كەزدەسۋگە نۇر-سۇلتان قالاسىنان «تۋريستىك قامقور» كورپوراتيۆتىك قورىنىڭ ديرەكتورى اسىلحان ەسىلوۆ قاتىسىپ، شەتەلدەرگە شىعۋدىڭ ماسەلەلەرىن قوزعادى، دەپ حابارلايدى Qamshy.kz اقپارات اگەنتتىگى.

بۇگىندە «تۋريستىك قامقور» كورپوراتيۆتىك قورىنىڭ ماماندارى شەتەلدەرگە ساياحات جاساۋعا قۇمار وتاندىق تۋريستەردىڭ قاۋىپسىزدىگىن قامتاماسىز ەتۋ ماقساتىندا ساقتاندىرۋ جۇيەسىن ەنگىزگەن. قوردىڭ نەگىزگى مىندەتى – تۋروپەراتوردىڭ قارجىلىق دارمەنسىزدىگى سەبەبىنەن شۇعىل جاعدايعا تاپ بولعان شەتەلدەگى قازاقستاندىق تۋريستتەرگە شۇعىل كومەك كورسەتۋ.

– بۇل جۇيە چارتەرلىك رەيسپەن ۇشاتىن تۋريستەر ءۇشىن ءتيىمدى. ءبىزدىڭ مەكەمەدەن بيلەت العان كەزدە تۋر-پاكەتپەن بىرگە بەرىلەدى. ال جولاۋشى بيلەتتى ءوز ساتىپ العان جاعداي، اگەنتتىك ونىڭ قوناق ۇيدەگى جاتىن ورنىن عانا تولەپ بەرەدى. سول سياقتى جاعداي ءتۋريستتىڭ قازاقستانعا ورالا المايتىنى جونىندە ماسەلە بولمايدى. بۇگىندە زاڭعا سايكەس «تۋريستىك قامقور» قورىنىڭ جارناسىنا چارتەرلىك جانە تۇراقتى رەيستەر دە كىرەدى. ەگەر تۇراقتى رەيسپەن ادامدى قايتارا الماساق، وندا باعىتقا بيلەتتەردى ساتىپ العان اۆياكومپانيا وكىلدەرى بۇل قىزمەتتى جۇزەگە اسىرا الادى. ءقازىر ءبىز تۋريستەرگە ىڭعايلى بولۋ ءۇشىن زاڭعا وزگەرىستەر ەنگىزىپ، تۇراقتى رەيسكە بيلەت العان جولاۋشىنىڭ «تۋريستىك قامقور» كورپوراتيۆتىك قورىنا قوسىمشا جارنا اۋدارماسى ءۇشىن جاعداي جاساۋدى جوسپارلاپ وتىرمىز، – دەدى ​ «پرەمەر تۋر» كومپانياسىنىڭ ديرەكتورى ۆالەريا توپولنياك.

ۆالەريا توپولنياك ايتۋىنشا، ەگەر جولاۋشى 0،5 اەك تولەسسە، تۋريست تە، تۋر-وپەراتور دا قوسىمشا قارجىلىق قيىندىقتان قۇتىلادى.

– بۇگىنگى جيىندا ايتىلعان ماسەلەلەردى تۋر-وپەراتورلاردىڭ اسسوسياسياسىندا كوتەرەتىن بولامىز. ەڭ الدىمەن، ءبىز زاڭ شەڭبەرىندە جۇمىس ىستەۋ كەرەگىن ءتۇسىنۋىمىز كەرەك. ءبىزدىڭ تاراپتان زاڭعا وزگەرىستەر ەنگىزۋ تۋرالى ۇسىنىستاردى عانا ايتۋ قولدان كەلەدى. مالىمەتتەرگە سۇيەنسەك، تۋريستەردىڭ دەنى تۋر-اگەنتتىكتەرگە ءوز بيلەتتەرىمەن بىرگە كەلەدى. سونىڭ سالدارىنان ولار بارلىق شارۋانى رەتكە كەلتىرۋدى ءوز قولدارىنا الادى. ونلاين-تۋريزم سالاسىندا ىلگەرىلەۋشىلىك بايقالمايدى. مۇنىڭ باستى سەبەبى – اگەنتتىكتەر اراسىنداعى باسەكەلەستىكتىڭ تومەندەگىندە جاتىر. شەتەلگە شىققىسى كەلەتىن ازاماتتار ۇيدە وتىرىپ، ينتەرنەتتى قولدانا سالۋدىڭ ورنىنا سول بۇرىنعىشا اگەنتتىككە كەلەدى، – دەدى «تۋريستىك قامقور» كورپوراتيۆتىك قورىنىڭ ديرەكتورى اسىلحان ەسىلوۆ.

​جيىن بارىسىندا اسىلحان ەسىلوۆ ەلىمىزدەگى 50-55 تۋر-وپەراتوردىڭ «تۋريستىك قامقور» قورىنىڭ قۇرامىنا كىرمەگەنىن اتاپ ءوتتى. سونداي-اق كوپتەگەن تۋريستىك كومپانيالار وپەراتورلىق ليسەنزيالارى جوق بولعانىنا قاراماستان بۇل سالادا ەڭبەك ەتىپ جۇرگەنىن ايتتى. بۇل وسى اگەنتتىكتەردىڭ كومەگىنە جۇگىنگەن تۋريستەردىڭ قۇقىعى قورعالمايتىنىنان حابار بەرەدى. بۇدان بولەك تۋريستىك اگەنتتىكتەردىڭ دەنى مەملەكەتتىك تىزىمدە تىركەلمەپتى. ءقازىر مۇنداي اگەنتتىكتەرمەن كۇرەس جۇرگىزىلۋدە.