جاپونيا ۇكىمەتى سارسەنبى كۇنى تاڭدا تولىق قۇرامدا دوعارىسقا كەتتى دەپ حابارلايدى Qamshy.kz اقپارات اگەنتتىگى ريا نوۆوستي سايتىنا سىلتەمە جاساپ.
جاپونيا پرەمەر-مينيسترى سيندزو ابە ءوز كابينەتىنىڭ مۇشەلەرىنەن دوعارىسقا كەتۋ تۋرالى ارىزدارىن قابىل الدى. بۇعان شىلدە ايىنداعى پارلامەنتتىڭ جوعارعى پالاتاسىنداعى سايلاۋ كەزىندە جەڭىسكە جەتكەن ابەنىڭ الدىن الا جوسپارلاعان بيلىك قۇرامىن وزگەرتۋى مەن قازان ايىندا تۇتىنۋشىلار سالىعىن 10 پايىزعا دەيىن كوتەرەمىز دەگەنى سەبەپ بولعان.
بىلتىر قازان ايىنداعى ۇكىمەتتىڭ ءاۋىس-تۇيىس كەزىندە كوپتەگەن مينيسترلەر ءوز ورىندارىن ساقتاپ قالعان بولاتىن. بيىل تەك ۇكىمەتتىڭ باس حاتشىسى ەسيحيدە سۋگا مەن قارجى ءمينيسترى تارو اسو قالدى.
جاپوندىقتاردىڭ ايتۋىنشا، "كولدەنەڭ بويىنشا" ەكى مينيستر ءوزارا ورىن الماستىرادى – ءسىم باسشىسى تارو كونو ەكونوميكا ءمينيسترى بولادى، ال ءسىم باسشىلىعىنا ەكونوميكانى قايتا قالپىنا كەلتىرۋ ءمينيسترى توسيميسۋ موتەگي كەلەدى.
بۇرىن دا مينيستر بولعان تاعى ەكى ادام جاڭا ۇكىمەت مۇشەلىگىنە قوسىلادى،قالعان ون ءۇش ادام ەڭ العاش رەت مينيسترلىك قۇرامعا وتەدى.
تۇستەن كەيىن جاڭا ۇكىمەت مۇشەسىنىڭ ءتىزىمى جاريالانادى دەپ كۇتىلۋدە. كەشكە تامان ولاردى يمپەراتور سالتاناتتى تۇردە بەكىتەتىن بولادى. سودان كەيىن عانا ۇكىمەت مۇشەسى رەسمي تۇردە جاساقتالدى دەپ ەسەپتەلەدى.
پىكىر قالدىرۋ