قىرعىزستاننىڭ بۇرىنعى پرەزيدەنتى اسقار اقايەۆتىڭ ۇلى ايدار اقايەۆ كەشە تۇندە قايتىس بولدى. دەرەكتەرگە سۇيەنسەك، ونىڭ جۇرەگى كەنەتتەن ۇستاپ قالعان. بۇل تۋرالى اkipress حابارلايدى. 

ايدار اقايەۆ ءتىرى بولعاندا ەكى اپتادان كەيىن 44 جاسقا تولاتىن ەدى.

اقايەۆتىڭ وتباسىندا 4 بالا بار. ولار: بەرمەت، ايدار، ساادات جانە يليم.

مەكتەپتى ءتامامداعاننان كەيىن ول ماسكەۋ مەملەكەتتىك ينستيتۋتى حالىقارالىق قاتىناستار فاكۋلتەتىنە وقۋعا تاپسىرادى. كەيىننەن امەريكادا وقىپ ءجۇرىپ، سوندا بىرنەشە وقۋ ورىندارىنا ەمتيحان تاپسىرادى. ناتيجەسىندە مەريلەند ۋنيۆەرسيتەتىن تاڭدايدى. ونى 1999 جىلى ءبىتىرىپ، حالىقارالىق قارجى جانە مەنەدجمەنت سالاسى بويىنشا مامان اتانادى. 

اقايەۆتىڭ بالالارى ۇنەمى بۇقارالىق اقپارات قۇرالدارىنىڭ نازارىندا بولدى. ونىڭ بىردەن-بىر سەبەبى ايداردىڭ مەديا سالاسىندا بەلسەندى بولۋى. سونداي-اق ول  تۇنگى كلۋبتار مەن مەيرامحانالاردا ءجيى جۇرگەندىكتەن قوعامدا ءجيى تالقىعا ءتۇستى.

ەكى اۋلەتتىڭ ۇيلەنۋ تويىنان كەيىن ايدار ەلگە تانىلا باستادى. ياعني، 1998 جىلى ول قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ كىشى قىزى ءالياعا ۇيلەنەدى. الايدا بۇل نەكە ۇزاققا بارماي، 2001 جىلى ەرلى-زايىپتىلار اجىراستى.

كەيىننەن ايدار اقايەۆ ەكىنشى رەت تانىمال تەلەجۇرگىزۋشى سايكال چوكۋبايەۆاعا ۇيلەنەدى. 

ايدار جەكە بيزنەسپەن اينالىستى. ءبىراق ب ا ق قۇرالدارى ونىڭ جاساعان بيزنەس-جوبالارىن اكەسىنىڭ ارقاسىندا جۇرگىزىپ وتىر دەپ جورامالدادى.

ول 23 جاسىندا «كازكوممەرسبانك» ااق-نىڭ قىرعىزستانداعى وكىلدىگىن باسقاردى، ال 2001 جىلى قارجى ءمينيسترىنىڭ كەڭەسشىسى قىزمەتىن اتقاردى. ول كەزدە بار بولعانى 25 جاستا ەدى. كەيىننەن نۇربەك تۇردىقۇلوۆپەن بىرگە "Bitel" ءموبيلدى كومپانياسىنىڭ نەگىزىن قالادى.

بىردە ول جۋرناليستەردىڭ ەل باسشىسىنىڭ بالالارى بيزنەسپەن اينالىسقانى دۇرىس پا دەگەن سۇراعىنا بىلاي دەپ جاۋاپ بەردى.

- مەن مۇنداي بولمايدى دەگەن تمد-نىڭ بىردە-بىر ەلىن بىلمەيمىن. بارلىق جەردە ەل باسشىلارىنىڭ تۋىستارى قولدارىنان كەلگەنشە بيزنەسپەن اينالىسادى. بۇل قالىپتى قۇبىلىس. ال مۇنىڭ ەل ەكونوميكاسىنا زيانى تيە مە، جوق پا، بۇل باسقا ماسەلە، - دەدى اقايەۆ. 

سونىمەن بىرگە ول قوعامدىق جۇمىستارمەن اينالىستى. ايدار كۇتپەگەن جەردەن ۇلتتىق وليمپيادا كوميتەتىنىڭ پرەزيدەنتى بولىپ سايلاندى. ول ەلدىڭ سپورتتىق ومىرىندە ەلەۋلى ءىز قالدىرا المادى. 

2004 جىلى پرەزيدەنت اسقار اقايەۆ بالالارىن ۇلكەن ساياساتقا تارتۋ تۋرالى شەشىم قابىلدادى. ونى كوپشىلىك مۇراگەر جوسپارىن جۇزەگە اسىرۋ ساياساتى بولار دەپ ءتۇسىندى. ءبىراق ايدار اقايەۆتىڭ ءوزى ساياساتقا ارالاسقىسى كەلمەيتىنىن ايتتى.

2005 جىلعى پارلامەنت سايلاۋىندا «العا، قىرعىزستان!» پارتياسى العان داۋىسقا كۇماندانۋشىلاردىڭ نارازىلىعى جاپپاي تارتىپسىزدىككە ۇلاستى. بۇل، 2005 جىلعى 24 ناۋرىزداعى وقيعالارمەن تۇسپا-تۇس كەلەدى. 

وسىنىڭ ناتيجەسىندە، اسقار اقايەۆ پەن ونىڭ وتباسى ەلدەن كەتۋگە ءماجبۇر بولدى. 

ءسويتىپ، قىرعىزستاندا بيلىكتىڭ العاشقى اۋىسۋى باستالدى جانە جازالاۋ شارالارى بۇرىنعى تارتىپكە ءتۇستى. 

باس پروكۋراتۋرا اقايەۆتارمەن كىمنىڭ جانە قالاي بايلانىسقانىن ءبىلىپ، ونىڭ بىرنەشە قىلمىستىق ىسكە بارعانىن انىقتادى. ونىڭ ۇستىنەن مەملەكەتتىك قاراجاتتى ۇرلاۋ، قارجىلىق الاياقتىق جانە كۇش قولدانۋ، باسقا ادامداردىڭ مۇلكىن زاڭسىز پايدالانۋ بويىنشا بىرنەشە قىلمىستىق ىستەر قارالدى.

قىرعىزستاننان قاشقاننان كەيىن ونىڭ ەسىمى مەديا سالاسىندا مۇلدەم اتالمادى. كەيىننەن اقايەۆتىڭ ماسكەۋدە تۇراتىنى بەلگىلى بولدى.