جول سالۋ، ۇيگە «پول» سالۋ ەمەس. بۇگىندە بۇل قۇرىلىس سالاسىنا تىكەلەي باعىتتالعان قاعيدات. الايدا كەيىنگى جىلدارى قۇرىلىس باعىتىندا باعدارىن تاپپاي، تىرلىگى تۇرالاعان تىرلىكتەر از ەمەس. بۇل جايىندا جامبىل وبلىسىنىڭ اكىمى اسقار مىرزاحمەتوۆتىڭ توراعالىعىمەن وتكەن جيىندا جان-جاقتى تالقىلانىپ، ماسەلەسى مايشاممەن قارالدى.
باسقوسۋدا وبلىس اكىمدىگىنىڭ جولاۋشىلار كولىگى جانە اۆتوموبيل جولدارى باسقارماسىنىڭ باسشىسى باقىتجان جانىبەكوۆ بايانداما جاسادى. ول الدىمەن باسقارما اكىمشى بولىپ تابىلاتىن 67 نىسان بويىنشا كەلىسىم-شارتتار جاساسۋ جاعدايىنا توقتالىپ ءوتتى. ونىڭ ايتۋىنشا، بۇگىندە 38 نىسان بويىنشا كەلىسىم-شارتتار جاسالعان. ال، 17 نىسان بويىنشا شاعىمدانۋلار ورىن الىپ جاتسا، 10 نىسان بويىنشا مەملەكەتتىك ساتىپ الۋ كونكۋرسى وتكىزىلۋدە. سونداي-اق، 1 نىسان بويىنشا شاعىمدانۋ قورىتىندىسى شىقسا، تاعى 1 نىسان بويىنشا كونكۋرس جاريالانباعان.
ايتا كەتۋ كەرەك، 67 نىساننىڭ 48ء-ى ورتاشا جوندەۋ، 13ء-ى اعىمداعى جوندەۋ، 2ء-ى قايتا جاڭعىرتۋ، 4ء-ى جاڭا جول قۇرىلىسىن جۇرگىزۋ بويىنشا بەلگىلەنگەن.
وبلىس باسشىسى كەلىسىم-شارت جاسالعان نىساندار بويىنشا ناقتى تالداۋلار، ولار بويىنشا جۇيەلى جوسپاردىڭ كەرەكتىگىن باسا ايتتى. تالداۋ مەن جوسپاردا ولاردىڭ ورىندالۋ مەرزىمى، مەردىگەر كومپانيالاردىڭ الەۋەتى، تەحنيكالىق مۇمكىنشىلىگى سەكىلدى جاعدايلار تولىعىمەن قامتىلۋ جايى ءسوز بولدى. بۇل بويىنشا جاۋاپتى تۇلعالارعا ناقتى تاپسىرمالار جۇكتەلدى.
سونداي-اق، جيىن بارىسىندا سالاعا قاتىستى ءتۇسىپ جاتقان ارىز-شاعىمدار مەن سىني ماتاريالداردىڭ ماڭىزدىلىعى سارالاندى. اعىمداعى جىلدىڭ باسىنان بەرى بارلىعى 91 ارىز-شاعىم كەلىپ تۇسسە، ونىڭ 37ء-ى باسقارماعا تىركەلگەن. قالعانى الەۋمەتتىك جەلىدەگى جاريالانىمدار. ايتا كەتەرلىگى، 91 ارىز-شاعىمنىڭ 66-ى وبلىس ورتالىعى – تاراز قالاسىنىڭ كوشەلەرىنە قاتىستى بولىپ وتىر.
اسقار يسابەك ۇلى بۇگىندە تاراز قالاسىنىڭ نەگىزگى كوشەلەرى جاپا-تارماعاي قازىندىلارعا اينالعانىن تىلگە تيەك ەتىپ، ول ءوز كەزەگىندە الەۋمەتتىك جەلى قولدانۋشىلاردىڭ دا نارازىلىعىن تۋدىرىپ وتىرعانىن باسا ايتتى. ءوڭىر باسشىسى جەر استى قۇبىرلارىن جوندەۋ، اۋىستىرۋ جۇمىستارى تياناقتى ءارى رەت-رەتىمەن جۇرگىزىلۋ كەرەكتىگىن ەسكەرتىپ، شاھار كوشەلەرىندەگى بەي-بەرەكەتسىزدىكتى قالپىنا كەلتىرۋ بويىنشا قالا اكىمىنە ناقتى تاپسىرمالار بەردى. سونىمەن قاتار، قالاداعى وزگە دە ماسەلەلەردى رەتتەۋ بويىنشا ءتيىستى جۇمىستاردى جولعا قويۋ كەرەكتىگىن جۇكتەدى. بۇل بويىنشا وبلىس اكىمى ءتيىستى ورىنباسارى، قالا اكىمى جانە سالا باسشىلارىنان ارنايى جۇمىسشى توبىن قۇرىپ، ناقتى ءىس-شارالار جوسپارىن بەكىتۋدى مىندەتتەدى.
ارينە، باسقارماداعىلار مەن باسقا ارناداعىلار سىننان ساباق الىپ جاتسا ماقۇل-اق. الايدا بۇگىنگى كۇنگە جوسىقسىز مەردىگەرلەر مەن سەنىمسىز سەرىكتەستىكتەر كوبەيگەنى جاسىرىن ەمەس. ايماق باسشىسىنىڭ تاپسىرمالارىنان كەيىن ولقىلىقتاردىڭ ورنى تولادى دەپ سەنەيىك.
جايدار ازامات
پىكىر قالدىرۋ