قازاقستان پرەزيدەنتى قاسىم-جومارت توقايەۆ مەملەكەتتىك باسقارۋ  جۇيەسىندەگى "كوماندامەن اۋىسۋ" پروبلەماسىن قوزعادى. بۇل تۋرالى ول بۇگىن، 15 قاڭتاردا اقوردادا پرەزيدەنتتىك كادر رەزەرۆىنە كىرگەن جاستارمەن وتكىزگەن كەزدەسۋىندە ايتتى دەپ جازادى Qamshy.kz اقپارات اگەنتتىگى sputniknews.kz سايتىنىڭ دەرەگىن نەگىزگە الىپ. 

پرەزيدەنتتىڭ ايتۋىنشا، مەملەكەتتىك قىزمەتتە "كوماندامەن اۋىسۋ" ءالى دە وتە وزەكتى ماسەلە بولىپ وتىر.

"مەملەكەتتىك ورگاندارداعى اۋىسۋ كورسەتكىشى، جالپى العاندا، نورما شەگىندە – 6-10%. شىن مانىندە، مينيستر نەمەسە اكىم اۋىسقان كەزدە، كادرلىق قۇرام دا اجەپتاۋىر وزگەرەتىنى بارشاعا ايان"، - دەدى توقايەۆ.  

پرەزيدەنت مەملەكەتتىك باسقارۋ جۇيەسىندە مەريتوكراتيا پرينسيپتەرى ۇنەمى ساقتالا بەرمەيتىنىن اتاپ ءوتتى.

"ءالى كۇنگە دەيىن قىزمەتتە تانىس ارقىلى، ىقپالدى قامقورشىلار ارقىلى كوتەرىلۋ جاعدايلارى كەزدەسەدى. بۇل شىندىق قوي. مۇنى ءبارىمىز دە بىلەمىز. بۇعان جول بەرۋگە بولمايدى. مۇنداي جۇيەنى قاتاڭ سىنعا الىپ، اناليز جۇرگىزگەن ءجون. قوعامنىڭ پىكىرىن دە ەسكەرۋ قاجەت"، - دەدى مەملەكەت باسشىسى.

ونىڭ ايتۋىنشا، كەيبىر مەملەكەتتىك قىزمەتكەرلەر ەسكى جۇيەدەن شىعا الماي، ەلدەگى جاڭعىرۋ پروسەستەرىن تەجەيدى.

"ۆەدومستۆولار مەن بولىمشەلەردىڭ باسشىلارى شەگىرتكە سياقتى ءبىر قىزمەتتەن باسقاسىنا سەكىرىپ ءجۇر. سول سەبەپتى قازاقستانعا قوعامنىڭ تالاپتارىنا جاۋاپ بەرەتىن ءتيىمدى ءارى ءادىل مەملەكەتتىك باسقارۋ مودەلى قاجەت"، - دەدى پرەزيدەنت.