مەملەكەت باسشىسى توقايەۆ جامبىل وبلىسى قورداي اۋدانى سورتوبە اۋىلىنداعى ەتنيكالىق دۇنگەندەرمەن كەزدەسكەن. جۇمىس ساپارىنىڭ ۆيدەوسىن اقوردانىڭ باسپا ءسوز قىزمەتى facebook جەلىسىنە جاريالادى. 

– وتانىمىز ءبىر، شاڭىراعىمىز ءبىر، ءتىلىمىز ءبىر. بۇل وقيعادان ساباق الۋىمىز كەرەك. مىسالى، سولتۇستىكتە قۇنارلى جەرلەر بار. نەگە ءبىر جەردە وتىرۋىمىز كەرەك؟ بالالارىڭىزدى سولتۇستىككە، يا بولماسا، شىعىسقا جىبەرىڭدەر. ولار ساۋدا جاسايدى، ەڭبەكتەنەدى، باي بولادى. الەم دەگەن ۇلكەن كەڭىستىك قوي. بالالارىڭىز وسى الەمدى تانىپ ءبىلۋى كەرەك. باسقا حالىقتارمەن ارالاسۋى قاجەت. ارينە، قازاقستاندى دا تانۋى شارت. سوندىقتان ءوز بالالارىڭىزعا دۇنگەن قاۋىمداستىعىنان بولەك قازاقستان دەگەن ۇلكەن الەمنىڭ بار ەكەنىن ۇيرەتىڭىزدەر، - دەدى توقايەۆ. 

سونىمەن بىرگە توقايەۆ ءتىل ماسەلەسىن دە قوزعادى. 

– بالالارىڭىز قازاق ءتىلىن، ورىس ءتىلىن، دۇنگەن ءتىلىن ءبىلۋى كەرەك. ال مەملەكەت ءوز تاراپىنان مادەنيەتتەرىڭىزدى دامىتۋعا، تىلدەرىڭىزدى ۇيرەنۋگە، سالت-داستۇرلەرىڭىزدى ساقتاۋعا جاعداي جاسايدى. ءبىراق مەملەكەتتىك ءتىلدى ءبىلۋى ماڭىزدى. اسىرەسە، ءدال وسىنداي اۋىلدى جەردىڭ تۇرعىندارى قازاقشا ءبىلۋ كەرەك"، - دەپ ەسكەرتتى پرەزيدەنت.