شىعىس قازاقستان وبلىسىندا ەكىنشى مارتە #Birge #TazaQazaqstan اتتى ەكولوگيالىق اكسيا ۇيىمداستىرىلدى. وسى ۋاقىت ارالىعىندا وڭىردەگى سۋ قويمالارى مەن جاقىن ماڭداعى دەمالىس ورىندارىنان بىرنەشە توننا قوقىس شىعارىلدى. بۇل جولعى اكسياعا 30 مىڭنان استام ادام جينالدى، –  دەپ حابارلايدى Qamshy.kz اقپارات اگەنتتىگى.

اتالمىش ەكولوگيالىق چەللەندجگە ەڭ كوپ جينالعان سەمەي قالاسىنىڭ تۇرعىندارى بولدى. وسىلايشا اكسياعا 13 مىڭ سەمەيلىك تۇرعىن قاتىسىپ، قالا اۋماعىن تازارتۋ جۇمىستارىنا بەلسەنە قاتىستى.

ەكىنشى ورىندى 7350 ادام جينالعان وسكەمەن قالاسىنىڭ تۇرعىندارى الدى. ال ءۇشىنشى ورىندا التاي اۋدانى تۇر. بۇل اۋداندا وتكەن اتالمىش اكسياعا 2312 تۇرعىن قاتىستى.

ايتا كەتەيىك، وڭىردەگى 70 وبەكتىسى قوقىستان تازارتىلدى. ونىڭ ىشىندە ءۇلبى وزەنىنىڭ جاعالاۋى مەن ەرتىس، شاعان، قاراشوقى، اياگوز، جاناما، سونداي-اق الايعىر، بالىقتىكول وزەنى مەن شالقار سىندى باسقا دا جاعالاۋلار بار.

بۇگىن شىعىسقازاقستاندىقتار 740 توننا نەمەسە 2960 شارشى مەتردەن استام قوقىس جينادى. اكسيا اعىمداعى جىلدىڭ قىركۇيەك ايىنىڭ سوڭىنا دەيىن ءار اپتا سايىن ۇيىمداستىرىلىپ تۇرادى.

وبلىس تۇرعىندارى وسى ۋاقىت ارالىعىندا وڭىردەگى قورشاعان ورتاعا تازارتۋ جۇمىستارىن تولىق جۇرگىزىپ، ەكولوگيالىق احۋالدى جاقسارتا الاتىندارىنا سەنىمدى.

– ونكولوگ دارىگەر رەتىندە قورشاعان ورتانىڭ تازالىعى ادامزاتتىڭ دەنساۋلىعىنا ايتارلىقتاي پايداسىن تيگىزەتىنىن بىلەمىز. سوندىقتان ءبىز بۇل ەستافەتانى ەرەكشە قۇلشىنىسپەن قابىلداپ، وعان ءار اپتا سايىن قاتىساتىن بولامىز. مەنىڭشە، بۇل قازاقستاننىڭ اۋماعىن قوقىستان تازارتىپ قانا قويماي، ادامداردىڭ مادەنيەتىن دە كوتەرەدى، – دەيدى شىعىس قازاقستان وبلىستىق كوپسالالى ونكولوگيا جانە حيرۋرگيا ورتالىعى ديرەكتورىنىڭ ورىنباسارى ارمان مۇقاجانوۆ.

ەستەرىڭىزگە سالا كەتەيىك، #Birge #TazaQazaqstan اكسياسى شىعىس قازاقستان وبلىسىندا 27 شىلدە كۇنى باستاۋ الدى. ءبىر كۇننىڭ ىشىندە 800 توننادان استام قوقىس جينالدى.