قالا اكىمى باقىتجان ساعىنتايەۆ موحناتكا تاۋىنىڭ باۋرايىندا وتكەن ەكولوگيالىق اكسيانى باستاپ بەردى. مۇندا قىلقان جاپىراقتى اعاشتاردىڭ كوشەتتەرى وتىرعىزىلدى.

وزدەرىڭىزگە بەلگىلى، 2011 جىلى قاتتى داۋىلدىڭ ناتيجەسىندە موحناتكا تاۋىنداعى 480 گەكتار اۋماقتا جۇزدەگەن مىڭ اعاش قۇلاعان ەدى. جىل سايىن مۇندا تابيعي اعاشتار مەن بۇتالاردىڭ كوشەتتەرى وتىرعىزىلادى. ال بۇگىنگى اكسيا اياسىندا شرەنكا شىرشاسىنىڭ 50 مىڭعا جۋىق كوشەتى وتىرعىزىلدى.

بۇل شارانىڭ ماڭىزدىلىعىنا توقتالعان باقىتجان ساعىنتايەۆ اتالعان اكسيانىڭ قالا ەكولوگياسىن جاقسارتۋ مەن تابيعي تەپە-تەڭدىكتى ساقتاۋ ءۇشىن قاجەت ەكەندىگىن اتاپ ءوتتى.

«جاس شىبىقتاردى وتىرعىزۋ ارقىلى ءبىز تابيعاتتى قۇرمەتتەۋگە ۇيرەنەمىز. جاستاردىڭ بويىندا ەكولوگيالىق مادەنيەتتى قالىپتاستىرا وتىرىپ، قورشاعان ورتانى ايالاۋعا باۋليمىز»، – دەدى اكىم.

ونىڭ ايتۋىنشا، كەز-كەلگەن الماتىلىق ءوز اۋلاسىندا نەمەسە قالالىق ساياباقتا ءبىر اعاش وتىرعىزۋ ارقىلى قالاعا دەگەن سۇيىسپەنشىلىگى مەن قۇرمەتىن كورسەتە الادى. بۇگىن اكسياعا 500-دەن استام ادام قاتىستى. ولاردىڭ ىشىندە مادەنيەت قايراتكەرلەرى، ستۋدەنتتەر، ەرىكتىلەر جانە ىلە الاتاۋى ۇلتتىق پاركىنىڭ قىزمەتكەرلەرى بار. بۇعان دەيىن قالا اكىمىنىڭ تاپسىرماسى بويىنشا الماتىنى كوگالداندىرۋ بويىنشا اۋقىمدى جوبا جاسالعان بولاتىن. سوعان سايكەس ءۇش جىلدىڭ ىشىندە ميلليون اعاش وتىرعىزۋ جوسپارلانعان.

مامانداردىڭ ايتۋىنشا، قالادا 2 ميلليوننان استام اعاش بار. ءبىراق 500 مىڭعا جۋىعى اپاتتىق نەمەسە اۋرۋ اعاشتار. جاڭا الماتىنى، ونىڭ ىشىندە الاتاۋ جانە ناۋرىزباي اۋداندارىنداعى ىقشاماۋدانداردى كوگالداندىرۋعا ەرەكشە نازار اۋدارىلماق.