سەمەي قالاسىنىڭ №20 مەكتەبىندە پەداگوگيكالىق-پسيحولوگيالىق تۇزەتۋ ورتالىعى اشىلدى. بۇل جەردە پسيحولوگيالىق دامۋى تەجەلگەن بالالار ءبىلىم الادى. ارنايى ساباقتارعا قاتىسىپ، ءىس-شارالاردا بەلسەندىلىك تانىتادى، دەپ حابارلايدى Qamshy.kz اقپارات اگەنتتىگى. 

رەسۋرستىق ورتالىق  مەملەكەت جانە ۇكىمەتتىك ەمەس سەكتورلاردىڭ سەرىكتەستىگىمەن اشىلدى. سونىمەن قاتار، جەرگىلىكتى اتقارۋشى ورگاندار بۇل ىسكە جوعارى قىزىعۋشىلىق تانىتىپ،  ارنايى ورىن دايىنداپ بەرگەن. ال، "دارا" قورى قولداۋىمەن بولىنگەن جەردىڭ ىشكى بەيىمدەۋ جۇمىستارى جۇرگىزىلىپ، قاجەت جابدىقپەن جابدىقتالعان.

بۇل مەكتەپ قالا بويىنشا ينكليۋزۆتى ءبىلىم بەرۋدى  ءبىرىنشى بولىپ ەنگىزگەن. 2013 جىلى مۇندا تۇڭعىش تۇزەتۋ سىنىبى اشىلعان. ءقازىر  ءبىرىنشى-توعىزىنشى سىنىپ ارالىعىندا ەكى بالادان وقيدى. ال، وزگە وقۋشىلار بۇل بالالارعا كوڭىل ءبولىپ، ءاردايىم كومەكتەسۋگە ءازىر ەكەندىكتەرىن ءبىلدىردى.

مەكتەپ ديرەكتورى روزالينا راحيموۆانىڭ ايتۋىنشا، بۇل تەك بالالاردى جاقىنداستىرىپ، سەنىمدىلىك بەرەدى. باستىسى شىنايى قولداۋ مەن كومەك ءبىلدىرۋ كەرەك.

– رەسۋرستىق ورتالىعىندا كومەكتى بالالار عانا ەمەس، اتا-انالار دا الا الادى. مۇندا دەفەكتولوگ، پسيحولوگ، لوگوپەد ماماندارى جۇمىس ىستەيدى. جينالعان كوپ ادىستەمەلىك ماتەريالدار بار. ارنايى بىلىكتى ماماندار  اتا-انالارعا قاجەتتى ومىرلىك داعدىلار تۋرالى تۇسىنىك بەرەدى، – دەيدى روزالينا بەيسەن قىزى.

رەسۋرستىق ورتالىقتاعى ينكليۋزيۆتى ءبىلىم بەرۋ – بۇل  بالانىڭ ءبىلىم الۋىنا، ورتاعا بەيىمدەلۋىنە زور ىقپال ەتەدى.  ەگەر قاجەت بولسا، بالا جەكە ۇستازبەن وقۋ باعدارلامالارىن پىسىقتاي الادى. ۇستازدار اتا-انالارمەن بىرىگىپ، بالانىڭ جاعدايىن بىرگە جاسايتىن بولادى.

سەمەي قالاسىنىڭ  اقپاراتتىق ورتالىعى