25 قىركۇيەكتە قىتايدىڭ مەملەكەتتىك Xinhua جاڭالىقتار اگەنتتىگىنىڭ سايتى "China، Kazakhstan reaffirm commitment to strengthening ties" - "جۇڭگو مەن قازاقستان قارىم-قاتىناسىن نىعايتا تۇسپەك"، - دەپ جازدى.
جۇڭگو پارلامەنتىنىڭ سپيكەرى لي چجانشۋ 21-25 قىركۇيەك ارالىعىندا ارنايى شاقىرتۋمەن قازاقستانعا كەلگەن بولاتىن. 23 قىركۇيەك كۇنى ق ر تۇڭعىش پرەزيدەنتى نۇرسۇلتان نازاربايەۆپەن كەزدەستى. كەيىننەن قازاقستان سەناتىنىڭ سپيكەرى داريعا نازاربايەۆا مەن ءماجىلىس ءتوراعاسى نۇرلان نىعماتۋللينمەن كەزدەسۋ وتكىزدى.
لي چجانشۋ ءوز سوزىندە جۇڭگو مەن قازاقستان اراسىنداعى تۇراقتى ستراتەگيالىق سەرىكتەستىكتى دامىتىپ، بولاشاعى زور بايلانىس قۇراتىنى جونىندە ايتىپ ءوتتى. ەكى تاراپ تا ءتۇرلى سالالاردا ءوزارا ىنتىماقتاستىق ورناتىپ، سەرىكتەستىكتى كۇشەيتەتىنى تۋرالى مالىمدەدى.
ەكى ەل الداعى ۋاقىتتا ەنەرگەتيكا، اۋىل شارۋاشىلىعى، قارجى، تەحنولوگيا، ءبىلىم بەرۋ، سپورت، مادەنيەت جانە تۋريزم سالاسى بويىنشا ستراتەگيالىق ماقساتتا كەلىسىمدەرىن جاقسارتاتىندارى جونىندە ءسوز بولدى.
قازاقستان رەسپۋبليكاسىنىڭ پرەزيدەنتى قاسىم جومارت توقايەۆ قازاقستان ىلعيدا قىتايمەن دوستىق قارىم-قاتىناستا بولاتىنىن جانە ءبىزدىڭ ەل ءۇشىن قىتايدىڭ الەمدىك قاۋىپسىزدىك پەن تۇراقتىلىقتا الاتىن ورنى ەرەكشە ەكەنىنە اتاپ ءوتتى.
لي چجانشۋ ەكى ەلدىڭ زاڭ شىعارۋشى ورگانى قازاق-قىتاي اراسىنداعى ينۆەستيسيالاردى قورعاۋ تۋرالى پاكتىنى جاڭارتۋ كەرەك ەكەنىن، كەدەندىك رەسىمدەۋ جانە جۇمىسقا رۇقسات بەرۋ راسىمدەرىن جەڭىلدەتۋ جونىندە مالىمدەمە جاسادى.
قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ 11-12 قىركۇيەك كۇنى قىتايعا جاساعان ساپارى كەزىندە جۇڭگو پارلامەنتىنىڭ سپيكەرى لي چجانشۋ مىرزاعا: "ءسىزدىڭ قازاقستانعا ءۇش رەت كەلگەنىڭىزدى بىلەمىن. جاقىن ارادا ءسىز قازاقستانعا قايتا باراسىز. ءبىراق بۇل ساپارىڭىز بۇكىلقىتايلىق حالىق وكىلدەرى جيىنى تۇراقتى كوميتەتىنىڭ ءتوراعاسى رەتىندە بولاتىندىقتان، ونىڭ ءجونى دە بولەك بولماق. ءبىز ءسىزدىڭ ساپارىڭىزدى زور ىقىلاسپەن كۇتەمىز"، - دەگەن ەدى.
پىكىر قالدىرۋ