6 اقپاندا ماڭعىستاۋ وبلىستىق سوتىندا ماڭعىستاۋ اۋدانى پوليسيا ءبولىمىنىڭ باستىعى راشيد قۋاندىقوۆتىڭ "جالا جاپتى" دەگەن ارىزىمەن التى ايعا سوتتالعان اقتاۋلىق بەلسەندى جامبىل كوبەيسىنوۆ پەن ونىڭ ايەلى ءدىلبار بەگجانوۆانىڭ ( التى ايعا باس بوستاندىعىنان شەكتەلگەن) اپەللياسيالىق سوتى ءوتتى. وبلىستىق سوتتىڭ سۋدياسى ازات ءىزباساروۆ ەرلى-زايىپتالارعا العاشقى سوت وتىرىسىندا شىعارىلعان شەشىمدى وزگەرتكەن جوق. بۇل تۋرالى Qamshy.kz اقپارات اگەنتتىگىنە ەرلى-زايىپتىلاردىڭ سوتىنا الماتىدان ارنايى بارىپ قاتىسقان بەلسەندى بەسجان تولەۋبەك حابارلادى. 

ونىڭ سوزىنشە، سۋديا ەرلى-زايىپتىلارعا العاش شىعارىلعان سوت شەشىمى دۇرىس ەكەندىگىن ايتىپ، ونى وزگەرىسسىز قالدىرۋعا ۇكىم ەتكەن. ال سۋديا شىعارعان ۇكىمگە كەلىسپەگەن كوبەيسىنوۆ پەن بەگجانوۆتىڭ قولداۋشىلارى نارازىلىق ءبىلدىرىپ، سوت زالىندا "ماسقارا" دەپ ايقايلاعان. 

بەسجان تولەۋبەكتىڭ ايتۋىنشا، سوتقا كوبەيسىنوۆ پەن بەگجانوۆانى قولداپ جەرگىلىكتى جانە قازاقستاننىڭ باسقا ايماقتارىنان كوپتەگەن بەلسەندى بارعان. ولار سوت زالىنا سىيماعاندىقتان، تەك ون شاقتىسى ىشكە كىرگىزىلىپ، قالعاندارى سىرتتا قالعان. سوت وتىرىسىندا فوتو، ۆيدەو تۇسىرۋگە تىيىم سالىنعان.

وتكەن جىلى جەلتوقساننىڭ 13ء-ى كۇنى ماڭعىستاۋ وبلىسى مۇنايلى اۋداندىق سوتى 35 جاستاعى جەرگىلىكتى تۇرعىن جامبىل كوبەيسىنوۆ پەن ونىڭ ايەلى ءدىلبار بەگجانوۆانى قىلمىستىق كودەكستىڭ 130-بابىنىڭ 2-تارماعى ("بۇقارالىق اقپارات قۇرالدارىن نەمەسە تەلەكوممۋنيكاسيالار جەلىلەرىن پايدالانىپ جالا جابۋ") بويىنشا ايىپتى دەپ تانىعان بولاتىن. ەرلى-زايىپتىنىڭ ۇستىنەن سوتقا ماڭعىستاۋ اۋدانى پوليسيا ءبولىمىنىڭ باستىعى راشيد قۋاندىقوۆ جەكە شاعىم تۇسىرگەن. سوت سول كەزدە كوبەيسىنوۆتى جارتى جىلعا اباقتىعا قاماپ، بەگجانوۆانىڭ بوستاندىعىن التى ايعا شەكتەۋگە ۇكىم شىعارعان ەدى.

35 جاستاعى جامبىل كوبەيسىنوۆ - الەۋمەتتىك جەلى ارقىلى بيلىكتى سىنىپ، قازاقستانداعى كوپ بالالى وتباسىلاردىڭ، قازاق ءتىلىنىڭ ماسەلەسىن كوتەرگەن بەلسەندى. جامبىل كوبەيسىنوۆ پەن ءدىلبار بەگجانوۆانىڭ التى بالاسى بار. ولار ماڭعىستاۋ وبلىسىنىڭ مۇنايلى اۋدانىندا تۇرادى. بەلسەندىنىڭ Youtube جەلىسىندە ارناسىنا 30 مىڭا جۋىق ادام جازىلعان. كوبەيسىنوۆ ول ارناسىندا جەرگىلىكتى بيلىك پەن پوليسيانىڭ جۇمىستارىن سىناپ تۇسىرگەن ۆيدەولارىن جاريالايتىن. 

وتكەن جىلى 30 جەلتوقساندا قۇقىق قورعاۋشى باقىتجان تورەعوجينا ءوزىنىڭ Facebook پاراقشاسىندا قازاقستاندا ساياسي تۇتقانداردىڭ جاڭارتىلعان ءتىزىمىن جاريالادى. ول تىزىمدە ماڭعىستاۋلى بەلسەندى جامبىل كوبەيسىنوۆ تا بار.