قازاقستان اقپارات جانە قوعامدىق دامۋ ءمينيسترى داۋرەن ابايەۆ ەلدە ۇلتتىق قاۋىپسىزدىك ءۇشىن بىرنەشە شارا قولعا الىنعانىن حابارلادى. ونىڭ سوزىنشە، پرەزيدەنت قاسىم-جومارت توقايەۆتىڭ اسكەري مىندەتتىلەردى جيىندارعا شاقىرۋ تۋرالى شىعارعان شەشىمى دە ۇلتتىق قاۋىپسىزدىك ءۇشىن. 

"كەشە مەملەكەت باسشىسى قاسىم-جومارت توقايەۆ اسكەري مىندەتتى ازاماتتاردى ارناۋلى جيىندارعا شاقىرۋ تۋرالى قاۋلىسى شىقتى. بۇگىن نۇر-سۇلتان جانە الماتى قالالارىندا جۇمىس ىستەيتىن كۇندەر ۋاقىتى 13 ساۋىرگە دەيىن ۇزارتىلدى، كوروناۆيرۋس جۇقتىرعانداردىڭ ستاتيستيكاسى ۇنەمى جاڭارۋدا. ىندەت ەلىمىزدىڭ تۇگەلگە جۋىق وڭىرىنە تارالدى. سوندىقتان ءبىرقاتار وڭىرلەردە كارانتين تالاپتارى كۇشەيتىلدى. بۇل شەشىمنىڭ بارلىعى ۇلتتىق قاۋىپسىزدىك ءۇشىن قاجەت شارالار. باستى ماقسات – ەلدىڭ قاۋىپسىزدىگى. سوندىقتان ايتىلعان تالاپتاردى قاتاڭ ساقتاۋ كەرەك. قوعام اماندىعىنىڭ باستى شارتى وسى" دەدى ابايەۆ.

قازاقستاندا كوروناۆيرۋسقا بايلانىستى 15 ناۋرىزدان بەرى توتەنشە جاعداي. بۇدان بولەك، ىندەت كەڭ تارالۋماۋ ءۇشىن بيلىك بىرنەشە قالانى كارانتينگە جاپقان. كەشە پرەزيدەنت توقايەۆ ەلدەگى اسكەري مىندەتتىلەردى ارنايى جيىندارعا شاقىرۋ تۋرالى قاۋلى ەتتى. 

سوڭعى دەرەك بويىنشا، ەلدە 453 ادام ۆيرۋس جۇقتىرعان. ولاردىڭ اراسىندا 28 مەديسينا قىزمەتكەرى بار. بۇگىنگە دەيىن ءۇش ادام كوز جۇمىپ، 29 ادام ىندەتتەن ايىقتى.