قازاقستاننىڭ ەكس-پرەزيدەنتى نۇرسۇلتان نازاربايەۆتىڭ باسپا ءسوز حاتشىسى ايدوس ۇكىباي Twitter-دەگى پاراقشاسىندا نازاربايەۆتىڭ قازاقستاندىقتاردى تاۋەلسىزدىك كۇنىمەن قۇتتىقتاعان ۆيدەوسىن جاريالادى.
ۆيدەودا نازاربايەۆ 30 جىل بويى ەل مۇدەسى جولىندا ايانباي ەڭبەك ەتكەنىن ماقتانا ايتىپ، قازاقستان حالقىنا بىرگە بولعانى ءۇشىن العىس بىلدىرەدى.
- مەن 30 جىل بويى جاس ۇرپاقتىڭ جارقىن بولاشاعى مەن ەل مۇددەسى جولىندا ايانباي ەڭبەك ەتكەنىمدى ماقتان تۇتامىن جانە ايتامىن. بۇل - زور مارتەبە، مول باقىت. ەلىم ءۇشىن، حالقىم ءۇشىن، تاۋەلسىز قازاقستانىم ءۇشىن نارىقتىڭ قاي سىناعىنا دا تاۋەكەل دەپ باس تىگۋگە دايىن تۇرعانىمدى بىلەسىزدەر. تاۋەلسىزدىك سياقتى قاستەرلى قۇندىلىقتاردى ساقتاۋعا تىرىستىم. بار كۇش-جىگەرىمدى تۋعان ەلىمنىڭ ەڭسەسىن بيىك ۇستاۋعا ارنادىم. ارتىمدا ارقا سۇيەر حالقىمنىڭ تۇرعانى بارلىق سىناقتاردى سۇرىنبەي وتۋىمە ۇيتقى بولدى. ەگەمەندىكتىڭ العاشقى ساتىنەن باستاپ، وتانىمىزدى وركەندەتۋگە، ەلدىگىمىزدى نىعايتۋعا زور ۇلەس قوسقان، زاماننىڭ اۋىر جۇگىن بىرگە كوتەرگەن بارشا قازاقستان جۇرتشىلىعىنا شىنايى العىسىمدى بىلدىرەمىن،- دەدى نازاربايەۆ.
قازاقستان رەسپۋبليكاسىنىڭ تاۋەلسىزدىك كۇنى قۇتتى بولسىن! pic.twitter.com/ekUqtyccFp
— Aidos Ukibay (@Aidos_Ukibay) 16 دەكابريا 2019 گ.
16 جەتوقسان - قازاقستاندا تاۋەلسىزدىك كۇنى. جانە بۇل داتا ەل تاريحىندا ايتۋلى ەكى وقيعامەن دە ەرەكشەلەنەدى. 1986 جىلدىڭ ءدال وسى كۇنى سول كەزدەگى قازاقستان ورتالىق كوميتەتىنىڭ ءبىرىنشى حاتشىلىعىنان دىنمۇحامەد قونايەۆتى الىپ، ورنىنا گەنناديي كولبيندى تاعايىنداعان ماسكەۋ شەشىمىنە قارسى شىعىپ، الماتىدا بەيبىت شەرۋگە شىققان ستۋدەنت جانە جۇمىسشى قازاق جاستارىن بيلىك كۇشپەن تاراتىپ، كەيىن جۇزدەگەن ادامدى قۋعىنعا سالعان. ال 2011 جىلى ماڭعىستاۋ وبلىسىنىڭ جاڭاوزەن قالاسىندا بىرنەشە اي بويى ەرەۋىلگە شىققان مۇنايشىلارعا پوليسيا وق اتقان. رەسمي دەرەك بويىنشا، جاڭاوزەن مەن شەتپەدەگى وقيعالاردا 17 ادام قازا تاپقان. سوندىقتان دا، سوڭعى كەزدەرى قازاقستان قوعامىندا "16-17 جەلتوقساندى مەرەكە رەتىندە تويلاۋ دۇرىس ەمەس. بۇل كۇن - جەلتوقسان مەن جاڭاوزەن قۇرباندارىن ەسكە الاتىن قارالى كۇن" دەگەن پىكىرلەر ءجيى ايتىلادى.
بۇگىن الماتىدا ازاماتتار تۇسكە دەيىن "رەسپۋبليكا" الاڭىنا بارىپ، جەلتوقسان مەن جاڭاوزەن وقيعالارى قۇرباندارىن ەسكە الىپ، قۇران باعىشتادى. ال تۇستەن كەيىن قالا كوشەلەرىندە "شال، كەت!" دەپ قرانداتا باستاعاندا ولاردى پوليسيا ۇستادى. شەرۋگە شىقانداردىڭ كەيبىرىنىڭ قولىندا "نازارباەسىز قازاقستان" دەگەن پلاكاتتار بولدى.
قازاقستاندى تاۋەلسىزدىك العان 1991 جىلدان باستاپ ۇزدىكسىز باسقارعان نازاربايەۆ بيىلعى جىلدىڭ ناۋرىز ايىندا پرەزيدەنتتىك وكىلەتتىگىن مەرزىمىنەن بۇرىن توقتاتقان. ءبىراق ول ەلدەگى بيلىك پارتياسى سانالاتىن "نۇر وتان" پارتياسىن ءالى دە باسقارىپ وتىر جانە قاۋىپسىزدىك كەڭەسىنىڭ ماڭگىلىك ءتوراعاسى.
پىكىر قالدىرۋ