نۇرسۇلتان نازاربايەۆ قازاقستان رەسپۋبليكاسى تۇڭعىش پرەزيدەنتى – ەلباسى قورىنىڭ اتقارۋشى ديرەكتورى اسەت يسەكەشيەۆتى قابىلدادى دەپ حابارلايدى Qamshy.kz اقپارات اگەنتتىگى elbasy.kz سايتىنا سىلتەمە جاساپ.
كەزدەسۋدە اسەت يسەكەشيەۆ قوردىڭ قازىرگى جۇمىسى، سونداي-اق الەۋمەتتىك جانە ءبىلىم سالاسىنداعى ءتۇرلى ءىس-شارالاردىڭ جۇزەگە اسىرىلۋى تۋرالى باياندادى.
قوردىڭ اتقارۋشى ديرەكتورى ەلباسىعا تالانتتى جاستاردى قولداۋعا باعىتتالعان «ەل ءۇمىتى» جوباسى جانە مۇمكىندىگى شەكتەۋلى بالالارعا ارنالعان «قامقورلىق» جوباسى سياقتى جاڭا باستامالاردى تانىستىردى.
– قور ءبىرقاتار ءىس-شارالاردى جۇزەگە اسىرۋ ءۇشىن ءتيىستى جۇمىس جۇرگىزىپ كەلەدى. ءبىز تالانتتى جاستاردى جانە دامۋىندا ەرەكشەلىگى بار بالالاردى قولداۋعا باعىتتالعان "ەل ءۇمىتى" جانە "قامقورلىق" اتتى جاڭا ەكى جوبانى ىسكە اسىرۋدى باستايمىز. تالانتتى جاستارىمىز ەل ىشىندە جانە شەت ەلدە ءبىلىم الۋى ءۇشىن ولارعا كومەكتەسۋىمىز كەرەك. بۇل وتە پايدالى ءارى قاجەتتى جۇمىس. جالپى، قوردىڭ وسى باعىتتاعى جۇمىسىن جانداندىرۋ كەرەك، – دەدى قازاقستاننىڭ تۇڭعىش پرەزيدەنتى.
سونداي-اق، ەلباسى پرەزيدەنتتىڭ، ۇكىمەت پەن پارلامەنتتىڭ بىرلەسكەن جۇمىسى تۋرالى ايتتى.
– پرەزيدەنتتىك وكىلەتتىگىمدى توقتاتقالى بىرنەشە اي ءوتتى. پرەزيدەنت قاسىم-جومارت توقايەۆ، ۇكىمەت جانە ەل پارلامەنتى ۇيلەسىمدى ءارى ءبىرىڭعاي جۇيەدە جۇمىس ىستەۋدە. ءقازىر ءبىز ساياسي جانە ەكونوميكالىق سالالارداعى ورتاق ماسەلەلەردى شەشۋدى كوزدەپ وتىرمىز، – دەدى ەلباسى.
پىكىر قالدىرۋ