ق ر قورعانىس ءمينيسترىنىڭ ورىنباسارى بريفينگ بەردى دەپ حابارلايدى Qamshy.kz اقپارات اگەنتتىگىنىڭ ارىس قالاسىنا ارنايى بارعان ءتىلشىسى. 

ۆيسە-مينيستردىڭ ايتۋىنشا، ارىس قالاسىنداعى وق-دارىلەر مەن سناريادتاردى زالالسىزداندىرۋ ءالى بىتپەگەن. كەمى ەكى ءۇش كۇن بويى ارىس تۇرعىندارى قالاعا كىرگىزىلمەۋى مۇمكىن.

قورعانىس مينيسترلىگىنىڭ كۇشىمەن قالا اۋماعى بويىنشا قورشاۋ جۇمىستارى ۇيىمداستىرىلدى (ق ر قك جەكەقۇرامىنىڭ 800 ادامى، 50-دەن استام اسكەري تەحنيكا قولدانىلدى).

ونىڭ ىشىندە 125 ساپەر قالا كوشەلەرىندە، تەمىرجول بويىندا جانە اسكەري بولىمگە ىرگەلەس اۋماقتا تازالاۋدى جۇزەگە اسىرىپ جاتىر. وزگە ارىپتەستەرى جەكە قۇرامدى بارلىق قاجەتتىلىكتەرمەن قامتاماسىز ەتۋگە جانە قالا مەن اسكەري قالاشىقتىڭ اۋماعىن قورشاۋعا قاتىسىپ جاتىر.

اۋادا ۇشقىشسىز ءۇش اپپارات ۇشىرىلىپ، ءورت وشاقتارىن باقىلاۋعا الىندى. بۇگىنگى كۇنى 3 وت ورنى انىقتالدى. دەسەك تە، ءىرى جارىلىس ورىن المادى. دەگەنمەن، تۇراقتى ءقاۋىپتى جاعداي ساقتالدى.

قالادا جانە ىرگەلەس اۋماقتا رادياسيالىق كورىنىس قالىپتى جاعدايدا.

جارىلماعان سناريادتاردىڭ تۇرعىن ۇيلەرگە ءتۇسۋى - مينا جويۋ جۇمىسىن كۇردەلەندىرە تۇسۋدە. مۇنداي ءۇي-جايلارعا ساپەرلەردى جىبەرۋ پروكۋراتۋرا، پوليسيا جانە جەرگىلىكتى اتقارۋشى بيلىك ورگاندارى قىزمەتكەرلەرىنىڭ ىلەسىپ جۇرۋىمەن جۇزەگە اسىرىلادى.

ارىس قالاسىنىڭ 16 كوشەسىنەن جارىلماعان 70-تەن استام سنارياد تابىلعان.