الماتى قالالىق پوليسيا دەپارتامەنتى كريمينالدىق پوليسيا باسقارماسىنىڭ باسشىسى ج.زيادين ەليتالى كولىكتەر مىنگەن ازاماتتاردىڭ بلوكپوستان وتكەنىنە جول بەرگەنى ءۇشىن جۇمىسىنان بوساتىلدى، – دەپ حابارلادى polisia.kz حابارلادى.

الماتىدا بلوكپوست ارقىلى زاڭسىز ءوتۋ فاكتىسى بويىنشا توتەنشە جاعداي رەجيمىن بۇزعانى ءۇشىن 5 ادام ۇستالىپ، 10-نان 15 تاۋلىككە دەيىن تۇتقىنداۋ تۇرىندەگى اكىمشىلىك جاۋاپقا تارتىلدى.

بارلىق 4 ەليتالى اۆتوموبيل ايىپ تۇراعىنا قويىلدى. كورتەجگە قاتىسقان تاعى ەكى ادامعا ىزدەۋ سالىنعان. وسى رەتتە اتالعان فاكتىگە جول بەرگەن جانە ولاردىڭ جولىن كەسۋ شارالارىن قابىلداماعان پوليسيا قىزمەتكەرلەرى تارتىپتىك جازاعا تارتىلدى.

كريمينالدىق پوليسيا باسقارماسىنىڭ باستىعى ج.زيادين، سونداي-اق پاترۋلدىك پوليسيا پولكى كومانديرىنىڭ ورىنباسارى ە.قۋانىشبايەۆ قىزمەتتەرىنەن بوساتىلدى.

21 ءساۋىر كۇنى ۆيدەوكونفەرەنسيا بايلانىسى رەجيمىندە وڭىرلىك بولىمشەلەردىڭ باسشىلارىمەن وتكەن كەڭەستە ىشكى ىستەر ءمينيسترى ەرلان تۇرعىمبايەۆ اتالعان فاكتىگە قاتىستى ناقتى ۇستانىمىن ءبىلدىردى.

– قۇقىقتىق ءتارتىپ پەن ازاماتتاردىڭ قاۋىپسىزدىگىن قامتاماسىز ەتۋ ىشكى ىستەر ورگاندارى قىزمەتكەرلەرىنىڭ نەگىزگى مىندەتى جانە بولىپ تا قالا بەرەدى. توتەنشە جاعداي مەن كارانتين رەجيمىن بۇزۋعا، ونىڭ ۇستىنە جەكە قۇرام تاراپىنان جول بەرۋگە بولمايدى. مۇنى قاتارداعى قىزمەتكەرلەرمەن قاتار ولاردىڭ باسشىلار دا ەستە ساقتاۋعا ءتيىس، – دەدى ەرلان تۇرعىمبايەۆ.