زياتكەر ۇرپاق – تەك ءبىلىمى تەرەڭ ازامات قانا ەمەس. ول قوعامداعى بولىپ جاتقان وقيعالاردان شەت قالماي، ءوزىنىڭ ازاماتتىق ۇستانىمىن تانىتا بىلەتىن، قاجەت جاعدايدا باستاماشى بولىپ، يگى ىستەردىڭ باسى-قاسىنان تابىلاتىن جان. ەلباسى ن. نازاربايەۆتىڭ «نازاربايەۆ زياتكەرلىك مەكتەپتەرىن» اشۋداعى باستى ماقساتى دا وسىنداي سانالى ۇرپاقتى تاربيەلەۋ. بۇل رەتتە اتالعان مەكتەپتەردىڭ وقۋشىلارى ءوز زامانداستارىنان وق بويى الدا كەلە جاتقانىن دالەلدەپ كەلەدى.

سونىڭ ءبىر دالەلى – تارازداعى نازاربايەۆ زياتكەرلىك مەكتەبىندە جالعىز باستى قاريالاردى قولداپ، قۇرمەتتەۋگە باعىتتالعان «ۇرپاقتار ساباقتاستىعى» الەۋمەتتىك جوباسىنىڭ تۇساۋكەسەرى ءوتتى. اشىلۋ سالتاناتىنا 50-گە جۋىق جالعىز باستى قارتتار مەن الەۋمەتتىك ورتالىق وكىلدەرى شاقىرىلدى.

مەكتەپ وقۋشىلارى مەن پەداگوگتارى قاريالارعا ارناپ قولونەر بويىنشا ءتۇرلى شەبەرلىك سىنىپتارىن وتكىزدى. سوڭىنان قوناقتار كونسەرتتىك باعدارلامانى تاماشالاپ، استان ءدام تاتتى.

– تاراز قالاسىندا 20 000 استام زەينەتكەر بولسا، سولاردىڭ 350ء-ى جالعىز باستى. بۇگىن سول قاريالاردىڭ ءبىرشاماسى نازاربايەۆ زياتكەرلىك مەكتەبىنە كەلدى. قاريالار بالالارمەن بىرگە شىعارماشىلىقپەن اينالىسىپ، ۋاقىتتى كەرەمەت وتكىزدى. «ۇرپاقتار ساباقتاستىعى» جوباسىنىڭ جاس ۇرپاققا بەرەرى كوپ. ەلىمىزدە وسىنداي باستامالار كوبەيسە دەگەن تىلەگىمىز بار، – دەدى ارناۋلى الەۋمەتتىك قىزمەت كورسەتۋ ورتالىعىنىڭ وكىلى جۇلدىز دالييەۆا.

جوبا ماقساتى زەينەتكەرلىك جاستاعى جالعىز باستى قاريالار مەن مەكتەپ وقۋشىلارى اراسىندا قارىم-قاتىناس ورناتۋ ارقىلى ۇرپاقتار ساباقتاستىعىن دامىتۋ. اپتا سايىنعى مادەني-تانىمدىق، ويىن-ساۋىق جانە ساۋىقتىرۋ شارالارى ارقىلى قاريالاردىڭ ەموسيونالدى جاعدايىن جاقسارتۋ، ءومىر بەلسەندىلىگىن ارتتىرۋ، قارىم-قاتىناس ورتاسىن كەڭەيتۋ كوزدەلگەن. ولاردىڭ اراسىندا بىرلەسىپ كىتاپ وقۋ، كومپيۋتەرلىك ساۋاتتىلىقتى ارتتىرۋ، قيمىل-قوزعالىس تەراپياسى، قولونەر ساعاتى، ءان سالۋ، مۋزىكالىق اسپاپتا ويناۋ، رەترو بي كەشى، ارت-تەراپيا، ينتەللەكتۋالدىق ويىندار جامەننە فيتنەس زالدا جاتتىعۋ جاساتۋ دا بار.

سونداي-اق، مەكتەپ وقۋشىلارى مەن قىزمەتكەرلەرىنىڭ اپتا سايىن قاريالارعا ءۇي مەن اۋلا تازالاۋ، دارى-دارمەك پەن ازىق-تۇلىككە بارىپ كەلۋ، وتىن جارۋ سياقتى شارۋالاردا كومەك بەرۋى دە جوسپارلانىپ وتىر. ءوز كەزەگىندە قاريالار جاقسى مەڭگەرگەن داعدىلارىن وقۋشىلارعا ۇيرەتىپ، مەكتەپتە كىشىگىرىم ۇيىرمە جۇمىسىن جۇرگىزۋىنە جاعداي جاسالادى.

جوبا اۆتورلارى مۇنداي تىعىز قارىم-قاتىناس وقۋشىلاردىڭ قوعامداعى الەۋمەتتىك ماسەلەلەردى، اتاپ ايتساق ەگدە جانە قارت جاستاعى ادامداردىڭ ءومىرىن جەڭىلدەتۋگە باعىتتالعان شەشىمدەر، قۇرىلعىلار ويلاپ تابۋىنا تۇرتكى بولادى دەگەن ويدا.