بۇگىن، 15 قاڭتاردا اقوردادا پرەزيدەنتتىك كادر رەزەرۆىنە كىرگەن جاستارمەن كەزدەسۋ وتكىزگەن قازاقستان پرەزيدەنتى قاسىم-جومارت توقايەۆ ازاماتتاردىڭ شاعىمدارى بويىنشا ناقتى شەشىمدەر بيۋروكراتياسىز قابىلدانۋى ءتيىس ەكەنىن ايتتى.
توقايەۆتىڭ سوزىنشە، ەل ازاماتتارىنىڭ شاعىم، وتىنىشتەرى جەدەل قارالۋى قاجەت.
- ءۇشىنشى قاعيدا - ازاماتتاردىڭ سۇرانىستارىنا جەدەل ءۇن قاتۋ. قازاقستاندىقتاردىڭ شاعىمى، ءوتىنىشى نەمەسە جۇگىنۋلەرىن جەدەل قاراۋ قاجەت. ولار بويىنشا ناقتى شەشىمدەر بيۋروكراتياسىز قابىلدانۋى ءتيىس، - دەدى توقايەۆ.
پرەزيدەنتتىڭ ايتۋىنشا، الداعى جىلدارى مەملەكەتتىك باسقارۋ جۇيەسىندە بيۋروكراتيالىق پروسەستەردىڭ باسىم بولىگى اۆتوماتتاندىرىلاتىن بولادى.
- ياعني، بەلگىلى ءبىر دەڭگەيدە بۇل سىزدەردىڭ جۇمىستارىڭىزعا دا بايلانىستى بولماق. مەملەكەتتىك سەكتور بلوكچەين، بيگداتا، جاساندى ينتەللەكتى قۇرالدارىن پايدالانا باستايدى. وسىناۋ تەحنولوگيالارعا نەگىزدەلگەن مەملەكەتتىك جۇيە قوعام ماسەلەلەرىنە الدىن الا ارەكەت ەتۋگە جانە وزەكتى الەۋمەتتىك پروبلەمالاردى دەر ۋاقىتىندا شەشۋگە مۇمكىندىك بەرەدى. بۇل بەلگىلى ءبىر دەڭگەيدە ەرتەڭگى ەمەس، بۇگىنگى كۇننىڭ شىندىعى. ءبىراق، وكىنىشكە وراي مەملەكەتتىك قىزمەتشىلەردىڭ بارلىعى بىردەي مۇنى تۇسىنە قويعان جوق، - دەدى قاسىم-جومارت توقايەۆ.
پىكىر قالدىرۋ