بەيبىت جيىندار تۋرالى زاڭدا جيىن وتكىزۋ تۋرالى الدىن الا ەسكەرتۋ قاعيداتى بولۋى كەرەك. بۇل تۋرالى قازاقستان پرەزيدەنتى قاسىم-جومارت توقايەۆ ءوزىنىڭ Twitter پاراقشاسىندا جازدى.
توقايەۆتىڭ سوزىنشە، بەيبىت جيىندار ارنايى بەلگىلەنگەن جەرلەردە وتۋگە ءتيىس.
"بەيبىت جيىندار تۋرالى زاڭدا جيىن وتكىزۋ تۋرالى الدىن الا ەسكەرتۋ قاعيداتى بولۋى كەرەك. قوعامدىق ءتارتىپ پەن قاۋىپسىزدىكتى قامتاماسىز ەتۋ ءۇشىن ۇيىمداستىرۋشىلار جيىنعا قاتىساتىن ازاماتتاردىڭ سانى جونىندە بيلىكتى حاباردار ەتۋگە مىندەتتى. بەيبىت جيىندار ارنايى بەلگىلەنگەن جەرلەردە وتۋگە ءتيىس. كونستيتۋسياعا قايشى كەلەتىن ۇراندارعا جول بەرىلمەيدى" دەپ جازدى پرەزيدەنت.
توقايەۆ بەيبىت جيىندار تۋرالى وتكەن جىلى جەلتوقساندا ءوزىنىڭ باستاماسىمەن قۇرىلعان ۇلتتىق قوعامدىق سەنىم كەڭەسىنىڭ ەكىنشى وتىرسىندا دا ايتقان بولاتىن. پرەزيدەنت سول كەزدە كونستيتۋسيا تالاپتارىنا سايكەس قازاقستان ميتينگ وتكىزۋدىڭ "ەسكەرتۋ" فورماسىنا كوشۋ كەرەگىن جانە "بەيبىت جيىندار تۋرالى" جاڭا زاڭ جوباسى جاسالعانىن مالىمدەگەن.
ال 26 اقپاندا نۇر-سۇلتاندا بەيبىت جيىندار تۋرالى جاڭا زاڭ جوباسىنا قاتىستى قوعامدىق تىڭداۋعا قاتىسقانداردىڭ كەيبىرى جوبانى قولداپ، شەرۋدى ارنايى بەلگىلەنگەن ورىندا وتكىزۋ دۇرىس دەدى. كەيبىرى بەيبىت شەرۋ وتكىزۋ ءۇشىن بيلىكتىڭ رۇقساتى قاجەت ەمەس، ونىڭ وتەتىنىن ەسكەرتسە عانا جەتكىلىكتى دەدى. تىڭداۋعا قاتىسقان بەلسەندىلەر وزدەرىن بەيبىت جيىندا ۇستاپ كەتە بەرەتىنىن، ءتىپتى ۇيدەن شىعا المايتىندارىن ايتىپ، بۇل جوبانىڭ قابىلدانۋىنا قارسى شىقتى.
قازاقستاندا سوڭعى جىلدارى بيلىككە قارسى بەيبىت جينىندار مەن قارسىلىق اكسيالارى ءجيى ءوتىپ ءجۇر. كوبىنە مۇنداي جيىنداردا "ويان، قازاقستان"، "شال، كەت!" دەگەن ۇراندار ايتىلادى. بيلىك وعان قاتىسقانداردى ۇستاپ، اكىمشىلىك جازاعا تارتۋمەن كەلەدى. سوڭعى رەت مۇنداي قارسىلىق اكسيالارى 25 اقپاندا قوعام بەلسەندىسى دۋلات ءاعادىلدىڭ نۇر-سۇلتانداعى تەرگەۋ اباقتىسىندا قايتىس بولعانىنان كەيىن ءوتتى.
قوعام بەلسەندىلەرى مەن ساياسي ۇيىمدار 1 ناۋرىزدا دا دۋلات ءاعادىلدىڭ ولىمىنە بايلانىستى بيلىككە قارسى بەيبىت ميتينگىگە شىعاتىندارىن مالىمدەدى. ولاردىڭ اراسىندا 2019 جىلى پرەزيدەنت سايلاۋىنان كەيىن قۇرىلعان رەسپۋبيلكا قوزعالىسى، وزدەرىن "بيلىككە قارسى وپپوزيسيالىق ۇيىمبىز" دەپ ەسەپتەيتىن "دەمپارتيا" جانە تىركەلمەگەن "كوشە" پارتياسىنىڭ بەلسەندىلەرى بار.
پىكىر قالدىرۋ