قازاقستان رەسپۋبليكاسىنىڭ سىرتقى ىستەر ءمينيسترى بەيبىت اتامقۇلوۆ اقش-قا بارعان رەسمي ساپارىندا ۇلتتىق قاۋىپسىزدىك بويىنشا پرەزيدەنت كەڭەسشىسى دجون بولتونمەن جانە مەملەكەتتىك حاتشى مايكل پومپەومەن كەزدەستى دەپ جازادى Qamshy.kz اقپارات اگەنتتىگى.

كەزدەسۋ بارىسىندا اقش وكىلدەرى قازاقستانداعى كەزەكتەن تىس پرەزيدەنت سايلاۋى تۋرالى پىكىر ءبىلدىرىپ، ءارى قاراي ەكىجاقتى قارىم-قاتىناستى دامىتۋ تۋرالى ءسوز بولدى. اتامقۇلوۆ ءوز كەزەگىندە جاڭادان سايلانعان پرەزيدەنتتىڭ جاڭا دامۋ جولىندا اقش-پەن ستراتەگيالىق سەرىكتەستىك ورناتۋعا مۇددەلى ەكەنىن جەتكىزدى.

امەريكالىق تاراپ ءمينيستردىڭ بۇل سوزىنە توقايەۆتىڭ قوعامدىق-ەكونوميكالىق جانە ساياسي باعىتتارىن قولدايتىنىن، قاجەت بولعان جاعدايدا رەفورمالاردى جۇزەگە اسىرۋعا كومەك بەرەتىنىن جەتكىزدى. بولتوننىڭ ايتۋىنشا، اقش تا قازاقستانمەن كەڭەيتىلگەن ستراتەگيالىق سەرىكتەستىك ورناتۋعا وڭ كوزقاراستا.

قوس تاراپ بۇرىننان قالىپتاسقان ساپالى كەلىسسوزدەر مەن ەكەۋارا جوسپارلاردى قالپىندا قالدىرۋعا ۋاعدالاسىپ، سونداي-اق، كۇن تارتىبىندەگى حالىقارالىق جانە ايماقتىق ماڭىزدى ماسەلەلەردى تىزە قوسا وتىرىپ شەشۋگە ءسوز بايلاستى. كەزدەسۋ بارىسىندا بولتون مەن پومپەو قازىرگى ۋاقىتتا كۇشىندە تۇرعان ستراتەگيالىق سەرىكتەستىك باعىتىن ودان ءارى دامىتۋ قاجەتتىگىن ايتتى.

سونىمەن قاتار، باسقوسۋ بارىسىندا اقش وكىلدەرى قازاقستان ەكونوميكاسىنداعى ەنەرگەتيكا، ترانسپورت، ونەركاسىپ، ينفراسترۋكتۋرا، قارجى، فارماسيەۆتيكا، اۋە-عارىشتىق، ىت-تەحنولوگيالار، كيبەرقاۋىپسىزدىك سالالارى بويىنشا ينۆەستيسيا سالۋعا كەتارى ەمەس ەكەندىكتەرىن ءبىلدىردى.

ودان ءارى حالىقارالىق ماسەلەلەردى شەشۋ بارىسىنداعى سەرىكتەستىك تۋرالى ءسوز قوزعالىپ، تاراپتار بۇكىلالەمدىك تەرروريزممەن كۇرەسۋ، ايماقتىق قاۋىپسىزدىك، اۋعانستانداعى جاعدايدى تۇراقتاندىرۋ جانە باسقا دا ماسەلەلەر اڭگىمە بولدى.