ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا جامبىل جەرىندە كوپبالالى انالارعا پاتەر كىلتى تابىس ەتىلۋدە. رامازان ايىنداعى رياسىز قۋانىشقا كاسىپكەرلەر كەنەلتىپ، «تۋعان جەرگە تۋ تىككەن!» تۇلعالاردىڭ بولمىسىن تانىتۋدا. مۇنداي يگى باستامانىڭ جالعاسى رەتىندە كۇنى كەشە ت.رىسقۇلوۆ اۋدانىنىنداعى مەسەنات تا كوپبالالى وتباسىعا پاتەر سىيلادى.   

كورەگەندىلىك كورسەتكەن «Golden compass Jambyl» جاۋاپكەرشىلىگى شەكتەۋلى سەرىكتەستىگىنىڭ باسشىسى قۇربان يزالوۆ ۇجىمداستارىمەن بىرگە اۋدانداعى 7 بالالى انا اسەل قۇرمانوۆاعا 5 بولمەلى ءۇي سىيلادى. باسپانانىڭ كىلتىن تاپسىرۋ ساتىندە كاسىپكەر قۇربان يزالوۆ:

–جاڭا قونىس كوپبالالى وتباسىنا قۇت بولىپ، وسى شاڭىراقتان ەلىمىزدىڭ يگىلىگىنە قىزمەت ەتەتىن پەرزەنتتەر ءوسىپ، ءونسىن! –دەپ تىلەكتەستىگىن ءبىلدىردى.

لۋگوۆوي اۋىلىنداعى بەيبىت ابۋتاليپوۆ كوشەسىندە ورنالاسقان  بۇل باسپانانىڭ 15 سوتىق جەر تەلىمى، قورا جايى، مونشاسى، اۋىزسۋ قۇبىرى، باقشاسى بار. 130 شارشى  مەتردى قۇرايتىن ءۇي تولىقتاي جاڭارتىلىپ، اعىمداعى جوندەۋدەن وتكەن. اباتتاندىرىلىپ، گازعا قوسىلعان.

–كوپتەن بەرگى تىلەگىمىز بۇگىن ورىندالىپ، قايىرىمدى جانداردىڭ ارقاسىندا ويىمىزداعىداي باسپاناعا قول جەتكىزىپ، قۋانىشقا كەنەلىپ جاتىرمىز. ەل باسقارعان باسشىلارعا، قايىرىمدى ازاماتتارعا ايتار العىسىم شەكسىز. انالىق اق نيەتىممەن ەلىمىزدىڭ بىرلىگى ىدىراماي، كەمەل بولاشاققا جەتۋدى تىلەيمىن، -دەپ اسەل ەرتاي قىزى قۋانىشىن جاسىرا المادى.

ءتورت ۇل، ءۇش قىز تاربيەلەپ وتىرعان وتباسىن اۋدان اكىمى ە.سادىرقۇلوۆ پەن  اۋداندىق ارداگەرلەر كەڭەسىنىڭ ءتوراعاسى ق.بيجانوۆ  قۇتتىقتاپ بارىپ، ىزگى تىلەكتەرىن ءبىلدىردى.

ايتا كەتەيىك، اۋداننىڭ 42 ەلدى مەكەنىندە 13370 وتباسى بار. ونىڭ 3492ء-ى   كوپبالالى شاڭىراق.  ال، 1710 انا «التىن القا»، «كۇمىس القا» يەگەرى اتانعان.

اۋدان بويىنشا باسپانا الۋ كەزەگىندە  622 ادام تۇرسا، ونىڭ 100ء-ى كوپبالالى انالار. اتاۋلى الەۋمەتتىك كومەك الۋشى 1718 وتباسى (11437 ادام) بولسا، ونىڭ 983ء-ى كوپبالالى جانۇيا. كوپبالالى 552 وتباسىنىڭ 880 بالاسى مەكتەپتە تەگىن  ىستىق تاماقپەن قامتىلىپ، جاز ماۋسىمىندا 200 بالا تەگىن دەمالىس لاگەرىنە جىبەرىلەدى.

اۋدان باسشىسى بۇل – انا مەن بالاعا جاسالعان قامقورلىقتىڭ ءبىر پاراسى عانا ەكەنىن، مۇنداي قولداۋلار مەن كومەككە مۇقتاج وتباسىلارعا  قامقورلىق ءالى دە ءوز جالعاسا بەرەتىنىن ايتتى. ەل كەلەشەگىنىڭ كەمەلدىلىگى ءۇشىن جاسالعان مۇنداي قولداۋلار بارلىق ايماقتا ارتا بەرسە دەيمىز.

جايدار ازامات