سەمەيدىڭ قالالىق "دوستىق" ۇيىندە زيالى قاۋىم وكىلدەرىنىڭ، دەپۋتاتتاردىڭ قاتىسۋىمەن دوڭگەلەك ۇستەل بولىپ ءوتتى. كەزدەسۋ بارىسىندا قالانىڭ سول جاعالاۋىندا جاڭادان سالىنىپ جاتقان مەشىت قۇرىلىسى جانە ونى اباتتاندىرۋ جۇمىستارى سونداي-اق،  قاتىم تۇسىرگەندە، قوناق اسى بەرىلگەندە قويىلاتىن اس مازىرىنە قاتىستى ماسەلەلەر قوزعالدى.

جاڭا مەشىت قۇرىلىسى 2008 جىلى باستالىپ، ءتۇرلى سەبەپتەرمەن جۇمىستار توقتاتىلعان بولاتىن. الايدا، جەكە كاسىپكەرلەردىڭ دەمەۋشىلىگىمەن مەشىت قۇرىلىسى قايتا جانداندى.  بۇگىندە مەشىتتىڭ سىرتقى بولىگىن جوندەۋ جۇمىستارى جالعاسۋدا. مەشىت 2000 ادامعا ارنالعان. 700 كولىككە اۆتوتۇراق قاراستىرىلىپ، 2 شاعىن اسپالى كوپىر سالۋ جوسپارلانۋدا. جيىندا قاتىمحانا سالۋ جانە اس ءمازىرىن رەتكە كەلتىرۋ دە ءسوز بولدى.

– قالا بويىنشا 11 مەشىتتىڭ 9 قاتىمحاناسى بار. تولەۋبەك قاجى مەشىتىندەگى قاتىمحانا 300 ادامعا ارنالعان. ايتپاعىم، قوناق اسى كەزىندەگى ىسىراپشىلىق. اس نەگىزىنەن الىستان كەلگەن اعايىنعا بەرىلەدى. الايدا،  بارلىق ادامنىڭ قوناق اسىن بەرۋگە جاعدايى كەلە بەرمەيدى. سوندىقتان، بارشالارىڭىزدى  قاتىم كەزىندە استامشىلىققا جول بەرمەۋلەرىڭىزدى سۇرايمىن، –دەدى سەمەي قالاسىنىڭ ورتالىق مەشىتىنىڭ نايب يمامى ەرلان دوسىم ۇلى.

سەمەي قالاسىنىڭ اقپاراتتىق ورتالىعى