بوسانۋعا دەيىن ءۇش اي بۇرىن كيببلەر قانسىرالاپ، اۋرۋحاناعا تۇسكەن. جالپى قارالىم كەزىندە دارىگەرلەر ۇرىقتان ەشقانداي اقاۋ تاپپادى. ولار سيرەك كەزدەسەتىن اۋرۋدىڭ سەبەپتەرىن تابا المادى. ءسابيدىڭ مەديسينالىق تاريحى شەتەلتىك ماماندارعا بەرىلدى.

قازىرگى تاڭدا كايدەننىڭ دەنساۋلىعى ءبىر قالىپتى قالپىنا كەلۋدە. ءقازىر ونىڭ سالماعى 4،3 كەلىگە جەتتى.

دايىنداعان: يلدار اديلچەنوۆ