شقو-نىڭ اكىمى دانيال احمەتوۆ 3 كۇن ىشىندە ۇكىمەت باسشىسىمەن بىرگە اۋدانداعى جۇڭگو ازاماتتارىن شىعارۋ ماسەلەسىن شەشەتىنىن ايتتى. بۇل تۋرالى m.ustinka.kz سايتى حابارلادى. 

زايسان حالقى 19 اقپاننان بەرى جۇڭگو حالىق رەسپۋبليكاسىنان كەلگەن ادامداردى 14 كۇن بويى وڭىرلىك پروۆيزورلىق ستاسيوناردا وقشاۋلاۋ شاراسىنا نارازىلىق ءبىلدىرىپ، باس كوتەردى.

زايساننىڭ سارىتەرەك جانە اينابۇلاق اۋىلدارىندا نارازىلىققا شىققان حالىقتى باسۋعا وبلىس اكىمى دانيال احمەتوۆ باستاعان شەنەۋنىكتەر كەلدى. دەگەنمەن اۋدان حالقى ءتۇسىندىرۋ جۇمىستارى بولماعانىن ايتىپ، سەنىمسىزدىك ءبىلدىرىپ، شەكارادان بەلگىسىز ازاماتتاردىڭ وتكەنىن ايتتى. 

– شەكارادان ەشقانداي وزگە ەلدىڭ ازاماتتارى وتكەن جوق. ءبىراق شەكارانىڭ ارعى جاعىندا 5 زايساندىق ازامات تۇر. ولاردىڭ دەنساۋلىعىن 14 كۇن باقىلاۋ ءۇشىن وسكەمەنگە الىپ كەتەمىز. ال مۇنداعى 42 جۇڭگو ازاماتىن ۇكىمەت باسشىسىمەن اقىلداسىپ، ءوز ەلىنە جىبەرۋ شاراسىن شەشەمىز، تەك 3 كۇن ۋاقىت بەرىڭىزدەر! – دەيدى دانيال احمەتوۆ.

وعان كونبەگەن ءبىر توپ حالىق وبلىس باسشىلىعىمەن بىرگە «سين-سين» كومپانياسىنىڭ جۇمىسكەرلەرى تۇراقتاعان 9-بازاسىنا كەلىپ، ءتولقۇجاتتارىن ءوز كوزدەرىمەن كورىپ، ەلدەن 3 ساعاتتىڭ ىشىندە كەتۋىن تالاپ ەتۋدە.