قىتايدان قازاقستانعا "شەكارانى زاڭسىز كەسىپ ءوتتى" دەپ ايىپتالعان ەتنيكالىق قازاقتار قاستەر مۇساحان ۇلى مەن مۇراگەر ءالىم ۇلىنىڭ ءىسى بويىنشا تەرگەۋ اياقتالدى، دەپ جازادى Qamshy.kz اقپارات اگەنتتىگى azattyq.org سايتىنىڭ دەرەگىن نەگىزگە الىپ. بۇل تۋرالى 4 جەلتوقساندا ولاردىڭ ادۆوكاتى ءلاززات احاتوۆا حابارلادى.
– تەرگەۋ تولىق اياقتالدى. ءقازىر ىسپەن تانىسۋ ءۇشىن ءۇش كۇنگە وسىندا (وسكەمەن - رەد.) كەلدىك. ءىس ەندى پروكۋراتۋراعا جىبەرىلەدى، ودان ءارى قاراي سوتقا جونەلتىلەدى. ەندى قاماۋ مەرزىمىن دە ۇزارتاتىن شىعار. سەبەبى بۇعان دەيىن ولاردى ەكى ايعا قاماۋ تۋرالى قابىلدانعان سوت شەشىمىنىڭ مەرزىمى 18 جەلتوقساندا اياقتالادى. زايساندا ءبىر سوت ءوتۋى ءتيىس، - دەدى ءلاززات احاتوۆا.
شىعىس قازاقستان وبلىسى پروكۋراتۋراسى وكىلدەرى "تاراپتاردان بولەك ءۇشىنشى جاققا ءىس جايلى اقپارات بەرە المايتىنىن" جەتكىزدى.
قازان ايىنىڭ باسىندا جۇڭگو قازاقتارى قاستەر مۇساحان ۇلى مەن مۇراگەر ءالىم ۇلىنىڭ قازاقستانعا "شەكارانى زاڭسىز كەسىپ وتكەنى" تۋرالى اقپارات تاراعان. 14 قازاندا الماتىداعى ادام قۇقىعىن قورعاۋ بيۋروسىندا وتكەن باسپا ءسوز ءماسليحاتىندا قاستەر مۇساحان ۇلى شىڭجاڭداعى "ساياسي لاگەردە قاماۋدا بولعانىن"، مۇراگەر ءالىم ۇلى قىتايدا "قىسىم كورگەنىن" ايتقان ەدى. قازان ايىنىڭ ورتاسىندا ۇقك ولاردى "شەكارادان زاڭسىز ءوتتى" دەپ ايىپتاپ، وسكەمەن قالاسىنداعى تەرگەۋ يزولياتورىنا جەتكىزگەن.
ادۆوكات ءلاززات احاتوۆا وسكەمەندە قاماۋدا وتىرعان ەكى ادامنىڭ قىتايدا قالعان تۋىستارىنا ءقازىر قىسىم جالعاسىپ جاتىر دەيدى. مۇراگەر ءالىم ۇلىنىڭ تۋىستارىنىڭ سوزىنە سىلتەمە جاساعان ادۆوكات ءالىم ۇلىنىڭ قىتايدا قالعان ايەلىنىڭ "قىسىمنىڭ سالدارىنان تۇسىك تاستاعان"، تارباعاتاي وڭىرىندە قاساپشىلىقپەن اينالىسقان ەكى جىگىتپەن بىرگە ىستەگەن ادامدار دا قۋعىنعا ۇشىراپ، تۇسىنىكتەمە جازۋعا ءماجبۇر بولعان دەپ حابارلادى.
– بۇعان قوسا، قاستەردىڭ دە باستىعى وز-وزىنە قول جۇمسادى دەگەن اقپارات بولدى. قاستەرلەر [قازاننىڭ] 1ء-ى كۇنى كەتسە، ول 6-سى كۇنى كوز جۇمعان. وعان قاتتى قىسىم كورسەتىپ، لاگەرگە قامالاسىڭ دەپ قورقىتقان. ول جاقتا لاگەرگە شاقىرعانداردىڭ اراسىندا وز-وزىنە قول جۇمساۋ كوبەيگەن، – دەيدى ءلاززات احاتوۆا. ادۆوكات بۇل اقپاراتتى سەنىمدى كوزدەردەن العانىن ايتادى.
قىتايداعى قىسىم تۋرالى مالىمەتتىڭ راستىعىنا كوز جەتكىزە المادى. قىتايدىڭ قازاقستانداعى ەلشىلىگى جۋرناليستەردىڭ سۇراعىنا جاۋاپ بەرمەدى.
قازاقستان بيلىگىنەن بوسقىن مارتەبەسىن سۇراعان قىتايدىڭ ەكى ازاماتىنا قازان ايىنىڭ سوڭىندا "پانا ىزدەۋشى تۇلعا" كۋالىگى بەرىلگەن ەدى.
مۇراگەر ءالىم ۇلى مەن قاستەر مۇساحان ۇلىنىڭ تاعدىرىنا الاڭداعان ءبىر توپ بەلسەندى بۇعان دەيىن باسپا ءسوز جيىنىن وتكىزىپ، ەگەر قىتايعا قايتارىلسا، ەكەۋىنىڭ ومىرىنە ءقاۋىپ تونەتىنىن ايتىپ، قازاقستان بيلىگىنەن ولارعا بوسقىن مارتەبەسىن بەرۋىن سۇراعان.
پىكىر قالدىرۋ