پاندەميانىڭ سالدارىنان تۋىنداعان اۋقىمدى داعدارىس جاعدايىندا، ەڭ الدىمەن، قاراپايىم ازاماتتار كومەككە مۇقتاج. بۇۇ ۇسىنىمدارىنا سايكەس، بۇگىندە ەلدەر «قوعامنىڭ ەڭ قورعانسىز مۇشەلەرىنە» ناقتى قولداۋ كورسەتۋگە جۇمىلعانى ءجون. ءبىر جاعىنان، بۇل داعدارىستى ەڭسەرۋگە كومەك بەرسە، ەكىنشى جاعىنان – قۇلدىراپ بارا جاتقان ىشكى سۇرانىستى، ۇلتتىق ەكونوميكالاردى قولدايدى.

سوندىقتان ەلباسى، «Nur Otan» پارتياسىنىڭ ءتوراعاسى نۇرسۇلتان نازاربايەۆتىڭ باستاماسىمەن قۇرىلعان «Birgemiz» قورى اۋەل باستان پاندەميادان قورعانىسى ءالسىز ازاماتتارعا اتاۋلى كومەك كورسەتۋدى باعدارعا الدى.

وسىعان بايلانىستى قور 150 مىڭنان استام ازاماتقا 50 مىڭ تەڭگە مولشەرىندە تىكەلەي اقشالاي كومەك كورسەتۋ تۋرالى شەشىم قابىلدادى. بۇلار نەگىزىنەن كارانتين قيىندىقتارىن كوبىرەك شەگىپ جاتقان 23 ءىرى قالانىڭ تۇرعىندارى. اكىمدەر مەن الەۋمەتتىك قورعاۋ ورگاندارى ۇسىنعان كومەك الۋشىلار تىزىمدەرىندە تابىس دەڭگەيى ەڭ تومەن الەۋمەتتىك ءالسىز توپتاردان قۇرالعان ازاماتتار قامتىلعان.

سونداي-اق، نۇر-سۇلتان جانە الماتى قالالارىنىڭ
2 مىڭنان استام دارىگەرلەرى دە 50 مىڭ تەڭگەدەن الاتىن بولادى. ىندەت جۇقتىرعانداردىڭ 70%-كە جۋىعى وسى قالالاردا شوعىرلانعان. وسىنداي كۇردەلى جاعدايدا شىبىن جاندارىن شۇبەرەككە ءتۇيىپ، ۆيرۋسپەن كۇرەستىڭ الدىڭعى شەبىندە جۇرگەن مەديسينا قىزمەتكەرلەرىنە اتاۋلى كومەك بەرۋدىڭ ماڭىزى زور.

مۇقتاج جاندارعا وسىلايشا قولداۋ كورسەتىپ وتىرۋىمىز ەلىمىزدىڭ بيزنەسمەن – مەسەناتتارىنىڭ قايىرىمدىلىق كومەگىنىڭ ارقاسىندا مۇمكىن بولىپ وتىر. ءقازىر كىم-كىمگە دە وڭاي ەمەس. بيزنەس قانشالىقتى اۋقىمدى بولسا، ونىڭ پروبلەماسى دا سونشالىقتى ۇلكەن بولماق. جۇمىس ورىندارىن ساقتاۋ، ءوندىرىس پروسەسىن توقتاتپاۋ، سالىق تولەۋ سەكىلدى سانسىز مىندەتتەرى بار. سوعان قاراماستان، ولاردىڭ كوپشىلىگى ەلباسىنىڭ ۇندەۋىنە قولداۋ ءبىلدىرىپ، ازاماتتىق ۇستانىمدارىن كورسەتتى. بۇل ءۇشىن ولارعا تاعى دا العىس ايتامىن!

بۇل كومەك مەملەكەت باسشىسى قاسىم-جومارت توقايەۆتىڭ باستاماسىمەن قولعا الىنعان اۋقىمدى قولداۋ شارالارىنا قوسىمشا بولىپ تابىلادى. كوروناۆيرۋستىڭ قاتەرىن دەر كەزىندە جەتە باعامداماعان ءبىرقاتار ەلدەرمەن سالىستىرعاندا، قازاقستان ۆيرۋستىڭ تەجەۋسىز تارالۋىنا جول بەرمەي، دەر كەزىندە شەكتەۋ شارالارىن قابىلدادى.

مەملەكەت باسشىسىنىڭ باسشىلىعىمەن ۇكىمەت پەن اكىمدەر الدىن الا بەلسەندى جۇمىس جۇرگىزۋدە. «مىقتى پرەزيدەنت – ىقپالدى پارلامەنت – ەسەپ بەرەتىن ۇكىمەت» فورمۋلاسى داعدارىستى كەزەڭدە ءوز تيىمدىلىگىن كورسەتۋدە. بۇگىندە پرەزيدەنت ۇسىنعان قولداۋ شارالارى – تمد ەلدەرى اراسىندا ەڭ كولەمدى، جۇيەلى جانە رەسۋرسپەن قامتاماسىز ەتىلگەن داعدارىسقا قارسى جوسپار بولىپ وتىر. ونى جۇزەگە اسىرۋ ءۇشىن بيۋدجەتتەن جانە ۇلتتىق قوردان 5،9 ترلن. تەڭگە ءبولىندى.

بارلىق قولعا الىنعان ىس-ارەكەت، ەڭ الدىمەن، قازاقستاندىقتاردىڭ ءومىرى مەن دەنساۋلىعىن قورعاۋعا باعىتتالعان. بۇل - باستى باسىمدىق. مەملەكەت سوڭعى 2 جىلدا ازاماتتاردى الەۋمەتتىك قامتاماسىز ەتۋ بويىنشا كولەمى ۇلعايعان مىندەتتەمەلەرىنە قاراماستان، ولاردىڭ ورىندالۋىنا كەپىلدىك بەرەدى. ەڭبەكاقى، زەينەتاقى، جاردەماقى ۋاقتىلى جانە تولىق كولەمدە تولەنەتىن بولادى. قازىرگىدەي جاعدايدا مۇنىڭ ءوزى وڭاي شارۋا ەمەس.

قابىلدانعان شارالار كەشەندى. ولار تەك اعىمداعى الەۋمەتتىك مىندەتتەردى عانا شەشۋگە باعىتتالماي، سونىمەن بىرگە ەلدىڭ جاڭا جاعدايدا دامۋىنا نەگىز قالايدى. بۇل – شاعىن جانە ورتا بيزنەستى ىنتالاندىرۋ، ينفراقۇرىلىمدى دامىتۋ، اگروونەركاسىپتىك كەشەندى، جالپى وتاندىق ءوندىرىستى قولداۋ شارالارى.

قازاقستان - قازىرگى كەزەڭدە وڭىردەگى ەلدەر ىشىندە ەكونوميكانىڭ زارداپ شەككەن سەكتورلارىنداعى كاسىپورىندار ءۇشىن 6 ايعا سالىقتى جانە ەڭبەكاقى قورىنان تولەنەتىن باسقا دا تولەمدەردى الىپ تاستاعان بىردەن-بىر ەل.

اسىرەسە، جۇرتشىلىق ۇسىنىلعان شارالاردىڭ ناقتىلىعىن ەرەكشە اتاپ كورسەتۋدە. كومەك الۋشىلار تىزىمىنە ءوزىن-وزى جۇمىسپەن قامتۋشىلار مەن بۇرىن بەيرەسمي تابىس تابۋشى تۇلعالاردى قوسۋ 3 ميلليونداي ازاماتتى قامتۋعا مۇمكىندىك بەردى. شىن مانىندە «حالىق ۇنىنە قۇلاق اساتىن مەملەكەت» دەگەنىمىز، وسى.

وسىنداي كۇردەلى كەزەڭدە مەملەكەتىمىز ءوزىنىڭ تولىسقاندىعىن كورسەتىپ وتىر. مەملەكەتتىك ينستيتۋتتار ورنىقتىلىعىن تانىتتى. كەزىندە ەلباسى قالىپتاستىرعان مىقتى مەملەكەتتى قامتاماسىز ەتەتىن بيلىك ۆەرتيكالى ماسەلەلەردى جەدەل شەشۋگە مۇمكىندىك بەرۋدە. ۇكىمەتتىڭ داعدارىستاردى ەڭسەرۋدە باسقارۋشىلىق تاجىريبەسى جەتكىلىكتى.

تاۋەلسىزدىك جىلدارى قازاقستان ءوز ەكونوميكاسىن جوسپارلى تۇردە دامىتتى، ينۆەستيسيالار تارتتى، بيزنەسكە قولايلى جاعداي جاساپ، ينفراقۇرىلىمدى بەلسەندى دامىتتى. ەلباسىنىڭ ستراتەگيالىق كورەگەندىگىنىڭ ارقاسىندا بۇگىندە ەلىمىزدىڭ ۇلتتىق قور جانە التىنۆاليۋتا قورى سەكىلدى «قاۋىپسىزدىك كوپشىگى» بار. حالىقارالىق Moody’s رەيتينگتىك اگەنتتىگىنىڭ باعالاۋى بويىنشا، قازاقستان ءوز جەكە قورىنا سۇيەنە وتىرىپ، اعىمداعى جاعدايدان شىعۋعا قابىلەتتى مەملەكەتتەردىڭ ءبىرى بولىپ تابىلادى. تاۋەلسىزدىك جىلدارى ەلباسىنىڭ باسشىلىعىمەن كولەمدى الەۋمەتتىك ينفراقۇرىلىم قالىپتاستى. تەك سالىنعان اۋرۋحانالار مەن ەمحانالاردىڭ ءوزى 1400-دەن اسادى. بۇل رەتتە «100 مەكتەپ، 100 اۋرۋحانا» باعدارلاماسىن ەرەكشە اتاپ وتكەن ءجون.

ۇزدىكسىز وزگەرىس ۇستىندەگى احۋال جاڭا ەرەجەلەردى تالاپ ەتۋدە. ونلاين رەجيمى بارعان سايىن ءبىزدىڭ ءومىرىمىزدىڭ اجىراماس بولىگىنە اينالۋدا. ءدال وسى ساتتە «سيفرلى قازاقستان» باعدارلاماسىن جوسپارلى تۇردە ىسكە اسىرۋدىڭ وڭ تۇستارى ايقىن كورىنۋدە. مەملەكەتتىك اپپارات الەۋمەتتىك ماڭىزدى مەملەكەتتىك قىزمەت تۇرلەرىن ينتەرنەتكە كوشۋ ارقىلى ءوز جۇمىسىن جەدەل قايتا ۇيىمداستىرۋدا. قازاقستان مەكتەپتەرى مەن جوعارى وقۋ ورىندارى كەيبىر قيىندىقتارعا قاراماستان، ونلاين ءبىلىم بەرۋگە كوشۋ ۇستىندە. وسى جانە باسقا دا ۋاقىتىلى جاسالعان كوپتەگەن ءىس-قيمىلدار مەملەكەتتىگىمىزدى نىعايتىپ، بۇگىندە داعدارىسقا قارسى ءتيىمدى ساياسات جۇرگىزۋگە مۇمكىندىك بەرىپ وتىر.

جۇرتشىلىق وسىناۋ كوروناۆيرۋس پاندەمياسىنان ورىن العان داعدارىستىڭ سالدارى جالپى الەم ەكونوميكاسى ءۇشىن اۋىر ءارى سوزىلمالى بولاتىنىنا كوز جەتكىزدى. وسىعان وراي، ەكونوميكامىزدى قالپىنا كەلتىرۋ قازاقستاندىقتاردان بارىنشا اۋىزبىرشىلىكتى، جاۋاپكەرشىلىك پەن كۇن سايىنعى تاباندى ەڭبەكتى تالاپ ەتپەك. ءبىز بۇگىنگى قيىندىقتار مەن سىناقتاردى وسىلاي عانا ەڭسەرەمىز!