ءوزىن ەكىنشى توپ مۇگەدەگىمەن دەپ تانىستىرعان — ءسادۋاقاسوۆا ايگۇل مىڭجان قىزى ءسالافيزم باعىتىن ۇستانعان تۋعان باۋىرىنىڭ جۇبايى ەكەۋى ۇيگە دەپ جيناعان قوماقتى قارجىلارىن «قارىزعا» دەپ الىپ، قايتارماي جۇرگەنىن ايتتى. الەۋمەتتىك جەلى ارقىلى ۆيدەوۇندەۋ جولداعان كەلىنشەك ءدىن وكىلدەرىنەن باۋىرىن جونگە سالۋدى سۇراپ، كوز جاسىن توقتاتا المادى. 

«وتباسىمدا بولعان حيكايامدى سىزدەرگە ايتىپ، كومەك سۇراعىم كەلەدى. 2017 جىلى كۇيەۋىم مەنىڭ باۋىرىما ەكەۋمىز 5 جىل بويى «تۇرعىن ءۇي جيناق بانكىندە» جيناعان 1 ميلليون 850 مىڭ تەڭگەنى قارىزعا بەردى. مەنىڭ باۋىرىم ءسالافيزم باعىتىنداعى ادام. ول اقشانى العان كەزدە، ەكى اپتادان كەيىن قايتاراتىنىن ايتقان. سودان بەرى 2 جىل ءوتتى، ونىڭ اقشامىزدى قايتاراتىن ويى جوق. ول ءدىن جولىن ۇستانعان جان بولا تۇرا، جاقىندارىنا قالاي عانا وسىلاي ىستەي الادى؟! ءوزى وتە تابىستى كاسىپكەر، جەكە بيزنەسى بار»،-دەيدى ول.

ايگۇلدىڭ سوزىنشە، كۇيەۋى باۋىرىنا اقشا بەرگەن كەزدە ايەلىنە ايتپاعان. 18 جىل بويى پاتەر جالداپ تۇراتىن وتباسىنىڭ بار جيعان-تەرگەنى ءبىر كۇندە جوق بولعان.

«كۇيەۋىم وتە سەنگىش ادام، باۋىرىما اقشانى مەنەن جاسىرىپ بەرگەن. ول دا قارىزعا العانىن ايتپاعان. سول سەبەپتى قوعامنان، ارداقتى انالار مەن ءدىن وكىلدەرىنەن شىندىققا قول جەتكىزۋىمە كومەك بەرۋلەرىن سۇرايمىن! ماعان بوتەننىڭ دۇنيەسى قاجەت ەمەس، تەك باۋىرىم اقشامىزدى قايتارسا ەكەن! مەنىڭ كۇيەۋىم زەينەتكەر، ءبىز 18 جىل بويى پاتەر جالداپ تۇرىپ كەلە جاتىرمىز. قوجايىنىمىز كەز-كەلگەن ۋاقىتتا پاتەرىن ساتسا، ءبىز دالادا قالامىز. بۇل اقشانى بولاشاقتا پاتەر الساق دەگەن نيەتپەن جيناعان ەدىك. ەندى ونىڭ قايتاتىنىنا ەشقانداي ءۇمىت جوق»،-دەيدى كەيىپكەرىمىز.

باۋىرىنىڭ ءىسى ءۇشىن ۇيالاتىنىن ايتقان ايگۇل ونىڭ رۋحاني ۇستازدارى ونىمەن سويلەسىپ، تەزگە سالسا دەيدى.

«رۋحاني ۇستازدارى مەنىڭ باۋىرىممەن سويلەسىپ، ونى تۋرا جولعا سالىڭىزدارشى. اللا جولىنداعى ادام وسىلاي جاساي ما، بۇل دەگەنىڭىز اۋىر كۇنا عوي؟!  مەن تۋعان باۋىرىمنىڭ وسىلاي جاساپ كەتكەنى ءۇشىن كۇن ەكى جىل بويى جىلاپ كەلە جاتىرمىن. سىزدەردەن كومەك سۇراۋ سوڭعى ءۇمىتىم بولىپ وتىر»،-دەدى ايگۇل مىڭجانوۆا.