باس پروكۋراتۋرا ميتينگ قارساڭىندا ەكىنشى رەت ەسكەرتۋ جاسادى

/image/2020/02/21/crop-154_5_524x698_1038135817.jpg

22 اقپاندا ازاماتتاردى "زاڭسىز ميتينگىگە" شىقپاۋعا شاقىرىپ، ەسكەرتۋ جاساعان قازاقستان باس پروكۋراتۋراسى جۇما كۇنى تاعى دا مالىمدەمە جاسادى. وندا ۆەدومستۆو شەتەلدە تۇراتىن وپپوزيسيالىق ساياساتكەر مۇحتار ءابليازوۆتى قارالاپ، ول شاقىرعان ميتينگىگە قاتىسپاۋعا كەڭەس بەرگەن. بۇل تۋرالى اzattyq حابارلادى.  

نۇر-سۇلتانداعى قازاقستان باس پروكۋراتۋراسىنىڭ عيماراتى.

مالىمدەمەدە باس پروكۋراتۋرا ءابليازوۆتى "قوعامعا ىرىتكى سالىپ جۇرگەن قىلمىسكەر"، "ەلدەگى ءىرى وقيعالاردى جەكە مۇددەسىنە پايدالانعىسى كەلەتىن قىلمىستىق جاۋاپكەرشىلىكتەن قاشىپ جۇرگەن" ادام رەتىندە سيپاتتايدى. ۆەدومستۆو ادامداردى "ارانداتۋعا ىلىگىپ كەتپەي، زاڭسىز اكسيالارعا قاتىسۋدان باس تارتۋعا" شاقىرادى.

قازاقستان بيلىگىن سىناۋشى، شەتەلدە تۇراتىن وپپوزيسيالىق ساياساتكەر مۇحتار ءابليازوۆ جاقتاستارىن ميتينگىگە شاقىرعان سايىن باس پروكۋراتۋرا ازاماتتارعا ەسكەرتۋ جاساپ، "زاڭسىز ميتينگىگە قاتىسقاندار" اكىمشىلىك جازاعا تارتىلادى دەپ مالىمدەۋمەن كەلەدى. ءابليازوۆ قۇرعان "قازاقستاننىڭ دەموكراتيالىق تاڭداۋى" قوزعالىسى 2018 جىلى ەلدە "ەكسترەميستىك ۇيىم" دەپ تانىلىپ، قىزمەتىنە تىيىم سالىنعان. ال ءابليازوۆ قازاقستان سوتىنىڭ شەشىمىمەن كەلىسپەيدى. ەۋروپارلامەنت 2019 جىلعى ناۋرىزداعى رەزوليۋسياسىندا قدت-نى "بەيبىت وپپوزيسيالىق قوزعالىس" دەپ اتاعان.

كەيبىر قۇقىق قورعاۋشىلاردىڭ ايتۋىنشا، ىقتيمال ميتينگ قارساڭىندا قازاقستاندا بەلسەندىلەردىڭ قامالىپ، ميتينگ بولادى دەپ بەلگىلەنگەن ورىنداردىڭ قورشاۋعا الىناتىنى ادەتكە اينالعان. بۇل جولى دا قازاقستاننىڭ ءتۇرلى ايماعىندا جيىرمادان استام بەلسەندى (كەيبىر بەلسەندىلەر بۇدان دا كوپ بولۋى مۇمكىن دەيدى) قامالدى. 

مۇحتار ءابليازوۆقا قازاقستاندا "اقشا جىمقىرۋ"، "قىلمىستىق توپ قۇرۋ"، "ادام ءولتىرۋدى ۇيىمداستىرۋ" سياقتى بىرنەشە اۋىر باپتار بويىنشا ايىپ تاعىلىپ، ەكى رەت سىرتتاي سوتتالدى. ءابليازوۆ قازاقستان بيلىگى تاققان ايىپتىڭ ءبارىن جوققا شىعارىپ، "بيلىككە وپپوزيسيا بولعانىم ءۇشىن ءوش العىسى كەلەدى" دەپ سيپاتتايدى.

پىكىر قالدىرۋ

قاتىستى ماقالالار