بۇگىن "شىعىس" وڭىرلىك قولباسشىلىعىنىڭ "شىعىس" وقۋ ورتالىعىنىڭ ساپتىق الاڭىندا "شىعىس-2019" جەدەل-تاكتيكالىق كوماندالىق-شتابتىق وقۋ-جاتتىعۋدىڭ سالتاناتتى اشىلۋ ءراسىمى ءوتتى، دەپ حابارلايدى Qamshy.kz اقپارات اگەنتتىگى. بۇل جونىندە شقو اقپارات ورتالىعى جازادى.
ماقساتى – قاتارداعى جاۋىنگەرلەردىڭ دايىندىعىن تەكسەرۋ جانە وڭىردەگى بەيبىتشىلىكتى ساقتاۋ ءۇشىن رەسەيلىك جانە قازاقستاندىق اسكەري قىزمەتشىلەردىڭ ءوزارا ءىس-قيمىل دەڭگەيىن ارتتىرۋ.
وعان 4000-عا جۋىق اسكەري قىزمەتشىلەر قاتىسىپ، ءبىر جارىم مىڭنان استام قارۋ-جاراق پەن اسكەري تەحنيكا جۇمىلدىرىلدى.
– رەسەي فەدەراسياسى مەن قازاقستان رەسپۋبليكاسى اراسىندا قالىپتاسقان ءوزارا قارىم-قاتىناستار اسكەري ىنتىماقتاستىقتىڭ كوپ جىلعى تاريحىنا يە. بۇگىن باستالعان وقۋ-جاتتىعۋ ەكى وداقتىق مەملەكەتتىڭ ۇلتتىق قاۋىپسىزدىگىن قامتاماسىز ەتۋ بويىنشا تىعىز قارىم-قاتىناستاردىڭ جارقىن ايعاعى بولىپ تابىلادى. ءاربىر سارباز ءوز كاسىبيلىگىن، ورتاق قاۋىپ-قاتەرلەرگە قارسى تۇرا ءبىلۋىن كورسەتۋ كەرەك، – دەيدى رف قارۋلى كۇشتەرى اسكەرلەرىنىڭ كومانديرى سەرگەي ميلچاكوۆ.
وقۋ-جاتتىعۋ ءۇش كەزەڭدە وتەدى: اسكەرلەردى جاۋىنگەرلىك ازىرلىككە دايىنداۋ، بىرلەسكەن ارنايى اسكەري وپەراسيانى وتكىزۋ.
وسىنداي وقۋ-جاتتىعۋلار ەلىمىزدىڭ بىرنەشە وڭىرىندە ءبىر ۋاقىتتا باستالدى. قازاقستاننىڭ وڭتۇستىگىندە تاۋ-كەن بولىمشەلەرىمەن، ال قاراعاندى وبلىسىنىڭ اۋماعىندا زىمىراندىق-ارتيللەريالىق بولىمشەلەرمەن قاتار وتۋدە.
قولباسشىلىق اتاپ وتكەندەي، اتالمىش وقۋ-جاتتىعۋلاردى وتكىزۋ قاتىسۋشى مەملەكەتتەردىڭ قارۋلى كۇشتەرىن قولدانۋمەن بايلانىستى ءبىرقاتار ماسەلەلەردى زەرتتەۋگە مۇمكىندىك بەرەدى.
حالىقارالىق اسكەري ىنتىماقتاستىق شەڭبەرىندە قازاقستاننىڭ قارۋلى كۇشتەرى تۇراقتى نەگىزدە ورتالىق ازيا ەلدەرى – قىرعىزستان، وزبەكستان جانە تاجىكستان، سونداي-اق رەسەي، بەلورۋس، ءۇندىستان، تۇركيا جانە باسقا دا مەملەكەتتەر بىرلەسكەن وقۋ-جاتتىعۋلارعا قاتىسادى. وتكەن جىلى قازاقستان اسكەري قىزمەتشىلەرى وننان استام حالىقارالىق وقۋ-جاتتىعۋلارىنا قاتىستى.
پىكىر قالدىرۋ