16 جەلتوقسان قازاقستانننىڭ تاۋەلسىزدىك كۇنى مەرەكەسىنە وراي الماتىداعى رەسپۋبليكا الاڭىنا كەلگەن ازاماتتار 1986 جىلعى جەلتوقسان وقيعاسى مەن 2011 جىلعى جاڭاوزەن وقيعاسى قۇرباندارىن ەسكە الىپ، رۋحتارىنا قۇران باعىشتادى.

ەسكە الۋ شاراسىنا جينالعان بەلسەندى ازاماتتار جەلتوقسان مەن جاڭاوزەن وقيعالارىنا ءالى رەسمي تۇردە شىنايى باعا بەرىلمەگەنىن، كىنالىلەردىڭ جازالانباعانىن ايتتى. 

"قازاقستاننىڭ دەموكراتيالىق پارتياسىن" قۇرۋ بويىنشا باستاماشىل توپ جەتەكشىسى، ساياساتكەر جانبولات ماماي قۇربانداردىڭ رۋحىنا قۇران باعىشتالعان سوڭ تاۋەلسىزدىك مەرەكەسى تۋرالى ايتتى. ونىڭ ايتۋىنشا، قازاقستاننىڭ تاۋەلسىزدىك كۇنى 16 جەلتوقسان ەمەس، 25 قازان قازان بولۋى كەرەك. 

- 16-17 جەلتوقسان مەرەكە ەمەس، ۇلتتىق ازا تۇتۋ كۇنى بولۋ كەرەك. بۇل كۇنى ءبىز 1986 جىلعى جەلتوقسان وقيعاسىنىڭ جانە 2011 جىلعى جاڭاوزەن وقيعالارىنىڭ قۇرباندارىن ەسكە الۋىمىز كەرەك. بۇل - ەشقانداي دا تاۋەلسىزدىك كۇنى ەمەس. قازاقستاننىڭ تاۋەلسىزدىك كۇنى - 25 قازان. ال 16-17 جەلتوقسان كۇنى تەك بەلسەندى ازاماتتار عانا ەمەس، نازاربايەۆ تا، توقايەۆ تا وسى الاڭعا كەلىپ، بوزداقتاردىڭ رۋحىنا تاعزىم ەتۋى كەرەك، - دەدى ماماي.