بۇگىن، 16 جەلتوقسان كۇنى تۇستەن كەيىن الماتىداعى "رەسپۋبليكا" الاڭى ماڭىندا ازاماتتار شەرۋ وتكىزدى. ولار الدىمەن ساتبايەۆ كوشەسىنىڭ بويىمەن تاۋەلسىزدىك مونۋمەنتىنىڭ الدىنا دەيىن شەرۋلەتىپ كەلدى. سول ماڭدا شەرۋشىلەر قازىرگى بيلىكتى سىنىپ، "شال، كەت!"، "شال، كەت!" دەپ ۇرانداتتى.

شەرۋگە شىققان ازاماتتاردىڭ قولىندا "نازاربايەۆسىز قازاقستان"، "مۇراگەر مەن قاستەرگە ساياسي باسپانا بەرۋدى تالاپ ەتەمىز" جانە تاعى دا باسقا جازۋى بار پلاكاتتار بولدى. 

الماتى قالالىق پروكۋروتۋراسىنىڭ وكىلى "ازاماتتار بۇل جيىندارىڭىز زاڭسىز. تاراۋلارىڭىزدى وتىنەمىز. تاراماعان جاعدايدا شارا قولداناتىنىمىزدى ەسكەرتەمىز" دەدى. پروكۋراتۋرا وكىلى ەسكەرتۋ جاساي باستاعاندا ازاماتتار ونىڭ ءسوزىن تىڭداماي "شال، كەت!" دەپ ۇرانداتا جونەلدى. 

ال تۇستەن كەيىن 15.30 شاماسىندا تاۋەلسىزدىك مونۋمەنتىنىڭ ماڭىن تاستاپ، جەلتوقسان كوشەسى بويىمەن تومەن قاراي "شال، كەت!"، "ويان، قازاقستان!" دەپ ۇرانداتقان ازاماتتاردى پولسيا ۇستاي باستادى.

16 جەلتوقساندا تۇسكە دەيىن "رەسپۋبليكا" الاڭىندا بەلسەندىلەر جەلتوقسان جانە جاڭاوزەن وقيعاسى قۇرباندارىن ەسكە الىپ، قۇران باعىشتادى.