قازاقستان پرەزيدەنتى اكىمشىلىگى جانە قورداي اۋداندىق ءماسليحات دەپۋتاتتارىنىڭ كەلىسىمىمەن جامبىل وبلىسى قورداي اۋدانىنا اكىم بولىپ رۇستەم داۋلەت تاعايىندالدى. بۇل اقپاراتتى 21 اقپاندا جامبىل وبلىسى اكىمدىگى حابارلادى.
اكىمدىكتىڭ حابارلاۋىنشا، اۋدان اكتيۆىنە جاڭا اكىمدى جامبىل وبلىسىنىڭ اكىمى بەردىبەك ساپاربايەۆ تانىستىردى.
45 جاستاعى رۇستەم داۋلەت بۇعان دەيىن جامبىل وبلىسى اكىمى اپپاراتىنىڭ جەتەكشىسى قىزمەتىن اتقارعان. جامبىل وبلىسىندا تۋعان ول ەكى جىل جامبىل، ەكى جىل شۋ اۋدانىندا اكىم بولعان. ءبىر جىل تاراز قالاسىن باسقارعان.
قورداي اۋدانىن 2017 جىلدان بەرى باسقارعان بولاتبەك بايتولە 8 اقپاندا اۋدانداعى بىرنەشە اۋىلدا ەتنيكالىق قازاقتار مەن دۇنگەندەر اراسىندا بولعان جانجالدان كەيىن قازاقستان پرەزيدەنتى قاسىم-جومارت توقايەۆتىڭ تاپسىرماسىمەن قىزمەتىنەن بوساتىلعان بولاتىن.
پىكىر قالدىرۋ