بۇل تۋرالى ق ر سيفرلىق دامۋ، يننوۆاسيالار جانە اەروعارىش ونەركاسىبى ءبىرىنشى ۆيسە-مينيسترى جاسلان مادييەۆ فەيسبۋك پاراقشاسىندا ءبولىستى. ونىڭ ايتۋىنشا، قازاقستاندىق Higgelsfid AI ستارتاپى $ 100 ملن-عا باعالانعان. 

"$ 100 مل باعالاناتىن قازاقستاندىق Higgelsfid AI ستارتاپى جاساندى ينتەللەكت تەحنولوگيالارىن پايدالانىپ، تولىقتاي ماتىننەن ۆيدەو جاسادى. ۆيدەونىڭ ساپاسىنا نازار اۋدارىڭىز. ولاردىڭ پلاتفورماسىندا ءقازىردىڭ وزىندە سەريالدار شىعارىلۋدا – وزىندىك «قالتاداعى گولليۆۋد»" دەپ جازدى ول. 

ال "Higgsfield" كومپانياسىنىڭ باس ديرەكتورى ەرزات دۋلات كومپانيانىڭ ماقساتى وزىق تەحنولوگيالاردى ازىرلەپ، قازاقستاننىڭ جاھاندىق ەكونوميكاداعى پوزيسيالارىن نىعايتۋ ەكەنىن ايتادى.

"ءبىزدىڭ كوماندامىزدا 22 AI-ينجەنەر جۇمىس ىستەيدى. ولار قازاقستانداعى جوعارى وقۋ ورىندارىنىڭ تۇلەكتەرى. اراسىندا 6 حالىقارالىق فيزيكا جانە ماتەماتيكا وليمپيادالارىنىڭ جەڭىمپازدارى بار. ادەتتە، وسىنداي ماماندار شەتەلگە كەتىپ قالادى، ءبىراق ءقازىر ولار ەلىمىزدىڭ يگىلىگى ءۇشىن ەڭبەك ەتىپ جاتىر. اۋىز تولتىرىپ ايتار جەتىستىكتەرىمىز دە كوپ. ءبىزدىڭ نەيروجەلىلەر 512 GPU NVIDIA بار سۋپەركومپيۋتەردە 9 پەتابايت كولەمىندەگى دەرەكتەر جيىنتىعىندا وقىتىلدى. 9 اي ىشىندە ءبىز ەكى ءونىمدى ىسكە قوستىق. ولار حالىقارالىق دەڭگەيدە مويىندالدى. بۇل جەتىستىكتەر بىزگە Google نۇسقاسى بويىنشا الەمدەگى ۇزدىك 25 ستارتاپ قاتارىنا كىرۋگە مۇمكىندىك بەردى، - دەيدى.