ايتىسكەر اقىن رينات زايتوۆ "يت ءسوزى" اتتى ولەڭ شىعاردى. اقىن ولەڭىنە ارنايى ۆيدەو ءتۇسىرىپ، Youtube جەلىسىندەگى كانالىنا جاريالاعان. ۆيدەوعا قاراعاندا، زايتوۆتىڭ جاڭا ولەڭى پوليسياعا ارنالعانىن بايقاۋعا بولادى. ويتكەنى ۆيدەودا يت ۇستاپ جۇرگەن اسكەري كيىمدەگى، پوليسيا كيىمىندەگى ادامدار ءجيى ۇشىراسادى.
اقىننىڭ جاڭا ولەڭىنىڭ تولىق ءماتىنى تومەندەگىدەي:
ءتۇرىم ۇقساس جارالسا دا قاسقىرمەن،
يت بوپ ءجۇرمىن كەزدەرىمنەن ەس بىلگەن.
ۇرەم، قابام، تىرنايمىن مەن ويلانباي،
ارازداسساڭ، ماعان تاماق بەرگەن تاقسىرمەن.
ءوزىم جايلى ايتار بولسام، قىسقاشا:
جۇمىسىما جۇمسامايمىن كۇشتى اسا.
تاماعىم توق. ۇيشىك. شىنجىر. قارعىباۋ،
قوجايىن كوپ بوساتپايدى، الدەقانداي جاعدايلارى قىسپاسا.
كىم ول، كىم ول شىقپاق بولعان شەرۋگە،
ءداتى بارعان تاقسىرىما قارسى كەلۋگە.
قوجايىنعا ادال بولۋ – مەنىڭ مەنىڭ ۇلى مىندەتىم.
جاقىنداپ كور، دايىن بولساڭ ولۋگە.
قانە، قانە قايسىڭ، جەدەل قانعا بويايىن،
تالاپ، جۇلىپ، كوزدەرىڭدى جويايىن.
قوجايىنىم ايتاقتاسا، "كەمپىر مەن شال، ەكى قابات قاتىن" دەپ
ايامايمىن، بىردەن ايتىپ قويايىن.
كەيبىرەۋگە جاقپاسا دا قىلىعىم،
جالاۋ پارىز – قوجايىننىڭ اياعىن،
يىسكەۋ پارىز – شۇلىعىن.
تۋىس تا جوق، دوسىم دا جوق جالعاندا،
مەن ءيتپىن عوي، قىزمەتتىڭ قۇلىمىن.
ءبىراق مەنىڭ قوجايىنىم ءبىرتۇرلى،
ۇناتادى اتاق، ءمانساپ، جىلتىردى،
ۇناتادى ءزاۋلىم ساراي، سىلقىمدى.
جاقىندا بىرەۋى ۇل تۋدى...
ءاربىر ءسوزى ءبىر ادەبي تۋىندى،
ۇناتادى ءتاتتى تاعام سۋىڭدى.
نەگىزى ونى ءبىز دە جاقسى كورەمىز،
ءبىراق ءبىزدىڭ جەيتىنىمىز جۋىندى.
سوندا دا ونى قورعايمىن مەن، كەزدەسسە دە جولدان وق.
بۇيىرسىن ول: ايتاق، وڭعا، سولعا دەپ.
"جۋىندىعا قۇل بولدىڭ" دەپ جازعىرعاندار جازعىرسىن،
كەيبىرەۋدە ول دا جوق.
ماڭىزدى ەمەس، زاڭنىڭ اق پەن قاراسى.
ال مەن ءوستىپ كۇن كەشەمىن شاماسى.
ءوزىم – ءيتپىن، بالام – ءيتتىڭ بالاسى،
ال اتا-انام – ءيتتىڭ اتا-اناسى.
جەتەر ەندى، نەسىنە ءسوزدى سوزايىن،
بۇل – انشەيىن يت پىكىرىم، ءوز ويىم.
تاقسىرىما ادال بولۋ – جەتى اتامنان امانات،
سەن امان بول، قوجايىن!
پىكىر قالدىرۋ