سوتتاردا قارالاتىن بارلىق ازاماتتىق ءىستىڭ 40 پروسەنتتەن استامى - بانكتەرگە قاتىستى داۋ. بۇل - وتە جوعارى كورسەتكىش. جىل سايىن ولاردىڭ سانى ارتپاسا كەميتىن ءتۇرى جوق. بۇل تۋرالى 16 قاراشادا جوعارعى سوت جانىنداعى حالىقارالىق كەڭەستىڭ وتىرىسىندا جوعارعى سوت ءتوراعاسى جاقىپ اسانوۆ مالىمدەدى دەپ جازادى Qamshy.kz اقپارات اگەنتتىگى zakon.kz سايتىنىڭ دەرەگىن نەگىزگە الىپ. 

ول بۇل ماسەلەنى بانكتەر ءوز تۇتىنۋشىسىنا نەسيە الۋداعى قاۋىپ-قاتەر تاۋەكەلدەرىن دۇرىستاپ ءتۇسىندىرىپ، ونى قۇجات تۇرىندە كورسەتۋ ارقىلى شەشۋگە بولاتىنىن ايتتى: 

– ال مەن وسى بانكتەر ماڭايىنداعى داۋدى ازايتۋدىڭ باسقا جولدارىن ۇسىنامىن.

بىرىنشىدەن، رەسەيدەگى سياقتى قارىز الۋشى مەن بانكتەردىڭ بارلىق قۇقىقتارى مەن مىندەتتەرى ەگجەي-تەگجەيلى سيپاتتالعان "تۇتىنۋشىلىق نەسيە تۋرالى" زاڭ قابىلداۋ قاجەت. ارينە، زاڭ ازاماتتاردى قورعاۋعا باعىتتالۋى كەرەك. مىنە، وسىنداي زاڭ كوپتەگەن ءقاۋىپ پەن تاۋەكەلدەردىڭ الدىن الۋى مۇمكىن.

ەكىنشىدەن، نەسيەنىڭ پايىزدىق سىياقى مولشەرلەمەسىنىڭ شەكتى كولەمىن شۇعىل تومەندەتۋ قاجەت.

ق ر ۇلتتىق بانك باسقارماسى 2012 جىلعى 24 جەلتوقساندا "جىلدىق ءتيىمدى پايىزدىق مولشەرلەمەلەر ءليميتىن بەكىتۋ تۋرالى" № 377 قاۋلىسىن قابىلدادى، وندا ەڭ جوعارى پايىزدىق مولشەرلەمە 56% دەپ كورسەتىلگەن.

ءبىراق ۇلتتىق بانك شەكتى مولشەرلەمەنىڭ ەسەبىن ەسەپتەپ كورسەتپەگەن.

ق ر ازاماتتىق كودەكسىنىڭ 718-بابىنىڭ 2-تارماعىنا سايكەس، جىلدىق ءتيىمدى سىياقى مولشەرلەمەسىنىڭ ەڭ جوعارى مولشەرى قازاقستان رەسپۋبليكاسىنىڭ بەلگىلى ءبىر زاڭنامالارىندا بەلگىلەنگەن تارتىپپەن ەسەپتەلەدى. وسى نورمانى بۇزا وتىرىپ، ۇلتتىق بانك ەڭ جوعارى سىياقى مولشەرلەمەسى كولەمىنىڭ ەسەبىن جۇرگىزبەگەن، ءبىراق 56% دەگەن نەگىزسىز مولشەرلەمەنى اسپاننان الىپ، بەكىتە سالعان.

قاۋلىدا 56% سىياقى ستاۆكاسىنىڭ قالاي قۇرىلعانىن، قايدان الىنعانىن كورسەتەتىن ءبىر دە ءبىر مالىمەت جوق.

ءتىپتى، ۇلتتىق بانك وسى ستاۆكانى ەسەپتەپ شىعارعان دەپ بولجاساق تا، ول جىل سايىن وزگەرىپ وتىرۋى ءتيىس ەمەس پە؟ ويتكەنى ەل ەكونوميكاسىنىڭ جانە الەۋمەتتىك كورسەتكىشتەرى ۇنەمى وزگەرىپ وتىرادى. ەندى 7 جىل ىشىندە ستاۆكا وزگەرمەۋى مۇمكىن ەمەس قوي!

ءتاريفتىڭ ەسەپتەلمەگەندىگىنىڭ تاعى ءبىر دالەلى - ۇلتتىق بانكتىڭ قارارىندا بۇل مولشەرلەمەنىڭ بەكىتىلدى دەپ كورسەتىلۋى، ال زاڭعا سايكەس ونى انىقتاۋ كەرەك. بۇل ارەكەتتەردىڭ ايىرماشىلىعىن اتاپ وتەر بولساق، ادەتتە، ءبىر نارسە تۋرالى بىرەۋ شەشىم شىعارسا، ول بەكىتىلەدى، ال "انىقتاۋ" - بەلگىلى ءبىر ەسەپتەۋدى بىلدىرەدى.

جاقىندا مەن ۇلتتىق بانكتىڭ ۇستىنەن سوتقا شاعىم ءتۇسىردىم. سوت ۇلتتىق بانكتىڭ ەڭ جوعارى پايىزدىق مولشەرلەمەنىڭ ەسەبىن جاساسىن دەپ ۇكىم شىعارۋى ءۇشىن. مەنىڭشە، سوت ول شاعىمىمدى قاناعاتتاندىرۋى ءتيىس. مىنە، سول كەزدە نەسيەنىڭ پايىزدىق ستاۆكاسى قازىرگىدەي 56% ەمەس، 25-30% ارالىعىندا بولىپ قالادى.

سونداي-اق ق ر پارلامەنتىنە "تۇتىنۋشىلىق نەسيە تۋرالى" زاڭ جوباسىن ازىرلەۋ تۋرالى ۇسىنىس ءتۇسىردىم.