الماتى قالاسى اكىمدىگىنىڭ باسپا ءسوز ورتالىعىندا وتكەن ونلاين-بريفينگتە الماتى قالالىق تۇرعىن ءۇي باسقارماسىنىڭ باسشىسى ەرجان سەيتەنوۆ دەزينفەكسيالاۋ جۇمىستارىنىڭ بارىسى تۋرالى ايتتى.
قازىرگى تاڭدا اينالانى، قوعامدىق ورىنداردى زالالسىزداندىرۋ جۇمىستارى جەدەل قولعا الۋ بويىنشا بىرنەشە مەكەمەنىڭ باسىن بىرىكتىرگەن ءۇش توپ جۇيەلى تۇردە جۇمىس ىستەۋدە.
– الماتى اسكەري گارنيزونىنىڭ قىزمەتكەرلەرى بارشاعا ورتاق قولدانىستاعى ورىنداردى بەكىتىلگەن كەستەگە سايكەس كۇن سايىن ەكى اۋداننان دەزينفەكسيالاپ وتىرادى. سەيسەنبى جانە سەنبى كۇندەرى ىندەت وشاقتارى، اۋرۋحانالار مەن ەمحانالار، شيپاجايلار، ازىق-تۇلىك بازارلارى دەزينفەكسيالانادى. بۇگىنگى كۇنى بۇل جۇمىستارعا 635 ادام، 48 بۇرىككىش، 14 بىرلىك تەحنيكا جۇمىلدىرىلدى. ال "الماتى تازالىق" جانە اۋدان اكىمدىكتەرىنىڭ مەردىگەر ۇيىمدارى كۇن سايىن ايالدامالارعا، قوقىس جاشىكتەرىنە، ورىندىقتارعا، جەرۇستى جانە جەراستى وتكەلدەرىنە، سونداي-اق ازىق-تۇلىك دۇكەندەرى مەن ءدارىحانالاردىڭ كىرەبەرىستەرىنە دەزينفەكسيا جاسايدى، – دەدى ە. سەيتەنوۆ.
سپيكەردىڭ سوزىنە جۇگىنسەك، بۇگىنگى كۇنى جولداردى، تروتۋارلاردى، جاياۋ جۇرگىنشىلەر ايماقتارىن، ورتاق پايدالانىلاتىن ورىنداردى جۋۋ جانە دەزينفەكسيالاۋ بويىنشا جۇمىستارعا 102 سۋارۋ-جۋۋ ماشيناسى، 48 تروتۋارلاردى تازالايتىن ماشينا، 734 جول جۇمىسشىسى جانە 156 دەزينفەكتور جۇمىلدىرىلعان.
بۇدان باسقا، كونتەينەرلەر ورنالاسقان الاڭدارعا دا كۇندە زالالسىزداندىرۋ جۇمىستارى جۇرگىزىلۋدە. ول ءۇشىن 85 ادام تارتىلعان.
– تۇرعىن ءۇي ساياساتى باسقارماسىنىڭ مەردىگەر ۇيىمدارى دا اپتاسىنا 2 رەت كوپپاتەرلى ۇيلەردىڭ كىرەبەرىستەرى مەن اۋلا اۋماقتارىن دەزينفەكسيالاپ وتىرادى. جەكسەنبىدەن باسقا كۇندەرى، كۇن سايىن كوپپاتەرلى تۇرعىن ۇيلەردى وڭدەۋگە قۇرامىندا 525-كە جۋىق دەزينفەكسيالاۋشى ادامى بار 70 بريگادا جۇمىلدىرىلعان. بۇگىنگە دەيىن ءاربىر كىرەبەرىس پەن اۋلا 3 رەت زالالسىزداندىرىلدى. ەرتەڭ دەزينفەكسيالىق جۇمىستاردىڭ 4-كەزەڭى اياقتالادى، – دەدى سپيكەر.
سپيكەردىڭ مالىمدەۋىنشە، دەزينفەكسيالىق قۇرالدار بارلىق جەردە ازىرگە جەتكىلىكتى. زالالسىزداندىرۋ جۇمىستارىنا قولدانىلىپ جاتقان دەزينفەكسيالىق ەرىتىندىلەردىڭ ادام جانە جانۋارلار ومىرىنە ەشقانداي زيانى جوق.
الماتى قالالىق تۇرعىن ءۇي باسقارماسىنىڭ باسشىسى ە. سەيتەنوۆ تۇرعىندار تاراپىنان كەي جەرلەردە دەزينفەكسيا جاسالمايتىندىعى، جاسالعان كۇندە دە ساپاسىز بولاتىندىعى تۋرالى شاعىمدار تۇسكەنى تۋرالى دا اتاپ ءوتتى. سونداي تالاپ-تىلەكتەر ەسكەرىلىپ، باق-تا، قالالىق جانە اۋداندىق اكىمدىكتەردىڭ الەۋمەتتىك جەلىلەرىنىڭ اككاۋنتتارىندا ءار اۋدان بويىنشا كوپپاتەرلى تۇرعىن ۇيلەرگە دەزينفەكسيا جۇرگىزۋگە جاۋاپتى تۇلعالاردىڭ بايلانىس نومىرلەرى ورنالاستىرىلعاندىعىن دا تىلگە تيەك ەتتى.
سونداي-اق، +77010382525 ءنومىرى بويىنشا WhatsApp جەلىسى جۇمىس ىستەيدى. وعان كەز كەلگەن تۇرعىن زالالسىزداندىرۋ جۇمىستارىنىڭ ساپاسىزدىعىن نەمەسە مۇلدەم دەزينفەكسيا جاسالماعاندىعىن دالەلدەيتىن بەينە جانە فوتو ماتەريالدارىن جىبەرە الادى.
