باسپاگەر، ۇلتتىق قوعامدىق سەنىم كەڭەسىنىڭ مۇشەسى باقىتجان بۇقارباي facebook پاراقشاسىندا كەڭەس قۇرامىنان شىعاتىنىن ءمالىم ەتتى.

ول كەڭەسكە وتىز جىل كۇتكەن ساياسي رەفورمالار جۇزەگە اسىپ قالادى-اۋ دەگەن ۇمىتپەن ونىڭ مۇشەسى بولۋعا كەلىسكەنىن ساياسي رەفورمالار بويىنشا جۇمىس توبىنىڭ قۇرامىندا ءبىرقاتار زاڭدارعا وزگەرىستەر ەنگىزۋگە باعىتتالعان ۇسىنىستار دايىنداۋعا بەلسەنە اتسالىسقانىن ايتقان.

«ءبىزدىڭ ۇسىنىستاردى ەسكەرە وتىرىپ، پرەزيدەنت توقايەۆ جىل سوڭىندا ساياسي رەفورمالاردىڭ ءبىرىنشى پاكەتىن جاريا ەتتى. ياعني پارتيا تىركەۋ جۇمىسىن جەڭىلدەتۋ، بەيبىت جيىن ۇيىمداستىرۋ ءۇشىن حابارلاۋ جۇيەسىنە كوشۋ سياقتى وڭ وزگەرىستەردى زاڭعا ەنگىزۋ تۋرالى ناقتى تاپسىرما بەردى.

وكىنىشكە قاراي، مينيستر ابايەۆتىڭ ۆەدومستۆوسى ازىرلەگەن «بەيبىت جيىندار تۋرالى» زاڭ جوباسى پرەزيدەنتتىڭ تاپسىرماسىنا ساي بولماي شىقتى جانە ول حالىقتىڭ، ازاماتتاردىڭ مۇددەسىنە قايشى بولىپ وتىر.

بۇعان قوسا ساياسي تۇتقىنداردىڭ ءالى كۇنگە دەيىن بوساتىلماعانىن ايتا كەتكەن ءجون. جانبولات مامايعا پارتيا قۇرۋ جولىندا توسقاۋىلدار جاسالىپ جاتقانىن دا كورىپ ءجۇرمىن. وسىنىڭ بارلىعى توقايەۆتىڭ تاپسىرمالارىن ونىڭ استىنداعى بيۋروكراتتاردىڭ ەلەمەيتىنىن اڭعارتىپ وتىر. بۇل دەگەنىمىز ۇلتتىق كەڭەستىڭ بۇگىنگى تاڭدا ەلىمىزدەگى ساياسي رەفورمالارعا ەشقالاي اسەر ەتە المايتىن ۇيىم ەكەنىن كورسەتتى.

مەن حالقىمنىڭ الدىندا ادال بولعىم كەلەدى. حالىقتىڭ مۇددەسىن ءاردايىم بارىنەن جوعارى قويامىن. كەڭەستىڭ قۇرامىندا ەلىمىزگە پايدا اكەلەتىن وزگەرىستەر ءۇشىن بارىمدى سالىپ، قولدان كەلگەنشە تىرىستىم، ءبىراق ۇلتتىق كەڭەسكە بيلىكتىڭ قۇلاق اسپايتىنىنا اقىرى كوزىم جەتىپ وتىر. مەن حالىقتىڭ مۇددەسىنە قايشى ارەكەتتەر مەن پيعىلداردى زاڭداستىرۋعا ارالاسقىم كەلمەيدى، سول سەبەپتى ۇلتتىق كەڭەستىڭ قۇرامىنان شىعاتىنىمدى مالىمدەيمىن، دەلىنگەن باسپاگەر جازباسىندا.

باقىتجان بۇقارباي ساياسي رەفورمانىڭ ورنىنا كوزبوياۋشىلىق بولسا، نەگە اكەلىپ سوعاتىنى تۋرالى توقايەۆقا ارنالعان كىتابىندا جازعانىن ءمالىم ەتتى.

بۇعان دەيىن ۇلتتىق كەڭەستىڭ تاعى ءبىر مۇشەسى، ەكونوميست مۇحتار تايجان الەۋمەتتىك جەلىدەگى پاراقشاسىندا دەموكراتيالىق جانە نارىقتىق رەفورمالار باستالماي جاتىپ، سوڭى سيىرقۇيىمشاقتانىپ بارا جاتقانىنا الاڭداۋشىلىق بىلدىرگەن. ۇلتتىق سەنىم كەڭەسى مۇشەلەرىن زاڭ جوباسىن جاساۋ ىسىنە ارالاستىرمايتىنىن، وتىرىستا كوتەرىلگەن ماسەلەلەردى جۇزەگە اسىرۋ بارىسى بەلگىسىز ەكەنىن ءمالىم ەتىپ، كەڭەستىڭ كەلەسى وتىرىسىنىڭ قاشان وتەتىنى، وندا قانداي ماسەلە كۇن تارتىبىنە قويىلاتىنى انىق ەمەستىگىن ايتقان.

سونداي-اق ول اقپارات جانە قوعامدىق دامۋ مينيسترلىگى ازىرلەگەن ميتينگ تۋرالى زاڭ جوباسى مۇلدە ىسكە العىسىز دەپ ايتقان. 

جازباسىنىڭ سوڭىندا سەنىم كەڭەسىندە كوتەرىلگەن ساياسي رەفورمالاردى جۇزەگە اسىرۋ ءۇشىن پرەزيدەنت جاڭا ادامداردى جۇمىلدىرۋ كەرەكتىگىنە نازار اۋدارعان.