ەلىمىزدەگى تۇڭعىش قۋىرشاق تەاترىنىڭ كاسىبي دەڭگەيى، ەلىمىزدە جانە شەت ەلدەردە وتكەن رەسپۋبليكالىق، حالىقارالىق تەاتر فەستيۆالدەرىندە توپ جارىپ جۇرگەندىگى دە كاسىبي ماماندار مەن كورەرەمەندەردىڭ نازارىندا. ەرەسەكتەرگە ارنالعان جاڭا قويىلىمدارىمەن ءتۇرلى حالىقارالىق تەاتر فەستيۆالدەرىنەن جۇلدەگەر اتانىپ جۇرگەن ۇجىم كىشكەنتاي كورەرمەندەر ءۇشىن ۇسىناتىن ەرتەگىلەر مەن قويىلىمداردى نازارىنان تىس قالدىرعان ەمەس. كەرىسىنشە، قۋىرشاق تەاترى اتقارۋى ءتيىس ءوز ميسسياسىن اتقارۋدى ەستەن شىعارمايدى. اتاپ ايتقاندا، بيىلعى ماۋسىمدا تەاتر ءوزىنىڭ ەكىنشى بالالارعا ارنالعان قويىلىمىن كورەرمەندەرگە ۇسىندى. بۇلدىرشىندەردىڭ كوز قۋانىشى قۋىرشاق تەاترىنىڭ 85ء-شى ماۋسىمىنىڭ العاشقى پرەمەراسى – «اۋىل ءيتى اقباي» (اۆت.: ت.مينۋللين، رەج.: ە.قابدىل) قويىلىمى. تۋعان جەرىڭ مەن وسكەن ورتانىڭ ءقادىرىن بىلۋگە، قاناعات ەتۋگە ۇندەيتىن جارقىن اۋەندى قويىلىم بۇگىندە رەپەرتۋاردان تۇراقتى تۇردە ءوز ورنىن العان.

ەكى تىلدە كورەرمەن سۇرانىستارىن قاناعاتتاندىرىپ وتىرعان تەاتر «تەاتر بەز وتپۋسكا» اتالىپ، كورەرمەندەرى ءۇشىن توقتاۋسىز جۇمىس اتقارىپ جاتقالى ءبىراز ۋاقىت بولدى. تاجىريبەلەردەن تىكسىنبەيتىن تەاتر قۋىرشاق ونەرىنىڭ كوپشىلىككە بەيمالىم قىرلارىن اشىپ، الەمدىك دەڭگەيگە قۇلاش ۇرعالى بۇل ونەر سالاسىنا قىزىعاتىن كورەرمەندەر دە، جۇمىس جاساۋعا ۇسىنىس بىلدىرگەن جاس ارتيستەر مەن رەجيسسەرلار دا بار.

بالدىرعانداردىڭ جان-جاقتى ازامات بولىپ قالىپتاسۋىنا ءوز ۇلەسىن قوسىپ كەلە جاتقان رەسپۋبليكا تاريحىنداعى تۇڭعىش قۋىرشاق تەاترى بالالارعا ارنالعان ەكىنشى قويىلىمنىڭ تۇساۋكەسەرىنە دايىندىق ۇستىندە. باستى ماقساتى – ءداستۇرلى ۇلتتىق قۋىرشاقتارىمىزدى جاڭعىرتا ءتۇسۋ. جاڭا قويىلىمنىڭ رەجيسسەرى، پروديۋسسەر، رەسەي فەدەراسياسى تەاتر قايراتكەرلەرى وداعىنىڭ مۇشەسى، حالىقارالىق «كۋكART» تەاتر فەستيۆالىنىڭ پرەزيدەنتى – داۆيد بۋرمان. تەاتر ارتيستەرىنىڭ ىزدەنىسى مەن قۋىرشاق جۇرگىزۋدەگى كاسىبي دەڭگەيلەرىن ارتتىراتىن قويىلىم اعىمداعى جىلدىڭ 5-6 جەلتوقسان كۇندەرى العاشقى كورسەتىلىمىن كوپشىلىك نازارىنا ۇسىنادى.

كىشكەنتاي كورەرمەندەرىمىزدىڭ سۇيىكتى وقيعاسى «اققۇتان مەن قاراقشى» ەرتەگىسىنىڭ جەلىسىمەن «ايكو مەن ستراشكو» سپەكتاكلى ساحنالانادى. وزگەنىڭ ادال ەڭبەگىن پايدالانۋ ۇلكەن قاتەلىك ەكەندىگىن، مەيىرىمدىلىك قاسيەتىن جوعالتپاۋىمىز كەرەكتىگىنە ۇندەيتىن كىشكەنتاي قۇتان مەن ەگىستىكتى كۇزەتەتىن قاراقشىنىڭ وقيعاسى بالعىن بۇلدىرشىندەرگە جاعىمدى اسەر سىيلارى انىق.

ەستەرىڭىزگە سالا كەتسەك، تەاتر ۇجىمى اعىمداعى جىلدىڭ ماۋسىم ايىندا رەسەي فەدەراسياسى، سانكت-پەتەربۋرگ قالاسىندا وتكەن «كۋكART» حالىقارالىق تەاتر فەستيۆالىنە «انا جۇرەگى» (اۆت.: ە.يونوۆ، رەج.:ا.زايسيەۆ) سپەكتاكلىمەن شاقىرتۋ الىپ، ونەر كورسەتكەن بولاتىن. اتالمىش ونەر بەيگەسىندە ەكى بىردەي نوميناسيانى قانجىعاسىنا بايلاعان ۇجىمعا ەرەكشە ىقىلاس تانىتىپ، فەستيۆال پرەزيدەنتى داۆيد سەمەنوۆيچ تەاترىمىزعا ارنايى ات باسىن بۇردى. جاڭاشىلدىققا جانى قۇمار قۋىرشاق تەاترىنىڭ رەپەرتۋارىن جاڭا قويىلىممەن تولىقتىرۋ مارتەبەسى يە بولعانىنا ەرەكشە ىقىلاسىن جەتكىزدى.

ونەر جاساۋشىلار مەن ولاردى ناسيحاتتاۋشىلارعا شىنايى جاناشىرلىقپەن قاراپ، تەاتردىڭ وركەندەۋىنە بارلىق قاجەتتى جاعدايدى ۇسىنىپ وتىرعان شىعارماشىلىق توپ ەڭبەگى، تەاتر باسشىلىعىنىڭ جاڭا كوزقاراسپەن جۇمىس جاساۋى قۋىرشاق تەاترىنىڭ ساحناسىنان ءالى تالاي تىڭ دۇنيەلەر مەن كورەرمەن كوڭىلىنەن شىعاتىن قايتالانباس قويىلىمدار كورەرىمىزگە دالەل.

رەجيسسەر مەن اۆتوردىڭ ايتۋلى ەڭبەگىن جانە اكتەرلىك ءانسامبلدىڭ پوتەنسيالىنىڭ جوعارىلىعىن دالەلدەيتىن جاڭا قويىلىمنىڭ ءقادىرلى قوناعى بولىڭىزدار.

بەيبىت الكەيەۆا