الماتى  قالالىق قوعامدىق دەنساۋلىق ساقتاۋ باسقارماسىنىڭ باسشىسى تىلەۋحان ابىلدايەۆ كوروناۆيرۋسپەن كۇرەسىپ جاتقان مەديسينا قىزمەتكەرلەرىنە 1 ملرد 134 ملن تەڭگە كولەمىندە ۇستەمەاقى بەرىلگەنىن ايتتى. بۇل تۋرالى قازاقپارات حابارلادى. 

باسقارما باسشىسى دارىگەرلەر ۇستەمەاقى المادى دەگەن اقپاراتتى جوققا شىعاردى.

– كەشە كەيبىر ب ا ق بەتتەرىندە COVID-19 كوروناۆيرۋسىمەن كۇرەس اياسىندا ەپيدەمياعا قارسى ءىس-شارالارعا تارتىلعان مەديسينا قىزمەتكەرلەرىنە ۇستەمەاقى تولەمەنبەگەندىگى تۋرالى اقپاراتتار جاريالاندى. اتالعان فاكت بويىنشا مەملەكەتتىك كوميسسياسىنىڭ تاۋەكەل ساناتتارى تىزىمىنە كىرەتىن بارلىق مەديسينا قىزمەتكەرلەرى جۇمىس ىستەگەن ساعاتتار ءۇشىن تولىق كولەمدە تولەمدەر الاتىندىعىن رەسمي تۇردە حابارلايمىن. مەملەكەتتىك كوميسسيانىڭ شەشىمىنە سايكەس، مەملەكەت باسشىسىنىڭ تاپسىرماسى بويىنشا كومەك الۋعا ءۇش تاۋەكەل توبىنا جاتقىزىلعان مەديسينا قىزمەتكەرلەرى قۇقىلى ەكەنىن ەسكە سالامىز، – دەدى باسقارما باسشىسى.

تىلەۋحان ابىلدايەۆ بالالار قالالىق جۇقپالى اۋرۋلار اۋرۋحاناسى مەن مەديسينالىق جەدەل جاردەم قىزمەتىندە ورىن العان الەۋمەتتىك شيەلەنىسكە بايلانىستى بۇل بۇيرىقتىڭ نەگىزگى ەرەجەلەرى تۋرالى، جالاقىعا قوسىمشا بەرىلەتىن ۇستەمەاقى كىمگە تيەسىلى جونىندە جانە قىزمەتكەرلەر ساناتى تۋرالى ءوزى جەكە ءتۇسىندىرۋ جۇمىستارىن جۇرگىزگەن.

– وسى بۇيرىقتىڭ تاۋەكەل توبىنا كىرمەگەن قىزمەتكەرلەرگە قاتىستى، ولار بويىنشا مەديسينالىق ۇيىمداردىڭ جالاقى قورىنان قارجىلاي قولداۋ تۋرالى شەشىم قابىلدانىپ جاتىر. بۇل ماتەريالدىق قولداۋ مەديسينا قىزمەتكەرلەرىنىڭ كۇشىن ىنتالاندىرۋ جانە قولداۋ ءۇشىن ماڭىزدى. سونداي-اق، تولەمدەر ق ر سالىق كودەكسىنە سايكەس بارلىق سالىقتاردى ەسكەرە وتىرىپ، ايلىق جۇمىس بالانسىنان اسپايتىن ناقتى جۇمىس ىستەگەن ۋاقىتى ءۇشىن جۇرگىزىلەتىندىگىن ەسكە سالعىم كەلەدى، – دەدى ول.

ءقازىر الماتىدا 3 758 قىزمەتكەرگە، ونىڭ ىشىندە 498 دارىگەرگە، 1800 ورتا مەديسينا قىزمەتكەرىنە، 624 كىشى مەديسينا قىزمەتكەرىنە جانە باسقا دا 836 قىزمەتكەرگە، ونىڭ ىشىندە مەديسينالىق جەدەل جاردەم قىزمەتىنىڭ 822 جۇرگىزۋشىسىنە تولەم جۇرگىزىلدى.

ولارعا جالپى العاندا 1 ملرد 134،8 ملن تەڭگە تولەنگەن.

بۇگىن مەديسينالىق جەدەل جاردەم قىزمەتىنىڭ جۇمىسكەرلەرىنە تولەم جۇرگىزىلىپ جاتىر. وسىلايشا 100%-عا دەيىن جەتكىزىلەتىن بولادى.

ايتا كەتۋ كەرەك، الماتىدا كوروناۆيرۋس جۇقتىرعان مەديسينا قىزمەتكەرلەرىنىڭ سانى 234-كە جەتتى.