داريعا نازاربايەۆانىڭ توراعالىعىمەن وتكەن پارلامەنت سەناتى بيۋروسىنىڭ وتىرىسىندا "قۇرمەتتى سەناتور تۋرالى" ەرەجەسى تۋرالى ماسەلە قارالدى، دەپ حابارلايدى Qamshy.kz اقپارات اگەنتتىگى Zakon.kz سايتىنا سىلتەمە جاساپ.

قازاقستان رەسپۋبليكاسىنىڭ تۇڭعىش پرەزيدەنتى – ەلباسىنا قازاقستان مەملەكەتتىلىگىنىڭ نەگىزىن قالاۋشى رەتىندە، كونستيتۋسيانى، ادام مەن ازاماتتىڭ قۇقىقتارى مەن بوستاندىقتارىن قورعاۋدى، قوعامدى توپتاستىرۋدى قامتاماسىز ەتۋدەگى، ەل دامۋىنىڭ ستراتەگيالىق باعىتىن ايقىنداعان تاريحي ەڭبەگىنىڭ مويىندالۋىنىڭ كورىنىسى "قۇرمەتتى سەناتور" مارتەبەسىنىڭ بەرىلۋى بولىپ تابىلادى.

ق ر دەموكراتيالىق، زايىرلى، قۇقىقتىق جانە الەۋمەتتىك مەملەكەت رەتىندە كونستيتۋسيالىق-قۇقىقتىق نەگىزدەرىن قالىپتاستىرۋعا، سونداي-اق وتاندىق پارلامەنتاريزمنىڭ قالىپتاسۋى مەن دامۋىنا زور ۇلەس قوسقانى ءۇشىن قازاقستان رەسپۋبليكاسىنىڭ تۇڭعىش پرەزيدەنتى – ەلباسىنا "قۇرمەتتى سەناتور" مارتەبەسى بەرىلەدى. بيۋرو مۇشەلەرى مەملەكەت باسشىسى ق.توقايەۆتىڭ بۇل باستاماسىنا ءبىراۋىزدان قولداۋ ءبىلدىردى.

"ەلباسىنىڭ باسقارۋىمەن تاۋەلسىزدىك كەزىندەگى قازاقستاننىڭ جەتكەن جەتىستىكتەرى ەلباسىنىڭ وسى باستاعان جولىنىڭ دا، باعىتىنىڭ دا دۇرىستىعىن كورسەتەدى. ەلباسى سەنات جۇمىسىنا ءار ۋاقىتتا تەرەڭ ءمان بەردى، سەنات جۇمىسىنىڭ ىڭعايلى بولۋىنا بارلىق مۇمكىندىكتى جاساپ وتىردى. سەنات ءومىرى ەلباسىنىڭ قويىپ وتىرعان بارلىق ماقساتتارىمەن تىكەلەي تىعىز بايلانىستى بولىپ كەلە جاتىر"، - دەدى ءتوراعا ورىنباسارى ب.بەكنازاروۆ.

"ءبىزدىڭ قازىرگى كونستيتۋسيامىز دا، سول كونستيتۋسيا بويىنشا جۇمىس ىستەپ جاتقان قوس پالاتانىڭ قىزمەتى دە ەلباسىنىڭ ۇلكەن باستاماسىنىڭ، اۆتورلىعىنىڭ ارقاسىندا جۇزەگە استى. 1995 جىلعى كونستيتۋسيامىز پوستكەڭەستىك ەلدەر ىشىندە ءبىرىنشى رەت قوس پالاتالى پارلامەنت جاساقتاۋعا مۇمكىندىك بەردى. سونىڭ نەگىزىندە سەناتتىڭ العاشقى كۇنىنەن بۇگىنگە دەيىنگى جۇمىسى ەلباسىنىڭ تىكەلەي قامقورلىعىمەن، باسشىلىعىمەن جۇزەگە اسىپ كەلە جاتىر دەپ ءبىز نىق سەنىممەن ايتا الامىز. ەلباسى مەملەكەت قالىپتاستىرۋشى، تاۋەلسىز قازاقستاننىڭ نەگىزىن سالۋشى تۇلعا عانا ەمەس، قوس پالاتالى پارلامەنتاريزمنىڭ دە نەگىزىن سالعان قايراتكەر. سوندىقتان قاسىم-جومارت كەمەل ۇلىنىڭ بۇل ۇسىنىسىن ءبىز قولدايمىز جانە ابدەن ورىندى دەپ ەسەپتەيمىز"، - دەدى م.قۇل-مۇحاممەد.

سەناتور ب.ءايتىموۆا ەلباسىنىڭ سەنات وتىرىستارىندا ءسوز سويلەپ، كەز-كەلگەن تاقىرىپتار بويىنشا ۇسىنىستار ايتۋ، ەلىمىزدىڭ بارلىق ازاماتتارى مەن مەملەكەتتىك ينستيتۋتتاردىڭ تىنىس-تىرشىلىگى تۋرالى ءوز ويلارىن ورتاعا سالۋ مۇمكىندىكتەرىنىڭ ماڭىزدى ەكەنىن اتاپ ءوتتى.

"مەن بۇل ماسەلەنى تولىق قولدايمىن، ويتكەنى ول ەلباسىنىڭ مەملەكەتىمىزدىڭ قالىپتاسۋى مەن دامۋىنا قوسقان زور ۇلەسىنىڭ مىزعىماستىعى بەكىتىلگەن قازاقستان رەسپۋبليكاسىنىڭ كونستيتۋسياسىنا سايكەس كەلەدى"، - دەدى سەناتور گ. كيم.

"قۇرمەتتى سەناتور" مارتەبەسىن بەرۋ تۋرالى شەشىم قازاقستان رەسپۋبليكاسى پارلامەنتى سەناتىنىڭ پالاتا وتىرىسىندا قابىلدانادى.

بيۋرودا 30 مامىردا وتەتىن پالاتا وتىرىسىنىڭ كۇن ءتارتىبى بەلگىلەندى. سەناتورلار حالىقارالىق ەكى قۇجاتتى: ءبىر تاراپتان ەۋرازيالىق ەكونوميكالىق وداق پەن وعان مۇشە مەملەكەتتەر جانە ەكىنشى تاراپتان جۇڭگو حالىق رەسپۋبليكاسى اراسىنداعى ساۋدا-ەكونوميكالىق ىنتىماقتاستىق تۋرالى كەلىسىمدى؛ قازاقستان رەسپۋبليكاسى مەن ليتۆا رەسپۋبليكاسى اراسىنداعى باس بوستاندىعىنان ايىرۋعا سوتتالعان ادامداردى جانە مەديسينالىق سيپاتتاعى ماجبۇرلەۋ شارالارى قولدانىلعان ادامداردى بەرۋ تۋرالى شارتتى قارايتىن بولادى.

سەناتورلار بيۋرودا سونداي-اق قازاقستان رەسپۋبليكاسى پارلامەنتى سەناتىنىڭ 2019 جىلعا ارنالعان نەگىزگى ءىس-شارالار جوسپارىنا وزگەرىستەر مەن تولىقتىرۋلار ەنگىزۋ تۋرالى ماسەلەنى قارادى.

ۇسىنعان: بەك بايتاس