اتاپ ايتساق، ءوڭىر اكىمىمەن بىرگە ەرەكشە قامقورلىقتى قاجەت ەتەتىن 138 بالا تاربيەلەنىپ جاتقان «التىناي» ارنايى بالالار ءۇيىنىڭ عيماراتىن كوردى. سوڭعى رەت مۇندا كۇردەلى جوندەۋ جۇمىستارى وسىدان 10 جىل بۇرىن جاسالعان ەكەن. عيماراتتىڭ شاتىرى، قاسبەتى جانە جىلۋ جۇيەسى ءقازىر اپاتتى جاعدايدا.

اتا-انالارمەن بولعان كەزدەسۋدە پارتيا ءتوراعاسىنىڭ ءبىرىنشى ورىنباسارى بالالاردى قولداۋ مەن قۇقىعىن قورعاۋ «Nur Otan»-نىڭ نەگىزگى جۇمىستارىنىڭ ءبىرى ەكەنىنە توقتالىپ، وسى ماسەلەنى شەشۋ ءۇشىن بارلىق ءىس-شارالاردىڭ قابىلداناتىنىن اتاپ ءوتتى.

ودان ءارى باۋىرجان بايبەك ەكىباستۇزداعى «Nur Otan»-نىڭ قوعامدىق قابىلداۋىندا بولىپ، ازاماتتاردىڭ مۇڭ-مۇقتاجىن تىڭدادى. قارالعان ماسەلەلەردىڭ ىشىنەن ول قۇدىقتىڭ اۋىز سۋىن پايدالانىپ جۇرگەن سارىقامىس اۋىلىنىڭ 450 تۇرعىنىنىڭ ءوتىنىشىن پارتيالىق باقىلاۋعا الدى. جەرگىلىكتى بيلىكتىڭ اقپاراتى بويىنشا، ورتالىقتاندىرىلعان سۋمەن قامتاماسىز ەتۋدى جۇرگىزۋ جۇمىستارى جىل سوڭىنا دەيىن اياقتالادى.

سونداي-اق پارتيا ءتوراعاسىنىڭ ءبىرىنشى ورىنباسارى الەۋمەتتىك جانە ەڭبەك قۇقىعى سالاسىنداعى زاڭنامانى جەتىلدىرۋ جونىندەگى ماسەلەلەر مەن ۇسىنىستاردى تالقىلاۋ ءۇشىن ەكىباستۇزداعى گرەس – 1 جۇمىسشىلارى جانە وڭىردەگى تاۋ-كەن ءوندىرىسى كاسىپوداقتارىنىڭ وكىلدەرىمەن جۇزدەستى.

سول كۇنى باۋىرجان بايبەك پاۆلودار قالاسىنىڭ بەلسەندى تۇرعىندارىمەن بىرنەشە كەزدەسۋ وتكىزدى. زيالى قاۋىم، ۇكىمەتتىك ەمەس ۇيىمداردىڭ وكىلدەرىمەن بىرگە ەكولوگيا، ەڭبەك ميگراسياسى،سىبايلاس جەمقورلىق ت.ب. سالالارداعى ءوڭىردىڭ وزەكتى ماسەلەلەرى تالقىلاندى. پارتيا ءتوراعاسىنىڭ ءبىرىنشى ورىنباسارى ءار ماسەلەگە بايلانىستى، ونىڭ ىشىندە زاڭنامالىق دەڭگەيدە دە «Nur Otan»-نىڭ جۇيەلى تۇردە اينالىساتىنىنا ەرەكشە توقتالدى.

ەلباسىنىڭ تاپسىرماسى بويىنشا، «Nur Otan» پارتياسىنىڭ بىرنەشە ايدان بەرى ۇكىمەتپەن جانە ءوڭىردىڭ فيليالدارىمەن بىرگە الداعى 5 جىلعا ارنالعان اۋداندار، قالالار مەن وبلىستاردى دامىتۋدىڭ جاڭا باعدارلاماسىن دايىنداۋ جونىندەگى جۇمىس جاساپ جاتقانىن اتاپ وتكەن ءلازىم. وندا ءاربىر جەكە اۋدانداعى جەرگىلىكتى ەرەكشەلىكتەر ەسكەرىلىپ، ازاماتتاردىڭ ناقتى قاجەتتىلىگى كورىنىس تاباتىن بولادى.
بۇل جۇمىستىڭ شەڭبەرىندە «Nur Otan» پارتياسىنىڭ باسشىلىعى بارلىق ەلدى مەكەندەردى، ونىڭ ىشىندە شالعايداعى اۋداندار مەن اۋىلداردى دا قامتۋ ءۇشىن ەلىمىزدىڭ بارلىق وڭىرلەرىن ارالاپ شىعۋدى جوسپارلاپ وتىر.

پاۆلودار وبلىسىنا ساپار بارىسى كەزىندە باۋىرجان بايبەك 16 كوپپاتەرلى ءۇيدىڭ 800-گە جۋىق تۇرعىنى ورتالىقتاندىرىلعان جىلۋسىز قالعان نوۆوچەرنوياركا اۋىلىنىڭ ادامدارىمەن كەزدەستى. ءوڭىر باسشىلىعىنىڭ ايتۋىنشا، بيىل اۋىلدا بەس الەۋمەتتىك نىساندى دا، جاقىن جەردەگى مەكتەپ، بالالار باقشاسى مەن دارىگەرلىك ەمحانى دا جىلۋمەن قامتاماسىز ەتەتىن قازاندىق سالىنادى.

سونداي-اق، وبلىس ورتالىعىندا «ەكىنشى پاۆلودار» ىقشاماۋدانىنىڭ تۇرعىندارىمەن دە كەزدەسۋ ۇيىمداستىرىلدى. ول جەردە جىل سايىن جەكە ۇيلەردى ەرىگەن جانە جەر استى سۋى دەڭگەيىنىڭ كوتەرىلۋىنەن سۋ باسۋ پروبلەماسى شەشىلمەي كەلەدى. كەزدەسۋدە سونىمەن بىرگە ءتاريفتىڭ ايقىندىعىنا، جەرگىلىكتى مونوپوليست «پاۆلودار - سۋقۇبىرى» ج ش س سۋدى ەسەپتەۋ قۇبىرى باعاسىنا بايلانىستى دا شاعىمدار ايتىلدى. باۋىرجان بايبەك تاياۋ ۋاقىتتارى پارتيا الاڭىندا بارلىق مۇددەلى ورگانداردى قاتىستىرۋ ارقىلى اشىق تىڭداۋ وتكىزۋگە بايلانىستى تاپسىرما بەردى.