قازاقستان پرەزيدەنتى قاسىم-جومارت توقايەۆ پەن ەۋروپالىق كەڭەستىڭ ءتوراعاسى دونالد تۋسك «الجير» مەموريالدى-مۋزەي كەشەنىنە باردى دەپ جازادى Qamshy.kz اقپارات اگەنتتىگى پرەزيدەنتتىڭ باسپا ءسوز قىزمەتىنە سىلتەمە جاساپ.
قاسىم-جومارت توقايەۆ پەن دونالد تۋسك قاسىرەت قاقپاسىنىڭ الدىندا باس ءيىپ، ساياسي قۋعىن-سۇرگىن قۇرباندارىنىڭ رۋحىنا تاعزىم ەتتى.
ايتا كەتەيىك، بۇگىن، ياعني 31 مامىر - قازاقستاندا ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى.
توقايەۆ بۇعان دەيىن قازاقستانعا رەسمي ساپارمەن كەلگەن ەۋروپالىق كەڭەس ءتوراعاسىنا ريزاشىلىق ءبىلدىرىپ، ساپاردىڭ ساياسي قۋعىن-سۇرگىن قۇرباندارىن ەسكە الۋ كۇنىمەن تۇسپا-تۇس كەلگەنىنىڭ سيمۆولدىق ءمانى بارىن ايتقان.
"ەۋروپالىق كەڭەستىڭ قابىلداعان جاڭا ستراتەگياسى مەن ءسىزدىڭ ساپارىڭىز ورتالىق ازيا ەلدەرىنىڭ ساياسي-ەكونوميكالىق ورنىقتى جانە ءقاۋىپسىز دامۋى ءۇشىن ەۋروپالىق تاراپتىڭ مۇددەلى ەكەنىنىڭ دالەلى"، – دەدى توقايەۆ.
پىكىر قالدىرۋ