قارجى ءمينيسترى ءاليحان سمايىلوۆ 4 شىلدەدە وتكەن سەنات وتىرىسىندا جارىلىستان بۇلىنگەن ارىس قالاسىن قالپىنا كەلتىرۋ ءۇشىن 34،4 ميلليارد تەڭگە قاجەت ەكەنىن ايتتى دەپ جازادى Qamshy.kz اقپارات اگەنتتىگى ازاتتىق راديوسىنا سىلتەمە جاساپ.

"ارىس تۇرعىندارىنا 100 مىڭ تەڭگە كولەمىندە اقشالاي وتەماقى بەرۋ ءۇشىن 4،5 ميلليارد تەڭگە كەرەك. ۇكىمەت رەزەرۆىنەن - 2،5 ميلييارد تەڭگە، تۇركىستان وبلىستىق بيۋدجەتىنەن - 1 ميلليارد تەڭگە جانە قايىرىمدىلىق كومەك ەسەبىنەن 1،5 ميلليارد تەڭگە بولىنەدى"، - دەدى سمايىلوۆ.

ءمينيستردىڭ ايتۋىنشا، ارىستاعى 7 700-دەن استام تۇرعىن ءۇيدى جوندەۋگە 19،2 ميلليارد تەڭگە كەتەدى. قاجەت قاراجاتتىڭ جارتىسى ءتۇرلى وڭىرلەردىڭ بيۋدجەت ەسەبىنەن الىنادى، قالعان اقشا ۇكىمەت رەزەرۆىنەن بولىنەدى.

"66 الەۋمەتتىك نىساندى قالپىنا كەلتىرۋگە 7 ميلليارد تەڭگە كەرەك. بۇل - 54 ءبىلىم بەرۋ، 8 دەنساۋلىق ساقتاۋ، 4 سپورت وبەكتىلەرى. 6 ميلليارد تەڭگەنى "سامۇرىق-قازىنا" بولەدى. 1 ميلليارد تەڭگە بيزنەس قاۋىمىنان كەلەدى"، - دەدى مينيستر.

ونىڭ ايتۋىنشا، قالاداعى ەلەكتر جەلىلەرى مەن جىلۋ جۇيەلەرىن، ينفراقۇرىلىمدى جوندەۋ ءۇشىن ۇكىمەت رەزەرۆىنەن 2،2 ميلليارد تەڭگە بولىنبەك. ءبارىن قوسقاندا ۇكىمەت رەزەرۆىنەن 15،5 ميلليارد، جەرگىلىكتى بيۋدجەتتەن 10،6 ميلليارد، "سامۇرىق-قازىنا" قورىنان 6 ميلليارد،  دەمەۋشىلەر مەن گۋمانيتارلىق كومەكتەن 2،5 ميلليارد تەڭگە قالانى قالپىنا كەلتىرۋ ءۇشىن الىنادى.