بۇرىنعى پوليسيا قىزمەتكەرى، "جۇمىسقا ماساڭ كۇيدە كەلگەنى" ءۇشىن قىزمەتىنەن بوساتىلعان الىبەك ەرعازييەۆ 29 قازاندا ورال وبلىستىق سوتى عيماراتىنىڭ الدىندا جالعىز ادامدىق پيكەت وتكىزدى. ول قولىنا "ءادىل سوتتى تالاپ ەتەمىن" ("ترەبۋيۋ سپراۆەدليۆوگو سۋدا") دەگەن جازۋى بار پلاكات ۇستاپ تۇردى. بۇعان دەيىن ەرعازييەۆ پيكەت وتكىزۋگە رۇقسات جەرگىلىكتى اكىمدىككە 70-تەن استام رەت ءوتىنىش بەرگەن، ءبىراق بيلىك ەشبىر ءوتىنىشىن قاناعاتتاندىرماعان، دەپ جازادى Qamshy.kz اقپارات اگەنتتىگى ازاتتىقتىڭ دەرەگىن نەگىزگە الىپ. 

ەكى جىل بۇرىن جۇمىستان شىعارىلعان الىبەك ەرعازييەۆ ءوزىن قىزمەتتەن "زاڭسىز قۋدى" دەپ سانايدى جانە مۇنى سوت ارقىلى دالەلدەگىسى كەلەدى.

- 2017 جىلدان بەرى ءىسىمنىڭ سوتتا ءادىل قارالۋىن تالاپ ەتىپ كەلەم، ءبىراق ءالى كۇنگە دەيىن بىردە-بىر سوت وتىرىسى وتكەن جوق. سوت مەنىڭ جۇمىستان زاڭسىز شىعارىلعانىمدى دالەلدەسە دەيمىن. مۇنداي شەشىم ناركولوگيالىق ديسپانسەردىڭ (قىزمەتتەن قۋۋ تۋرالى) انىقتاماسىنا سۇيەنىپ شىعارىلعان. 2017 جىلى جۇمىس كۇنى بىتە سالىسىمەن ولار مەنىڭ اعزامنان 0،4 پروميلل ىشىمدىك تاپقان. بۇل قالىپتى مولشەر جانە ءتىپتى مينيمالدى مولشەرگە دە جەتپەيدى، - دەيدى الىبەك ەرعازييەۆ.

وبلىستىق سوت عيماراتىنىڭ الدىنا پلاكاتپەن اكسياعا شىققان بۇرىنعى پوليسەي ماسەلەگە سوت ءتوراعاسى نازار اۋدارسا دەيدى. اكسيا ءوتىپ جاتقان ورىنعا ورال قالالىق ىشكى ساياسات ءبولىمىنىڭ وكىلى بەرىك تاۋبايەۆ كەلدى. ول الىبەك ەرعازييەۆكە اكسيانىڭ زاڭسىز ەكەنىن ەسكەرتتى. تاۋبايەۆ بۇرىنعى پوليسەيدى اكسيانى تەزىرەك اياقتاپ، ۇيگە قايتۋعا اسىقتىردى. الايدا ەرعازييەۆ اكسيانى اياقتاۋدان باس تارتىپ، سوت توراعاسىمەن كەزدەسۋدى تالاپ ەتتى.

اكىمدىك وكىلى بەرىك تاۋبايەۆ ازاتتىق ءتىلشىسىنىڭ سۇراقتارىنا جاۋاپ بەرگەن جوق.

شامامەن ءبىر ساعات ۋاقىت وتكەننەن كەيىن سوت عيماراتىنان قىزمەتكەر شىعىپ، الىبەك ەرعازييەۆتى سوت توراعاسىمەن كەزدەسۋگە شاقىردى. الايدا جۋرناليستەردى ىشكە كىرگىزگەن جوق.

كەيىنىرەك الىبەك ەرعازييەۆتىڭ وكىلى ماقسات ايساۋىتوۆ ازاتتىققا سوت توراعاسىمەن كەزدەسۋدە ماسەلە شەشىلمەگەنىن ايتتى. ول الىبەك ەرعازييەۆكە زاڭمەن قاراستىرىلعان مەرزىمدە شاعىمىن قاراستىرۋعا عانا ۋادە بەرگەن.

- بۇگىن №2 قالالىق سوتىنا سۋديالار مەن ناركولوگيالىق ديسپانسەر قىزمەتكەرلەرىنىڭ ۇستىنەن شاعىم تۇسىردىك. ەندى جاۋابىن 30 كۇن كۇتەمىز، - دەدى ماقسات ايساۋىتوۆ.