جاڭا وقۋ جىلى باستالاردىڭ الدىندا ەلىمىزدە جىل سايىن ءداستۇرلى تۇردە ءبىلىم سالاسىنىڭ قىزمەتكەرلەرى باس قوسىپ، تامىز كونفەرەنسياسىن وتكىزەدى. وندا وڭىرىمىزدەگى ءبىلىم جۇيەسىنىڭ وتكەن وقۋ جىلىنىڭ قورىتىندىلارى ايتىلىپ جانە كەلەشەكتەرى بەلگىلەنەدى، دەپ حابارلايدى شقو اقپارات ورتالىعى.

 

شىعىس قازاقستان وبلىسىندا وتكەن پلەنارلىق وتىرىستىڭ جۇمىسىنا ايماق باسشىسى دانيال احمەتوۆ پەن ق ر ءبىلىم جانە عىلىم مينيسترلىگىنىڭ وكىلدەرى، جوعارى وقۋ ورىندارىنىڭ رەكتورلارى مەن مۇعالىمدەر قاتىستى.

 

جينالىس باستالماس بۇرىن دەلەگاسيا وكىلدەرى شىعىس قازاقستان وبلىسىنىڭ اكىمىمەن بىرگە start-up كورمەسىن تاماشالاپ، «Digital East – بولاشاققا قادام 2019» اتتى حالىقارالىق IT-فورۋمدا وبلىس اكىمىنىڭ گرانتىنا ۇسىنىلعان ۇسىنىلعان جوبالارمەن تانىستى. سونداي-اق كوللەدج ستۋدەنتتەرىنىڭ قولىننان شىققان اعاش پەن مەتاللدان جاسالعان قۇرال-جابدىقتاردىڭ كورمەسىن كورىپ، «WorldSkills» سايىسىنىڭ حالىقارالىق تالاپتارىنا سايكەس كەلەتىن «مەحاترونيكا» لابوراتياسىن تاماشالادى. وبلىستىق مامانداندىرىلعان ماتەماتيكا، ينفورماتيكا فيزيكا سالاسىنداعى دارىندى بالالارعا ارنالعان مەكتەپتىڭ وقۋشىلارى جوبالاردىڭ ءبىرىن تانىستىردى. ولار وقىتۋ كەشەنىنە دروندى باعدارلامالاۋ مەن مەكتەپتەگى روبوتتى تەحنيكا كۋرسىنا ۇشۋ اپپاراتتارىن پيلوتسىز رەجيمدە باسقارۋدى ەنگىزۋدى ۇسىندى. ءوز كەزەگىندە بالالاردى مۇقيات تىڭداعان دانيال احمەتوۆ، وبلىستاعى ءاربىر مەكتەپكە درون ساتىپ الىناتىنىن جانە وسى كۋرستىڭ جۇرگىزىلەتىنىن اتاپ ءوتتى. بۇدان بولەك جيىن بارىسىندا ءبىلىم باسقارماسىنىڭ باسشىلىعىنا الگوريتيمدىك ويلاۋدى دامىتۋ ماقساتىندا باعدارلامالاۋدى ءارتۇرلى تىلدە جۇرگىزۋدى تاپسىردى. سونداي-اق كومپيۋتەرلىك جۇيەنى زاماناۋي ءبىلىم بەرۋ جۇيەسىنە قاراي يكەمدەۋدى جۇكتەدى.  ال مۇعالىمدەر قوسىمشا كۋرستارعا بارىپ، IT–باعىتى بويىنشا بىلىمدەرىن جەتىلدىرەتىن بولادى. ايتا كەتەيىك، سوڭعى ەكى جىلدىڭ كولەمىندە 1125 ءمۇعالىم كۋرستان ءوتىپ، بارلىق 655 مەكتەپ جاڭا كومپيۋتەرلەر مەن ينتەراكتيۆتى قۇرالدارمەن جابدىقتالدى. سونداي-اق تەحنيكالىق جانە كاسىپتىك ءبىلىم بەرۋ جۇيەسىنە باسا نازار اۋدارىلۋدا. كەلەسى جىلى World Skills ستاندارتى بويىنشا كوللەدجدەردى جابدىقتاۋ جۇمىستارى جالعاسىن تابادى. وعان «جاس مامان» رەسپۋبليكالىق جوباسىنىڭ رەسۋرستارى تارتىلادى. بۇل ماقساتتا وبلىستا تەحنيكالىق جانە كاسىپتىك ءبىلىم بەرۋ جۇيەسىن دامىتۋ ءۇشىن كەشەندى جوسپار ازىرلەنگەن. سوعان سايكەس تەحنيكالىق جانە كاسىپتىك ءبىلىم بەرۋ سالاسىنىڭ ماڭىزى ارتاتىن بولادى. ەستەرىڭىزگە سالا كەتەيىك، 23،8 مىڭ تۇلەكتىڭ 6،7 مىڭى نەمەسە 30 پايىزى كوللەدجدەردە وقۋعا نيەت بىلدىرگەن. ال بيىلعى وقۋ جىلىندا 7،9 مىڭ بالا كوللەدجدەردە تەگىن ءبىلىم الۋعا مۇمكىندىك الدى. ونىڭ ىشىندە وتكەن جىلى وقۋ بىتىرگەن جاستار دا بار. وسى ماقساتتا وبلىستىق بيۋدجەتتەن قاجەتتى مامانداردى دايارلاۋ ءۇشىن مەملەكەتتىك تاپسىرىستى ورىنداۋعا 6،2 مىڭ ورىن ءبولىندى. بۇدان بولەك رەسپۋبليكالىق بيۋدجەتتەن ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى اياسىندا 1730 ورىن قاراستىرىلعان. الايدا جيىن بارىسىندا ايماق باسشىسى مەملەكەتتىك تاپسىرىس بويىنشا وقىتىلاتىن ماماندىقتارعا سۇرانىس جوق ەكەنىن ايتا كەلە، ءوڭىر ەكونوميكاسىن دامىتۋ جولىندا وسى سالانىڭ قىزمەتكەرلەرى قاجەت بولاتىنىن اتاپ ءوتتى.  ماسەلەن بيىل ەلەكتر جابدىقتارىن جوندەيتىن ەلەكتر-سلەسار، ماشينيست، تراكتوريست، تەحنيك-تەحنولوگ سىندى جۇمىسشى ماماندىقتارعا وقيتىن ستۋدەنتتەردىڭ از بولىپتى. سونداي-اق مۇنداي جاعداي جوعارى وقۋ ورىندارىندا دا ورىن العان. مىسالى ماتەماتيكا، فيزيكا پاندەرىنىڭ مۇعالىمدەرى مەن ۆەتەرينار، وسىمدىك شارۋاشىلىعى، مال شارۋاشىلىعى سالاسى بويىنشا وقۋعا بىردە-بىر تۇلەك نيەت بىلدىرمەپتى. سول سەبەپتەن جاڭا وقۋ جىلىنان باستاپ قالا مەن اۋدان اكىمدەرى، ءبىلىم باسقارماسى، جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسى وڭىردەگى جوو-مەن بىرلەسىپ، كاسىبي باعدارلاۋ جۇمىستارىن قولعا الۋدى جوسپارلاپ وتىر. وسىلايشا، مەملەكەتتىك تاپسىرىس نەگىزىندە وقىتىلاتىن سۇرانىسقا يە ماماندىقتارعا دەگەن وقۋشىلاردىڭ قىزىعۋشىلىعىن وياتپاق.

 

 

وڭىردەگى مەكتەپتەردە جاڭارتىلعان مازمۇنداعى ءبىلىم بەرۋ جۇيەسىنە كوشۋ ىسىنە باسا نازار اۋدارىلۋدا. بۇل باعىتتا دا اۋقىمدى جۇمىستار اتقارىلدى. ماسەلەن 5 379 ءمۇعالىم كۋرستان ءوتىپ، جاڭارتىلعان مازمۇنداعى 1،5 ميلليون وقۋلىق ساتىپ الىندى. قورىتا ايتقاندا، سوڭعى ءتورت جىلدىڭ كولەمىندە 25 مىڭنان استام ءمۇعالىم جاڭارتىلعان باعدارلاما بويىنشا كۋرستان ءوتتى. سونىمەن قاتار ءۇش ءتىلدى ءبىلىم بەرۋ باعدارلاماسى بويىنشا دا جۇمىستار اتقارىلۋدا. ايماق باسشىسى، 2019-2021 جىلدارى كوپتىلدىلىكتى دامىتۋ ماقساتىندا كەشەندى جوسپار جاسالعانىن اتاپ ءوتىپ، اتالمىش باعدارلاما اياسىندا فرانسۋز، نەمىس تىلدەرى دە وقىتىلاتىنىن جەتكىزدى. الداعى ۋاقىتتا مەكتەپكە دەيىنگى، جالپى ورتا،  تەحنيكالىق جانە كاسىپتىك ءبىلىم بەرۋ جۇيەسىندە ساباق بەرەتىن 3700 ءمۇعالىم قايتا دايارلاۋدان وتەدى.

 

سونداي-اق ءبىلىم بەرۋ كەشەندەرىنىڭ ينفراقۇرىلىمىن دامىتۋ دا اكتۋالدى بولىپ تۇر. 2022 جىلعا دەيىن رەسپۋبليكالىق بيۋدجەتتىڭ ەسەبىنەن  3،6 مىڭ ورىنعا ارنالعان بەس مەكتەپ سالىنادى. بۇل نىساندار سەمەي، ريددەر قالالارى مەن اباي اۋدانى قاراۋىل اۋىلىندا بوي كوتەرەدى. اعىمداعى جىلى 2900 ورىندىق ەكى مەكتەپ قولدانىسقا بەرىلەدى. سونىڭ ءبىىر وسكەمەندە سالىنسا، ەكىنشىسى تارباعاتاي اۋدانى، اقجار اۋىلىندا سالىنادى. بۇدان بولەك جوسپارعا سايكەس سەمەيدەگى مەكتەپتىڭ يننوۆاسيالىق جوباسى قولعا الىنادى. وندا وقۋشىلار الەمدەگى ۇزدىك تەحنولوگيالاردى مەڭگەرەدى. ال وبلىس ورتالىعىندا 700 ورىندىق مامانداندىرىلعان دارىندى بالالارعا ارنالعان ماتەماتيكا مەكتەبى بوي كوتەرەدى. ونىڭ ىشىندە 320 بالا اۋداندار مەن قالالاردان كەلەدى. 

 

تامىز كونفەرەنسياسىنىڭ سوڭىندا دانيال احمەتوۆ شىعىس قازاقستان وبلىسىنداعى ءبىلىم بەرۋ سالاسىنىڭ ۇزدىك قىزمەتكەرلەرىن ماراپاتتادى. كوكپەكتى اۋدانى، سامار اۋىلىنداعى ج.بولعانبايەۆ ورتا مەكتەپ-ليسەيىنىڭ ۇجىمى 2019 جىلدىڭ ەڭ ۇزدىك ءبىلىم بەرۋ مەكەمەسى اتاندى. مەكتەپ ديرەكتورى بايان باعيسوۆاعا اتالمىش مەكەمەنى دامىتۋ ماقساتىندا 34 ميلليون تەڭگەنىڭ سەرتيفيكاتى ۇسىنىلدى. «تەحنيكالىق جانە كاسىپتىك ءبىلىم بەرۋ جۇيەسىندەگى ەڭ ۇزدىك ۇيىمى» اتالىمىن سەمەيدەگى ەلەكتروتەحنيكالىق كوللەدجدىڭ ۇجىمى جەڭىپ الدى. كوللەدج ديرەكتورىنا 34 ميلليون تەڭگەنىڭ سەرتيفيكاتى تابىستالدى. ال اياگوز اۋدانىنداعى س.عابباسوۆ ورتا مەكتەبىنىڭ اعىلشىن ءتىلى ءپانىنىڭ ءمۇعالىمى باحتيگۇل اسىلحانوۆاا «ۇزدىك ترەنەر 2019» اتالىمىن يەلەنىپ، 500 مىڭ تەڭگە كولەمىندە سىياقى الدى. بۇدان بولەك 10 مۇعالىمگە وسكەمەندە سالىنعان ۇيلەردىڭ كىلتتەرى تابىستالدى.