قاراعاندى وبلىسى جاڭاارقا اۋدانىنىڭ تۇرعىنى عالى باقتىبايەۆتى اتىپ كەتتى دەپ حابارلايدى Qamshy.kz اقپارات اگەنتتىگى. 

بۇل تۋرالى قاراعاندىلىق بەلسەندى ايسۇلتان جاقىپوۆ Facebook پاراقشاسىندا جازدى. ونىڭ ايتۋىنشا، عالى ءادىل ۇلى باقتىبايەۆ جەمقورلىقپەن كۇرەسىپ جۇرگەن بەلسەندى ازامات. سوڭعى ۋاقىتتا ول  9 ماۋسىمدا وتەتىن كەزەكتەن تىس پرەزيدەنت سايلاۋىنا "ۇلت تاعدىرى" قوزعالىسى ۇسىنعان كانديدات ءامىرجان قوسانوۆتى قولداپ، بەلسەندى جۇمىس جاساعان. 

"جاڭاارقادا عالى دەگەن كىسى بار ەدى. جەمقورلىقپەن كۇرەسەتىن، سوتقا دەيىن باراتىن ادامتىن. قوسانوۆ اعامىزدىڭ جارنامالارىن ءىلىپ، جاقسى جۇمىس ىستەپ جۇرگەن. سول كىسىنى تۇندە اتىپ كەتىپتى(( جەمقورلار تىقىر تايانعانىن سەزىنە باستادى ما؟ مارقۇمنىڭ تولىق ءاتى-جونى باقتىبايەۆ عالى ءادى ۇلى. يماندى بولىڭىز عالى اعا! قانىڭىز بوسقا توگىلمەيدى. ۋادە بەرەم!"، – دەپ جازعان ايسۇلتان جاقىپوۆ عالى باقتىباەتىڭ ولىمىنە الدا كەلە جاتقان سايلاۋداعى ۇستانىمىنىڭ قاتىسى جوق ەكەنىن ايتتى.

اتالعان وقيعاعا بايلانىستى قاراعاندى وبلىسىتىق پوليسيا دەپارتامەنتىنىڭ باسپا ءسوز قىزمەتى رەسمي مالىمدەمە جاسادى.

"اعىمداعى جىلدىڭ 28 مامىرىندا قاراعاندى وبلىسى جاڭاارقا اۋدانىنىڭ اتاسۋ كەنتىندە وق جاراقاتتارىمەن 59-جاستاعى كەنت تۇرعىنىنىڭ ءمايىتى تابىلدى. اتالعان فاكتىگە بايلانىستى قىلمىستىق كودەكستىڭ 99 بابى 1 تارماعى «ادام ءولتىرۋ» سايكەس قىلمىستىق ءىس قوزعالدى. قىلمىستى اشۋ، كۇدىكتى ازاماتتاردى ۇستاۋ ماقساتىندا دەپارتامەنتتىڭ جانە جاڭاارقا اۋداندىق پوليسيا ءبولىمىنىڭ تاجىريبەلى قىزمەتكەرلەرىنەن جەدەل تەرگەۋ توبى جاساقتالىپ، قىلمىستىڭ ءىزىن كەسۋ بويىنشا كەشەندى ءىس-شارالار اتقارىلۋدا. تەرگەۋ بارىسى وبلىستىق پوليسيا جانە پروكۋراتۋرا باسشىلىعىنىڭ باقىلاۋىندا. وزگە اقپاراتتار ق ر قپك-نىڭ 201 بابىنا سايكەس جاريالانبايدى"، – دەلىنگەن باسپا ءسوز قىزمەتىنىڭ حابارلاماسىندا.

ۇسىنعان: ميات كاشىباي