جاڭاتاس قالاسىندا تاعى ءبىر كوپبالالى وتباسى «رۋحاني جاڭعىرۋ» باعدارلاماسى «ءبىر وتباسى، ءبىر پاتەر» اۋداندىق جوباسى اياسىندا باسپانالى بولدى. ۇزاق جىلدار بويى پاتەردەن پاتەرگە كوشىپ جۇرگەن جالعىزباستى اناعا جاس كاسىپكەر فارحات يساقۇل ۇلى شايمكۇلوۆ ءۇي سىيلادى.

مەسەنات  بۇعان دەيىن دە ءبىرقاتار از قامتىلعان وتباسىلارىن ازىق-تۇلىكپەن، باسقا دا جان-جاقتى كومەكپەن قامتىپ، مۇمكىندىگىنشە قول ۇشىن سوزىپ كەلگەن.

«وسى وتباسىنى كوزىم شالعان سايىن تۇرمىس جاعدايى تىم تومەن ەكەندىگىن بايقايتىنمىن. كوپ ويلانا كەلە وسىنداي قادامعا بارىپ، ورازا قارساڭىندا سىيلىق جاساۋدى ءجون دەپ شەشتىم. ەلىمىزدە پاتەر الۋعا جاعدايى كەلمەيتىن، كوپبالالى وتباسىلار جەتەرلىك. مەن مۇسىلمان، ءوز ەلىمنىڭ پاتريوتى رەتىندە، وسىنداي جاندارعا ءوز اتىمنان كومەك كورسەتۋدى ءجون دەپ سانايمىن»، — دەيدى كاسىپكەر.

ەندى بۇل پاتەر بالالاردىڭ سىڭعىرلاعان كۇلكىسىنە تولادى. بۇل وتباسى بۇرىنعىداي ۇيدەن ۇيگە كوشىپ جۇرمەيدى. باسىبايلى باسپانالى بولدى. نۇرگۇل ەسىمدى جالعىزباستى 5 بالالى انانىڭ قۋانىشىندا شەك جوق. تولقىعان ول كوز جاسىنا دا ەرىك بەردى.

«ءۇيىم جوق ەدى. تىرشىلىكتىڭ تاۋقىمەتىن جاس تا بولسام از كورمەدىم. «جىرتىق ءۇيدىڭ قۇدايى بار» دەگەن راس-اۋ، جوق جەردەن 2 بولمەلى ءۇي بەردى.      مۇنداي بولادى دەپ ويلاماپ ەدىم. ءىشى كۇشتى، ءبارىن جاساپ قويىپتى. بۇل كىسىگە راقمەت كوپ. اللانىڭ نۇرى جاۋا بەرسىن. اسپانىمىز اشىق بولسىن.          انالاردىڭ جاعدايىن جاساۋعا بارىنشا كوڭىل ءبولىپ جاتقان وبلىس باسشىسى اسقار مىرزاحمەتوۆكە  العىسىم شەكسىز»، — دەيدى نۇرگۇل قونىسبايەۆا.

جاڭا قونىسقا كەلگەن نۇرگۇلدىڭ ۇيىنە كورشىسى،  76 جاستاعى انا ءمارىش بايزاقوۆا شاشۋ شاشا كەلىپ، جاقسىلىق جاساپ جاتقان ازاماتتارعا اق باتاسىن بەردى.

ال، مۇنىڭ الدىندا عانا جەرگىلىكتى كاسىپكەرلەر داۋلەتالدى جانبايەۆ پەن توقتاسىن بلالييەۆ ءبىر-بىر وتباسىنى باسپانامەن قامتىپ، كوپتىڭ العىسىنا كەنەلگەن بولاتىن.

وسىلايشا جاڭاتاستىقتار ورازا ايىندا كوپكە ۇلگى بولار تىرلىك جاساۋدا.

جاز-اتا اۋىلىنان جاعىمدى جاڭالىق

جاز-اتا اۋىلىنان دا جاعىمدى جاڭالىق. مويىنقۇم اۋداندىق ءماسليحاتىنىڭ دەپۋتاتى، «ۇركەر» شارۋا قوجالىعىنىڭ جەتەكشىسى باكىر يسابەكوۆ  مويىنقۇم اۋىلىنىڭ تۇرعىنى، كوپبالالى وتباسى ەرجان قارييەۆتىڭ جانۇياسىنا 80 شارشى مەتر بولاتىن جەكە ءۇيدى ساتىپ الىپ بەردى. ءۇش بالانىڭ اتا-اناسى ەرجان مەن نازگۇل كوپ جىلداردان بەرى باكىر باسقاراتىن شارۋا قوجالىعىندا مەحانيزاتور بولىپ ەڭبەك ەتەدى. اۋدان اكىمىنىڭ ورىنباسارلارى باقىتجان ەسەيەۆ، باقىتجان قالىمبەتوۆ، اۋدان اكىمدىگىنىڭ ىشكى ساياسات ءبولىمىنىڭ باسشىسى جانار نەسىپبايەۆا، «نۇر وتان» پارتياسى اۋداندىق فيليالى ءتوراعاسىنىڭ ءبىرىنشى ورىنباسارى ماناربەك كوشكىمبايەۆ، اۋداندىق ارداگەرلەر كەڭەسىنىڭ ءتوراعاسى جامبىل قالىبايەۆ، اۋداندىق جاستار رەسۋرستىق ورتالىعىنىڭ ديرەكتورى ايبات بايعونىسوۆ ەرجان مەن نازگۇلدىڭ قۋانىشتارىنا ارنايى كەلىپ، ورتاقتاسىپ قۇتتىقتادى. جاڭا ءۇي يەسىنىڭ كورشى – قولاڭدارى مەن اعايىن-تۋىستارى شاشۋ شاشىپ، قونىس تويىمەن قۇتتىقتادى.

جايدار ازامات