ەلىمىزدە بيۋدجەتتىڭ ءتيىمسىز ورىندالعانى ءۇشىن شەنەۋنىكتەردىڭ جاۋاپكەرشىلىگىن ارتتىرۋ ۇسىنىلدى. اتالمىش ۇسىنىس سەنات قابىرعاسىندا وتكەن بيۋدجەت زاڭناماسىن جەتىلدىرۋ جونىندەگى كەڭەس بارىسىندا ايتىلدى، - دەپ حابارلايدى جوعارى پالاتانىڭ باسپا ءسوز قىزمەتىنە سىلتەمە جاساپ Qamshy.kz اقپارات اگەنتتىگى.

دەپۋتاتتار الدىندا ۇلتتىق ەكونوميكا ءمينيسترى رۋسلان دالەنوۆ ءسوز الىپ، بيۋدجەت پروسەسىن رەفورمالاۋ جونىندەگى جول كارتاسىن تانىستىردى. مينيستر كوتەرگەن ماسەلەلەردىڭ ءبىرى – مەملەكەتتىك باعدارلامالار بويىنشا بولىنەتىن بيۋدجەت قارجىسىنىڭ ءتيىمسىز جۇمسالۋى بولدى.

«ءبىز 2011 جىلدان باستاپ 2018 جىلعا دەيىن جۇزەگە اسقان 10 مەملەكەتتىك باعدارلاماعا تالداۋ جۇرگىزدىك. ولار بويىنشا، جالپى العاندا، شامامەن 9 تريلليون تەڭگە يگەرىلدى، ءبىراق ءبىزدىڭ ويىمىزشا، بيۋدجەت 608 ميلليارد تەڭگەگە ءتيىمسىز يگەرىلدى. اتاپ ايتقاندا، كىرىس كوبەيمەگەن، جۇمىس ورىندارى اشىلماعان جانە تاعى باسقا. ءبىز مەملەكەتتىك قارجىنى ءتيىمسىز يگەرگەنى ءۇشىن، جاۋاپكەرشىلىك بەلگىلەۋ قاجەت دەپ سانايمىز. ال مەملەكەتتىك باعدارلامالاردى ىسكە اسىرۋ جونىندەگى ەسەپتەردى تولەنگەن سالىقتار، تابىستار، جاڭا جۇمىس ورىندارى، ءونىم شىعارۋ كولەمى جانە تاعى باسقا كورسەتكىشتەرمەن تولىقتىرۋ قاجەت»، - دەدى دالەنوۆ.

داريعا نازاربايەۆا مەملەكەتتىك باعدارلامالار اياسىندا قاراجاتتى ءتيىمسىز پايدالانعانى ءۇشىن جاۋاپكەرشىلىكتى كۇشەيتۋ جونىندە ۇسىنىستار ازىرلەۋ قاجەتتىگىن قولدادى.

«بىزدە كوبىنەسە ءبىر ادام تۇتاس سالانى باسقارادى، مەملەكەتتىك باعدارلامانى ازىرلەيدى، ال الدەبىر ۋاقىتتان كەيىن مۇنىڭ ءبارى ءتيىمسىز نەمەسە باسىمدىقتار قاتە تاڭدالعانىن، مەملەكەتتىك قازىناعا زالال كەلگەنىن كورەمىز. ءبىراق ەشكىمنەن سۇراي المايسىڭ. سەبەبى ماماندار اۋىسىپ، باسقا ادامدار كەلگەن بولىپ شىعادى. جاۋاپتى ادام دا جوق، يە دە جوق. ءبىزدىڭ تاجىريبەمىزدە قانشاما سونداي جاعداي كەزدەستى. سوندىقتان ءبىزدىڭ ۇسىنىسىمىز: جۇمىستىڭ اۋىسۋىنا قاراماستان، بۇرىنعى قىزمەتىنە جاۋاپتى بولۋ كەرەك»، - دەدى سەنات ءتورايىمى.

سونىمەن قاتار بيۋدجەتتى ءتيىمسىز پايدالانعانى ءۇشىن اكىمشىلىك ايىپپۇل مولشەرى فورمالدى بولماۋى ءتيىس، كەلگەن زيانعا شامالاس ەسەپتەلۋى ءتيىس.

دەپۋتاتتاردىڭ پىكىرىنشە، ونى تالقىلاۋ اسا ماڭىزدى بولادى. قازىرگى كەزدە سەنات دەپۋتاتتارى ەسەپ كوميتەتىمەن بىرلەسىپ، وسىنداي ايىپپۇلداردى اكىمشىلىك قۇقىق بۇزۋشىلىق تۋرالى كودەكسكە ەنگىزۋ ماسەلەسىن پىسىقتاۋدا.