قالالىق ينفراقۇرىلىمدى جاڭارتۋ الداعى 5 جىلدا ينۆەستيسيا ءۇشىن جاڭا الاڭدار اشادى، دەپ ايتتى باقىتجان ساعىنتايەۆ Almaty Investment Forum-دا سويلەگەن سوزىندە.

– «جاڭا الماتى» جوسپارى بويىنشا 834،5 ملرد تەڭگە كولەمىندە بۇرىن-سوڭدى بولماعان سالىمداردىڭ سالىناتىنى بولجانىپ وتىر. اعىمداعى باعام بويىنشا بۇل 2 ملرد 155 ملن دوللاردى قۇرايدى. ءبىز سىزدەردى بيزنەس سەرىكتەستىك پەن ىنتىماقتاستىققا شاقىرامىز. «جاڭا الماتى» مەن اگلومەراسيانى دامىتۋ جوسپارلارى قالالىق ەكونوميكا ءۇشىن ماڭىزدى درايۆەرلەر دەپ سانايمىن. وسى ارتىقشىلىقتاردىڭ بارلىعى بىزگە كەيىنگە قالدىرماي، قالامىزدى كۇشتى، سەرپىندى ءوسىپ كەلە جاتقان، باسەكەگە قابىلەتتى ەتە ءتۇسۋ ءۇشىن قالا ەكونوميكاسىندا قۇرىلىمدىق مانيەۆردى باستاۋعا مۇمكىندىك بەرەدى، – دەگەن شاھار باسشىسى مۇنداي قۇرىلىمدىق مانيەۆردىڭ ءمانىن ءتۇسىندىردى.

– بۇگىنگى كۇنى، قالا ەكونوميكاسىندا جەتەكشى سالا كوتەرمە جانە بولشەك ساۋدا – شامامەن 32%؛ ودان كەيىن قارجىلىق جانە جىلجىمايتىن مۇلىكپەن جاسالاتىن ءىس-شارالار. ونەركاسىپ، قۇرىلىس، الەۋمەتتىك ەكونوميكا جانە جاڭا يندۋستريانىڭ ۇلەسى شامالى. بۇل رەتتە، كوبىنەسە ءداستۇرلى جانە ارحايكالىق ساۋدانىڭ ءرولى باسىم. ەلەكتروندى كوممەرسيانىڭ جالپى ۇلەسى 3-5%-دان اسپايدى. مۇنداي جاعداي قالانىڭ قارقىندى دامۋىن ەداۋىر تەجەيدى. بۇل قالانىڭ ەكونوميكالىق جۇيەسىنىڭ ءالسىز تۇستارى بولماق. سوندىقتان، ءبىز جاڭا تەحنولوگيالىق تاۋارلار مەن قىزمەتتەردى دامىتۋ ءۇشىن قۇرىلىمدىق رەفورمالاردى جۇرگىزۋدى قولعا الامىز. قۇرىلىمدىق مانيەۆردىڭ تۇپكى ماقساتى – ەكسپورتتىق ءوندىرىستى دامىتۋ. الماتى وندىرۋشىلەرىنىڭ الەمدىك جوعارى تەحنولوگيالىق ەكونوميكاداعى ۇلەسىن ارتتىرىپ، قاتىسۋىن ۇلعايتۋ. تەك سوندا عانا قالا الەمدىك ارەنادا باسەكەگە قابىلەتتى ەكونوميكالىق ءوسۋدىڭ جاڭا مودەلىنە يە بولادى. ءبىز ينۆەستورلاردىڭ قىزىعۋشىلىعىنا سەنەمىز جانە بۇگىن مەن سىزدەردى وسى اۋقىمدى جۇمىستاردى سەرىكتەستەسە بىرگە اتقارۋعا شاقىرامىن، دەدى اكىم.